ଛତ୍ରପୁର,୨୯ା୨(ଡି.ଏନ.ଏ) – ଛତ୍ରପୁର ଥାନା ଅନ୍ତର୍ଗତ ପାଲିଆ ଛତ୍ରପୁରସ୍ଥିତ ଘରୁ ବୃନ୍ଦାବନ ବେହେରା ଏବଂ ତାଙ୍କ ସ୍ତ୍ରୀ ଉର୍ମିଳା ଓ ଝିଅ ସୁନିତାଙ୍କ ମୃତଦେହ ବୁଧବାର ସକାଳେ ଉଦ୍ଧାର ହୋଇଥିଲା। ପାରିବାରିକ ଅଶାନ୍ତିରୁ ବୃନ୍ଦାବନ ପ୍ରଥମେ କାତିରେ ସ୍ତ୍ରୀ ଓ ଝିଅଙ୍କୁ ହତ୍ୟା କରିବା ପରେ ନିଜେ ଆମତ୍ହତ୍ୟା କରିଥିତ୍ବା ପ୍ରାଥମିକ ତଦନ୍ତରୁ ପୋଲିସ ଜାଣିପାରିଛି। ଅନ୍ୟପକ୍ଷରେ ବୃନ୍ଦାବନଙ୍କ ଘରେ ଗୁରୁବାର ଅପରାହ୍ନରୁ ତାଲା ପଡିଛି। ଫଳରେ ତାଙ୍କ ୭୦ ବଷର୍ର୍ୀୟା ମା’ ଚମ୍ପା ବେହେରା ଏବେ ଅସହାୟ ହୋଇପଡିଛନ୍ତି। ବୃନ୍ଦାବନଙ୍କ ପୁଅ ସାଗର ଘରେ ତାଲା ପକାଇ ଚାଲି ଯାଇଥିବାରୁ ମା’ ଚମ୍ପା ଗାଁରେ କେତେବେଳେ କେମିତି କାହା ଘରେ ମୁଠାଏ ଖାଇବା ସହ ମୁଣ୍ଡ ଗୁଞ୍ଜିବାକୁ ବାଧ୍ୟ ହେଉଛନ୍ତି। ଶୁକ୍ରବାର କୋହଭରା କଣ୍ଠରେ ସେ ରାଜରାସ୍ତାକୁ ଚାଲିଆସିଥିବା କହିଥିଲେ। ସେ ଆହୁରି କହିଛନ୍ତି ଯେ, ଘରେ ସବୁବେଳେ ଅଶାନ୍ତି ଲାଗି ରହୁଥିଲା। ମୋତେ ବୋହୂ ଉର୍ମିଳା ସବୁବେଳେ ମାରପିଟ୍ କରୁଥିଲେ। ଏହାକୁ ସହ୍ୟ କରି ନ ପାରି ଗତ ୫ ବର୍ଷ ହେଲା ମୁଁ କେତେବେଳେ ମୋ ଝିଅ ଓ ଅନ୍ୟ କେତେବେଳେ ସାନ ପୁଅ ଘରେ ରହୁଛି। ପୁଅ, ବୋହୂ ଓ ନାତୁଣି ମୃତ୍ୟୁ ଖବର ଶୁଣି ସାନପୁଅ ସହ କଟକରୁ ଗାଁକୁ ଆସିଲି। ମାତ୍ର ବଡ଼ ପୁଅ ବୃନ୍ଦାବନ, ବୋହୂ ଓ ନାତୁଣିଙ୍କ ମୃତ୍ୟୁ ପରେ ଘରେ ତାଲା ପଡିଥିବାରୁ ଏବେ କେଉଁଠି ରହିବି ବୋଲି ଚିନ୍ତାରେ ପଡ଼ିଥିବା କହିିଛନ୍ତି। ବୋହୂ ଓ ତାଙ୍କ ମା’ ଘରର ସର୍ମ୍ପର୍କିୟଙ୍କ ଯୋଗୁ ଏପରି ଅଘଟଣ ଘଟିଥିବା ଚମ୍ପା କହିଛନ୍ତି। ଆଗାମୀ ଦିନରେ ଆଇନ୍୍ର ଆଶ୍ରୟ ନେବେ ବୋଲି ମଧ୍ୟ ସେ କହିଥିଲେ। ତାଙ୍କର କହିବାନୁଯାୟୀ ବୁଧବାର ରାତିରେ ମୃତଦେହ ଦାହ ପରେ ଘରେ ତାଲା ପଡିଥିଲା। ଶୁକ୍ରବାର ସକାଳୁ ଆସି ତାଲା ଖୋଲାଯାଇଥିଲା। ପରେ ଅପରାହ୍ନରେ ପୁଣି ଘରେ ତାଲା ପକାଇ ସମସ୍ତେ ଚାଲିଯାଇଥିବା ଚମ୍ପା କହିଛନ୍ତି। ବୃନ୍ଦାବନ ଗାଁର ଆଉ ଏକ ସାହିରେ ଦୋକାନ କରି ପରିବାର ଚଳାଉଥିଲେ। ସ୍ବାମୀ ଓ ସ୍ତ୍ରୀ ପାଳି କରି ଦୋକାନ ଚଳାଉଥିଲେ। ପରେ ସେମାନଙ୍କ ମଧ୍ୟରେ ଅଶାନ୍ତି ଦେଖାଦେଇଥିଲା। ତେଣୁ କିଛିମାସ ହେଲା କେବଳ ବୃନ୍ଦାବନ ଦୋକାନରେ ବସୁଥିଲେ। ଏପରିକି ବୃନ୍ଦାବନ ଛତ୍ରପୁର ଆସି ଦିନବେଳା ଆହାର କେନ୍ଦ୍ରରେ ୫ ଟଙ୍କା ଦେଇ ଭାତ ଡାଲମା ଖାଉଥିଲେ ବୋଲି ଗାଁର କେତେକ ଲୋକଙ୍କ ସହ ଆଲୋଚନା ବେଳେ ଜଣାପଡିଛି। ଅପରପକ୍ଷରେ ବୃନ୍ଦାବନଙ୍କ ପୁଅ ବର୍ତ୍ତମାନ ସୁଦ୍ଧା ଗଣମାଧ୍ୟମ ଆଗରେ ମୁହଁ ଖୋଲି ନ ଥିବାବେଳେ ବଡ ଝିଅ ସୁଜ୍ଞାନୀ ତାଙ୍କ ବାପାଙ୍କ ବିରୋଧରେ କହିବା ସହ ବାପା ହିଁ ସର୍ବଦା ଘରେ ଅଶାନ୍ତି ସୃଷ୍ଟି କରୁଥିଲେ ବୋଲି କହିଥିଲେ।
