ଛେଣ୍ଡିପଦା,୧୪।୩(ସ୍ବ.ପ୍ର.)
ଏକଦା ଶିକ୍ଷାକ୍ଷେତ୍ରରେ ନାଁ କମାଇଥିବା ଅନୁଗୋଳ ଜିଲା ଛେଣ୍ଡିପଦା ବ୍ଲକସ୍ଥିତ ପୁରାତନ ଶିକ୍ଷାନୁଷ୍ଠାନ ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ ଏବେ ନାନା ସମସ୍ୟାରେ ଗତି କରୁଛି। ଭିତ୍ତିଭୂମି, ଆନୁଷଙ୍ଗିକ ବ୍ୟବସ୍ଥା ପ୍ରତି ଗୁରୁତ୍ୱ ଦିଆଯାଉ ନ ଥିବା ସହ ଆବଶ୍ୟକ କର୍ମଚାରୀ ନ ଥିବାରୁ ଏଠାରେ ଶିକ୍ଷାଦାନ ବାଧାପ୍ରାପ୍ତ ହେଉଥିବା ଅଭିଯୋଗ ହୋଇଛି। ଏ ନେଇ ପ୍ରତିଷ୍ଠାନ ପକ୍ଷରୁ ଜିଲାପାଳଙ୍କଠାରେ ଅଭିଯୋଗ ପତ୍ର ପ୍ରଦାନ କରାଯାଇଛି।
ଅଭିଯୋଗରୁ ଜଣାଯାଏ, ଏହି ପୁରାତନ ପ୍ରତଷ୍ଠାନରୁ ଶିକ୍ଷା ଲାଭ କରି ରାଜ୍ୟର ବହୁ ଛାତ୍ରୀଛାତ୍ର ବିଭିନ୍ନ ବିଦ୍ୟାଳୟରେ ଶିକ୍ଷାଦାନ କରୁଛନ୍ତି। ଅନୁଗୋଳ ଜିଲାର ଏହା ଏକମାତ୍ର ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ ହୋଇଥିବା ବେଳେ ଏଠାରେ ଆବଶ୍ୟକୀୟ ଭିତ୍ତିଭୂମି ନାହିଁ। ବିଭାଗୀୟ ଓ ରାଜନୈତିକ ଅବହେଳା ଯୋଗୁ ଶିକ୍ଷାଦାନ ବାଧାପ୍ରାପ୍ତ ହୋଇଛି। ପ୍ରତିଷ୍ଠାନରେ ରାଜ୍ୟର ବିଭିନ୍ନ କୋଣ ଅନୁକୋଣରୁ ଚଳିତ ବର୍ଷ ୧୮୭ ଜଣ ଗୁରୁ ଛାତ୍ରୀଛାତ୍ର ପ୍ରଶିକ୍ଷଣ ନେଉଛନ୍ତି। ହେଲେ ଅବହେଳାର ଶିକାର ହୋଇ ସମସ୍ୟାରେ ଗତି କରୁଥିବା ଏହି ପ୍ରତିଷ୍ଠାନରେ ଉଚ୍ଚମାନର ତଥା ଗୁଣାତ୍ମକ ଶିକ୍ଷାଦାନରୁ ଛାତ୍ରୀଛାତ୍ର ଏକପ୍ରକାର ବଞ୍ଚିତ ହେଉଛନ୍ତି। ବିଦ୍ୟାଳୟର ଶ୍ରେଣୀଗୃହ, ଛାତ୍ରାବାସ, ଶୌଚାଳୟ, ପାଚେରି ଓ ପିଇବା ପାଣି ପ୍ରମୁଖ ସମସ୍ୟା ଭାବେ ଉଭା ହୋଇଛି। ସାଇକେଲ ଷ୍ଟାଣ୍ଡ ନ ଥିବାରୁ ଛାତ୍ରୀଛାତ୍ର ଏଣେତେଣେ ସାଇକେଲ ରଖୁଛନ୍ତି। ଏପରିକି ଶୌଚାଳୟ ନ ଥିବାରୁ ଛାତ୍ରମାନେ ଖୋଲା ପଡିଆକୁ ଶୌଚ ହେବାକୁ ଯାଉଛନ୍ତି। ପୁରୁଣା ଆଜବେଷ୍ଟସ ଛପର ଘର ବିପଦପୂର୍ଣ୍ଣ ଅବସ୍ଥାରେ ରହିଥିବାବେଳେ ଶ୍ରେଣୀ ଗୃହର ଅଭାବ ରହିଛି। ୨୦୧୧ରେ ୫୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ନିର୍ମିତ ହୋଇଥିବା ପ୍ରଶାସନିକ ଗୃହ କାନ୍ଥ ଫାଟି ସିମେଣ୍ଟ ଖସୁଥିଲେ ମଧ୍ୟ ସେଠାରେ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। କର୍ମଚାରୀ, ଛାତ୍ରୀନିବାସ ସୁପରିଣ୍ଟେଣ୍ଡେଣ୍ଟ ଓ ଛାତ୍ରୀଛାତ୍ରଙ୍କ ନିମନ୍ତେ ମଲ୍ଟି ପ୍ରପୋଜ ଗୃହର ଆବଶ୍ୟକତା ରହିଛି। ଏ ସବୁର ସମାଧାନ ନିମନ୍ତେ ପଦକ୍ଷେପ ଗ୍ରହଣ କରିବାକୁ ପ୍ରତିଷ୍ଠାନର ଅଧ୍ୟକ୍ଷ ସୁବାସ ଚନ୍ଦ୍ର ଦାଶ ଦାବି କରିଛନ୍ତି।
