ଦିଗପହଣ୍ଡି,୨୩।୩(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ସହଦେବ ଟିକରପଡ଼ା ଗାଁରେ ରବିବାର ରାତିରେ ରଜନୀକାନ୍ତ ଗୌଡ଼,ଚନ୍ଦ୍ରମା ଗୌଡ଼ଙ୍କ ୨ଟି ଦୁଇ ମହଲା ଘର ଏବଂ ପଡ଼ୋଶୀ ଗୋପାଳ ଗୌଡ଼ଙ୍କ ୧ ବଖରା ଚାଳଘର, ବିଶ୍ୱନାଥ ଗୌଡ଼, ବାବୁଲା ଗୌଡ଼ଙ୍କ ଦୁଇଟି ଗୁହାଳ ଘର ଅଚାନକ ଭୁଶୁଡ଼ି ପଡ଼ିଛି। ଶବ୍ଦ ଶୁଣି ଗୋପାଳ ଏବଂ ତାଙ୍କ ସ୍ତ୍ରୀ ସୀମା ନିଦରୁ ଉଠି ପ୍ରାଣ ବିକଳରେ ଘରୁ ବାହାରକୁ ଚାଲିଯିବାରୁ ଦୁହେଁ ଅଳ୍ପକେ ବର୍ତ୍ତି ଯାଇଛନ୍ତି। ପ୍ରଥମେ ସେମାନେ ବିଶ୍ୱନାଥଙ୍କ ଗୁହାଳ ମାଟି କାନ୍ଥ ତଳେ ଚାପି ହୋଇ ରହିଥିବା ଗୋରୁଙ୍କୁ ଉଦ୍ଧାର କରିଥିଲେ। ସେହିପରି ରଜନୀକାନ୍ତ, ଚନ୍ଦ୍ରମା ନିକଟସ୍ଥ କୈଠଖଣ୍ଡି ଗ୍ରାମର ଜଣେ ସମ୍ପର୍କୀୟଙ୍କ ବିବାହ ଉତ୍ସବରେ ଯୋଗ ଦେବାକୁ ଚାଲିଯାଇଥିବାରୁ ସେମାନେ ମଧ୍ୟ ସମ୍ଭାବ୍ୟ ଅଘଟଣରୁ ବର୍ତ୍ତି ଯାଇଛନ୍ତି। ଖବରପାଇ ସେମାନେ ସୋମବାର ସକାଳେ ଗାଁରେ ପହଞ୍ଚିଛନ୍ତି।
ଭୁଶୁଡ଼ି ପଡ଼ିଥିବା ରଜନୀକାନ୍ତ ଓ ଚନ୍ଦ୍ରମାଙ୍କ ଘରର ସମସ୍ତ ଆସବାବପତ୍ର ସମ୍ପୂର୍ଣ୍ଣ ନଷ୍ଟ ହୋଇଯାଇଛି। କୋଠା ୨ଟି ବହୁବର୍ଷର ପୁରୁଣା ହୋଇଥିବା ବେଳେ ଦୁଇଦିନ ହେଲା ସମ୍ପୃକ୍ତ ଅଞ୍ଚଳରେ ଘନଘନ ବଜ୍ରପାତ ସହ ବର୍ଷା ଯୋଗୁ ଘର ଚାରିପାଖରେ ବର୍ଷାଜଳ ନିଷ୍କାସନ ହୋଇ ନ ପାରି ଜମି ରହିଥିଲା। ସେହିପରି କୋଠା ୨ଟି ଭୁଶୁଡ଼ି ପଡ଼ିବାରୁ ତା’ର ପ୍ରଭାବରେ ଅନ୍ୟ ୩ଟି ମାଟି ଘର କାନ୍ଥ ଭୁଶୁଡ଼ି ପଡ଼ିଛି। ଖବର ପାଇ ଦିଗପହଣ୍ଡି ତହସିଲଦାର ଅଦୈତ କୁମାର ସ୍ବାଇଁ, ବିଡିଓ ହଳଧର ଶବର ଗାଁରେ ପହଞ୍ଚି ସବିଶେଷ ତଦନ୍ତ କରି ଫେରିଛନ୍ତି। ରାଜସ୍ବ ନିରୀକ୍ଷକଙ୍କ ରିପୋର୍ଟ ଭିତ୍ତିରେ କ୍ଷୟକ୍ଷତି ଆକଳନ କରାଯିବା ପରେ ସରକାରୀ ସହାୟତା ପ୍ରଦାନ କରାଯିବ ବୋଲି ତହସିଲଦାର କହିଛନ୍ତି।
