ତେଲକୋଇ, ୭।୧୧(ଡି.ଏନ.ଏ.)-ତେଲକୋଇ ବନାଞ୍ଚଳ ଅଧୀନରେ ରାଇସୁଆଁ ପଞ୍ଚାୟତର କୁଳଙ୍ଗ ଗ୍ରାମର ଖେସରା ଜଙ୍ଗଲ ମଧ୍ୟରେ ଚାଲିଛି ବେଆଇନ ଭାବେ ମାଙ୍କଡା ପଥର ଖନନ। ମାଙ୍କଡା ପଥର ଖନନ ଯୋଗୁ ଜଙ୍ଗଲ ଅଞ୍ଚଳରେ ପୋଖରୀ ସଦୃଶ୍ୟ ଗାତ ସୃଷ୍ଟି ହେବା ଯୋଗୁ ଗ୍ରାମର ଗୃହପାଳିତ ପଶୁମାନଙ୍କ ପାଇଁ ଉକ୍ତ ଅଞ୍ଚଳ ବିପଦ ସୃଷ୍ଟି କରିଛି। ଏନେଇ କୁଳଙ୍ଗ ଗ୍ରାମବାସୀ ବନାଞ୍ଚଳ ଅଧିକାରୀଙ୍କ ଠାରେ ଅଭିଯୋଗ କରିବା ସହିତ ଜିଲାପାଳଙ୍କ ଠାରେ ଅଭିଯୋଗ କରିଛନ୍ତି। ଗ୍ରାମବାସୀଙ୍କ ଅଭିଯୋଗ ଅନୁଯାୟୀ ଉକ୍ତ ଜଙ୍ଗଲ ମଧ୍ୟରେ ତେଲକୋଇ ବନାଞ୍ଚଳ ଅଧିକାରୀ ଏକ ଫରେଷ୍ଟ ବିଟର ଫରେଷ୍ଟରଙ୍କ ଜାଣତରେ ଏହ ଜଙ୍ଗଲରେ ମାଙ୍କଡାପଥର ଖନନର ଯୋଜନା କରାଯାଉଥିବା ଯୋଗୁ ଜଙ୍ଗଲ ଅଞ୍ଚଳର ମୂଲ୍ୟବାନ ଗଛଲତା ସହିତ ପରିବେଶ ନଷ୍ଟ ହେବାରେ ଲାଗିଛି । ସେହିପରି ଏହି ବେଆଇନ ମାଙ୍କଡା ପଥର ଖନନ ବ୍ୟବସାୟୀ ତେଲକୋଇ ବ୍ଲକ ସମେତ ଢେଙ୍କାନାଳ ଜିଲା କଙ୍କଡାହାଡ ବ୍ଲକ ଅଧୀନ ବିଭିନ୍ନ ଗ୍ରାମକୁ ପଥର ଯୋଗାଣ କରୁଥିବା ଦର୍ଶାଇଛନ୍ତି। ଏସମ୍ପର୍କରେ ବନାଞ୍ଚଳ ଅଧିକାରୀ ପ୍ରମୋଦ କୁମାର ସେଠୀଙ୍କୁ ପଚାରିବାରୁ ମୁଁ ନିଜେ ଆଜି ତଦନ୍ତରେ ରହିବା ସହିତ ପଥର ଖନନ ମାଫିଆଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।
