ଭବାନୀପାଟଣା,୧୩।୮(ଡି.ଏନ୍.ଏ.): ଶ୍ରାବଣ ମାସର ଶେଷ ସୋମବାର ଉପଲକ୍ଷେ କଳାହାଣ୍ଡି ଜିଲା ଭବାନୀପାଟଣା ସହରର ଭବାନୀଶଙ୍କର ମହାଦେବଙ୍କ ନିକଟରେ ଏକ ଲକ୍ଷ ବେଲପତ୍ର ଲାଗି କରାଯାଇଛି। ରବିବାର ପ୍ରାୟ ୮୦ ଶ୍ରଦ୍ଧାଳୁ ଭବାନୀପାଟଣାଠାରୁ ପାଞ୍ଚ କିଲୋମିଟର ଦୂରରେ ଥିବା ଗୁଣ୍ଡି ଡଙ୍ଗରକୁ ଯାଇ ଭୋର ଅପରାହ୍ନ ୫ଟା ଯାଏ ଏହି ବେଲପତ୍ର ସଂଗ୍ରହ କରିଥିଲେ। ମନ୍ଦିରର ମଣ୍ଡପରେ ବେଲପତ୍ର ଗଣତି ହେବା ପରେ ସୋମବାର ଭୋରରୁ ଭବାନୀଶଙ୍କରଙ୍କ ନିତି ଆଳତି ପରେ ଏକଲକ୍ଷ ବେଲପତ୍ର ଲାଗି କରାଯାଇଥିଲା। ଏକଲକ୍ଷ ବେଲପତ୍ର ଲାଗି ବାବାଙ୍କର ବଡସିଂହାର ବେଶ ଦର୍ଶନ କରିବା ଲାଗି ଦିନ ତମାମ ମନ୍ଦିରରେ ଶ୍ରଦ୍ଧାଳୁମାନଙ୍କର ଭିଡ ଦେଖିବାକୁ ମିଳିଥିଲା।
