ବିସ୍ଥାପିତଙ୍କୁ ଥଇଥାନ ନାହିଁ
7:44 amOctober 3, 2019 / 21

ହାଟଡିହି, ୩।୧୦(ଡି.ଏନ.ଏ.)- କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ହାଟଡିହୀ ବ୍ଲକରେ ବଣପାହାଡ ଘେରାରେ ଆଦିବାସୀ ଅଧ୍ୟୁଷିତ କେ.ବାଲିପାଳ(କଅଁଳେଇବାଲିପାଳ) ପଞ୍ଚାୟତ ଅବସ୍ଥିତ। ସୂଚନା ମୁତାବକ ମୟୂରନଚା ଗ୍ରାମର ୨ଟି ଓ୍ବାର୍ଡର ୧୫୦ ପରିବାର, କେବାଲିପାଳ ଗ୍ରାମ ଗୋଟିଏ ଓ୍ବାର୍ଡର ୯୦ ପରିବାର, ରାଇଘାଟି ଗ୍ରାମର ୩ଟି ଓ୍ବାର୍ଡର ୨୦୦ ପରିବାର, ସରମୁଣ୍ଡୀ ଗ୍ରାମ ଗୋଟିଏ ଓ୍ବାର୍ଡର ୫୦ ପରିବାର, ଭଅଁରା ଗ୍ରାମ ଗୋଟିିଏ ଓ୍ବାର୍ଡର ୯୦ ପରିବାର, ମଲ୍ଲିପଶିର ୧୫୦ ପରିବାର, ନୂଆବାଲିପାଳ ଗ୍ରାମ ୨ଟି ଓ୍ବାର୍ଡର ୧୫୦ ପରିବାର ମୋଟ ୭ଟି ଗ୍ରାମର ୧୧ଟି ଓ୍ବାର୍ଡ ପଞ୍ଚାୟତ ଅଧୀନରେ ଅଛି ା ଜନସଂଖ୍ୟା ପ୍ରାୟ ୬ ହଜାରରୁ ଊର୍ଦ୍ଧ୍ୱ ହେବ ା ୧୯୬୫ ମସିହାରେ ସାଳନ୍ଦୀ ନଦୀରେ ହଦଗଡ ଡ୍ୟାମ ନିର୍ମାଣ ପାଇଁ ନୋଟିଫିକେଶନ ହୋଇଥିବାବେଳେ ୧୯୭୦ରେ ଡ୍ୟାମ ନିର୍ମାଣ କାର୍ଯ୍ୟ ହୋଇଥିଲା। ଫଳରେ ଉକ୍ତ ପଞ୍ଚାୟତର ମୟୂରନଚା, କେବାଲିପାଳ, ସରମୁଣ୍ଡି, ମଲ୍ଲିପଶି, ଭଅଁରା ପ୍ରଭୃତି ୫ଟି ଗ୍ରାମକୁ ବୁଡି ଅଞ୍ଚଳ ଭାବେ ଘୋଷଣା କରାଯାଇଥିଲା। ଯାହାଦ୍ୱାରା କି ପ୍ରାୟ ୫୦୦ରୁ ଊର୍ଦ୍ଧ୍ୱ ପରିବାର ବିସ୍ଥାପିତ ହୋଇଥିଲେ। ସେମାନଙ୍କର ଜମିସବୁ ଜଳସେଚନ ରେକର୍ଡକୁ ଚାଲିଗଲା ା ହଜାର ହଜାର ଲୋକ ନାନା ଦୁର୍ଦ୍ଦଶାର ସମ୍ମୁଖୀନ ହେବା ସହ ବାସଚ୍ୟୁତ ମଧ୍ୟ ହେଲେ ା ଇତିମଧ୍ୟରେ ୫୪ ବର୍ଷ ବିତି ସାରିଛି ା ମାତ୍ର ଘୁଞ୍ଚିପାରିନି ବିସ୍ଥାପିତଙ୍କ ଦୁଃଖ। ସେମାନଙ୍କୁ ଥଇଥାନ କରାଯାଇ ନ ଥିବା ବେଳେ କ୍ଷତିପୂରଣ ବି ମିଳିନି ା
