ଟିଟିଲାଗଡ଼, ୧୧।୬ (ଡି.ଏନ.ଏ)-ବଲାଙ୍ଗୀର ଜିଲା ଟିଟିଲାଗଡ ବ୍ଲକ ବିନେକେଲା ପଞ୍ଚାୟତର ସରପଞ୍ଚ ହରି ମାଝୀ ବୁଧବାର ବ୍ଲକ କାର୍ଯ୍ୟାଳୟ ପରିସରରେ ଆକ୍ରମଣର ଶିକାର ହୋଇଛନ୍ତି। ବିଡିଓଙ୍କ ସହ ସେ ଆଲୋଚନା କରୁଥିବା ବେଳେ ବ୍ଲକ ପଡାର ସୁନୀଲ ବିଶ୍ୱାଳ ନାମକ ଯୁବକ ତାଙ୍କୁ ଗାଳିଗୁଲଜ ସହ ମାରଧର କରିଥିବା ଗୁରୁବାର ସରପଞ୍ଚ ଟିଟିଲାଗଡ ଥାନାରେ ଅଭିଯୋଗ କରିଛନ୍ତି। ବିଡିଓ ନବୀନ ଚନ୍ଦ୍ର ନାୟକ ଏନେଇ ଟିଟିଲାଗଡ ଏସଡିପିଓଙ୍କ ଦୃଷ୍ଟି ଆକର୍ଷଣ କରିଛନ୍ତି। ଗୁରୁବାର ବ୍ଲକ ସରପଞ୍ଚ ସଂଘ ସଭାପତି ବୀରବର ସାହୁ, ସମ୍ପାଦକ ହରିନାରାୟଣ ମିଶ୍ର, ଉପଦେଷ୍ଟା ଦୟାରାମ ଅଗ୍ରୱାଲ, ଗୋଲକବିହାରୀ ସିଂଭୋଇ, ଗୌରୀ ହିଆଲ, ଆଦିବାସୀ ସଂଘ ବ୍ଲକ ସଭାପତି ଚୈତନ୍ୟ ମାଝୀ, ନଗର ସଭାପତି ନିତ୍ୟାନନ୍ଦ ମାଝୀ, ଇନ୍ଦ୍ରମଣୀ ମାଝୀ, ଜଗନ୍ନାଥ ମାଝୀ, ଘାସିରାମ ମାଝୀ ପ୍ରମୁଖ ଥାନାକୁ ଯାଇ ଲିଖିତ ଅଭିଯୋଗ କରିଛନ୍ତି। ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବ୍ଲକ ସରପଞ୍ଚ ସଂଘ ଓ ଆଦିବାସୀ ସଂଘ ଦାବି କରିଛି। ଏ ନେଇ ଥାନାରେ ଏକ ମାମଲା (ନ.୯୨/୨୦)ରୁଜୁ ହୋଇଛି।
