ନୂଆଦିଲ୍ଲୀ,୧୩।୧୨(ପି.ଟି.)- ଓ୍ବେଷ୍ଟଇଣ୍ଡିଜ ଅଲରାଉଣ୍ଡର ଡ୍ବେନ ବ୍ରାଭୋ ଅନ୍ତର୍ଜାତୀୟ କ୍ରିକେଟକୁ ଫେରିବା ନେଇ ଶୁକ୍ରବାର ଘୋଷଣା କରିଛନ୍ତି। ପ୍ରାୟ ଏକ ବର୍ଷ ତଳେ ଦେଶର ବୋର୍ଡ ସହ ମନାନ୍ତର ପରେ ଅବସର ଘୋଷଣା କରିଥିଲେ। ଓ୍ବେଷ୍ଟଇଣ୍ଡିଜ କ୍ରିକେଟ ବୋର୍ଡ (ଡବ୍ଲ୍ୟୁଆଇସିବି) ନିଜ ନିୟମରେ ପରିବର୍ତ୍ତନ କରିବା ପରେ ସେ ଏହି ନିଷ୍ପତ୍ତି ନେଇଥିବା କହିଛନ୍ତି। ପୂର୍ବତନ ଟିମ୍ ମ୍ୟାନେଜର ରିକି ସ୍କରିଟ୍ଟ ଏବେ ବୋର୍ଡର ସଭାପତି ଅଛନ୍ତି। ପ୍ରଶାସନିକ ସ୍ତରରେ ପରିବର୍ତ୍ତନ ପରେ ମୁଁ ଏହି ନିଷ୍ପତ୍ତି ନେଇଛି ବୋଲି ୩୬ ବର୍ଷୀୟ ଅଲରାଉଣ୍ଡର କହିଛନ୍ତି। ସୂଚନାଥାଉ କି, ପୂର୍ବତନ ଡବ୍ଲ୍ୟୁଆଇସିବି ମୁଖ୍ୟ ଡେଭ କାମରୋନଙ୍କ ସହ ମନାନ୍ତର ପରେ ବ୍ରାଭୋଙ୍କ ନେତୃତ୍ୱାଧୀନ ଓ୍ବେଷ୍ଟଇଣ୍ଡିଜ ଦଳ ୨୦୧୪ରେ ଭାରତ ବିପକ୍ଷ ସିରିଜ୍ ଅଧାରୁ ଫେରିଯାଇଥିଲା। ୨୦୧୮ରେ ଅବସର ନେଇଥିଲେ ମଧ୍ୟ ସେ ଅନ୍ତିମ ଥର ୨୦୧୬ ସେପ୍ଟେମ୍ବରରେ ଅନ୍ତର୍ଜାତୀୟ କ୍ରିକେଟ ଖେଳିଥିଲେ। ଏପର୍ଯ୍ୟନ୍ତ ସେ ଓ୍ବେଷ୍ଟଇଣ୍ଡିଜ ପାଇଁ ୪୦ ଟେଷ୍ଟ, ୧୬୪ ଦିନିକିଆ ଓ ୬୬ ଟି୨୦ ମ୍ୟାଚ୍ ଖେଳି ସାରିଛନ୍ତି।
