ବିଞ୍ଝାରପୁର,୧୩ା୯(ଡି.ଏନ୍.ଏ.): ଯାଜପୁର ଜିଲା ବିଞ୍ଝାରପୁର ବ୍ଲକ ଅନ୍ତର୍ଗତ ହଳଦୀଢିହ ଗ୍ରାମପଞ୍ଚାୟତ ଅଣ୍ଢାଳୋଠାରେ ୨୦୧୭ରେ ନଇଆ ନାଳରେ ବେଆଇନ ଆଡିବନ୍ଧକରି ମାଛଧରାକୁ କେନ୍ଦ୍ରକରି ଗଣ୍ଡଗୋଳ ହୋଇଥିଲା। ଏଥିରେ ଜଣେ ବୃଦ୍ଧଙ୍କୁ ପିଟିପିଟି ହତ୍ୟା କରାଯାଇଥିଲା। ଏହି ଘଟଣାର ୨ ବର୍ଷ ପରେ ବୁଧବାର ରାତିରେ ପୋଲିସ ୩ ଜଣ ଅଭିଯୁକ୍ତଙ୍କୁ ଗିରଫ କରିଛି। ସେମାନେ ହେଲେ ଅଣ୍ଢାଳୋ ଗ୍ରାମର ବାବୁଲି ମଲ୍ଲିକ, ସଦାନନ୍ଦ ମଲ୍ଲିକ ଓ ଧନୀ ମଲ୍ଲିକ। ଘଟଣା ପରଠାରୁ ଅଭିଯୁକ୍ତମାନେ ଫେରାର ଥିଲେ। ଯାଜପୁର ଏସ୍ଡିପିଓ ରବୀନ୍ଦ୍ର କୁମାର ଯେନା ଅଭିଯୁକ୍ତମାନେ ଅଣ୍ଢାଳୋ ଗ୍ରାମରେ ଥିବା ବୁଧବାର କୌଣସି ସୂତ୍ରରୁ ଖବର ପାଇ ଥାନା ଅଧିକାରୀଙ୍କୁ ଗିରଫ ପାଇଁ ନିର୍ଦ୍ଦେଶ ଦେଇଥିଲେ। ବିଳମ୍ବିତ ରାତିରେ ଗ୍ରାମରେ ଥାନା ଅଧିକାରୀ ସଦଳବଳ ଚଢ଼ାଉ କରି ଅଭିଯୁକ୍ତମାନଙ୍କୁ ଗିରଫ କରିଥିଲେ। ସେମାନଙ୍କୁ ଶୁକ୍ରବାର କୋର୍ଟ ଚାଲଣ କରାଯିବ ବୋଲି ପୋଲିସ ପକ୍ଷରୁ ସୂଚନା ମିଳିଛି। ପୂର୍ବରୁ ଏହି ଘଟଣାରେ ପୋଲିସ ୮ ଜଣଙ୍କୁ କୋର୍ଟ ଚାଲାଣ କରିଛି।
ପ୍ରକାଶ ଯେ, ହଳଦୀଢିହ ଗ୍ରାମପଞ୍ଚାୟତ ଦେଇ ନଇଆ ନାଳ ପ୍ରବାହିତ ହେଉଛି। ଏହି ନାଳର ଉପରମୁଣ୍ଡରେ ବେଆଇନ ଆଡିବନ୍ଧକୁ ନେଇ ଅଣ୍ଢାଳୋ ଏବଂ ତଳମୁଣ୍ଡରେ ଥିବା ଫଳପୁର ଗ୍ରାମବାସୀଙ୍କ ମଧ୍ୟରେ ଅନେକ ସମୟରେ ବିବାଦ ଲାଗିରହିଥିଲା। ଏହି ବିବାଦରୁ ୨୦୧୭ ଅକ୍ଟୋବର ୧୦ ସକାଳେ ଫଳପୁର ଗ୍ରାମର କେଶବ ମଲ୍ଲିକ ଆଖି ପରୀକ୍ଷା ପାଇଁ କେନ୍ଦ୍ରାପଡା ଜିଲା ଅନ୍ତର୍ଗତ ଗୋବିନ୍ଦପୁରକୁ ଯାଉଥିଲେ। ହେଲେ ସିଂହପୁର-ଫଳପୁର ଆର୍ଡି ରାସ୍ତାର ଅଣ୍ଢାଳୋ ନିକଟରେ ଅଣ୍ଢାଳୋ ଗ୍ରାମର ୧୫ରୁ ଊର୍ଦ୍ଧ୍ୱ ଗ୍ରାମବାସୀ ତାଙ୍କୁ ଅଟକାଇ ମାଡ ମାରିଥିଲେ। ଗୁରୁତର ଅବସ୍ଥାରେ ତାଙ୍କୁ ନିକଟସ୍ଥ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କର ମୃତ୍ୟୁ ହୋଇଥିଲା। ଏ ନେଇ ପୋଲିସ ଏହି ଘଟଣାକୁ ନେଇ ବିଞ୍ଝାରପୁର ପୋଲିସ ଏକ ମାମଲା (ନଂ.୩୧୯/୧୭) ରୁଜୁକରି ତଦନ୍ତ ଚଳାଇଥିଲା।