ମୌଳିକ ସୁବିଧା ପାଇବାରୁ ଏମାନେ ବଞ୍ଚିତ ହୋଇଛନ୍ତି। ଗମନାଗମନ କ୍ଷେତ୍ରରେ ରାସ୍ତା ଖଣ୍ଡିଏ ନ ଥିବା ବେଳେ ବିଜୁଳି ସାତସପନ ପାଲଟିଛି ା ଉକ୍ତ ଅଞ୍ଚଳକୁ ଜଳପଥରେ ସାଳନ୍ଦୀ ନଈ ପାର ହୋଇ ଡଙ୍ଗାରେ ଯିବାକୁ ପଡେ। ଏପରିକି ଡଙ୍ଗାରେ ଯାତାୟାତ ସମୟରେ ନଦୀରେ ବୁଡି ପ୍ରାଣ ହରାଇଥିବାର ଉଦାହରଣ ବି ରହିଛି। ସ୍ଥଳ ପଥରେ ଯିବାକୁ ହେଲେ ମୟୂରଭଞ୍ଜ ଜିଲାର ଠାକୁରମୁଣ୍ଡା କିମ୍ବା ବାଲେଶ୍ୱର ଜିଲାର ଔପଦା ଦେଇ ଦୀର୍ଘ ୧୦୦ କି.ମି.ରୁ ଊର୍ଦ୍ଧ୍ୱ ରାସ୍ତା ଅତିକ୍ରମ କରିବାକୁ ପଡିଥାଏ। ପାନୀୟ ଜଳ ବ୍ୟବହାର କଥା ନ କହିଲେ ଭଲ। ପାଣି ପାଇଁ ବହୁ ଅସୁବିଧାର ସମ୍ମୁଖୀନ ହେଉଥିବାରୁ ନାଳ ଓ ଝରଣା ପାଣିକୁ ବ୍ୟବହାର କରନ୍ତି। ରାଇଘାଟି, ମଲ୍ଲିପଶି ଓ ନୂଆବାଲିପାଳଠାରେ ୩ଟି ଯୋଗାଣ ସାମଗ୍ରୀ କେନ୍ଦ୍ର ଖୋଲାଯାଇଛି ା କିନ୍ତୁ ପୂର୍ବରୁ ଲୋକମାନେ ଜଳ ପଥରେ ଆସି ଯୋଗାଣ ସାମଗ୍ରୀ ନେଉଥିଲେ ା ଗତ ୨୦୧୨-୧୩ ରେ କେବଳ ମୟୂରନଚା ଗ୍ରାମର ୨୩ଟି ପରିବାରକୁ ଜଙ୍ଗଲ ଜମି ପଟ୍ଟା ଓ ଇନ୍ଦିରାଆବାସ ଗୃହ ପ୍ରଦାନ କରାଯାଇଛି ା ସେହିପରି ଭଅଁରା ଗ୍ରାମର ୨୦ ରୁ ୨୫ ଟି ପରିବାରକୁ ରାଇଘାଟି ମୌଜାରେ ୪ ଡେସିମିଲ ଲେଖାଏ ଜାଗା ରାଜସ୍ବ ବିଭାଗ ଦେଇଛି ା ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ନିଜର ଗୁଜରାଣ ମେଣ୍ଟା ଯାଉଥିବା ବେଳେ କର୍ମ ନିୟୋଜନ ପନ୍ଥା ସୃଷ୍ଟି ହୋଇପାରିନି ା ସ୍ବାସ୍ଥ୍ୟ ସେବା ଅପହଞ୍ଚ ହୋଇପଡିଥିବା ବେଳେ ଶିକ୍ଷାର ମାନେ ବି ବୁଝାପଡୁନି ା ମାଟି ଝୁମ୍ପୁଡି ଭଙ୍ଗା ଘରେ ଦହଗଞ୍ଜରେ ଜୀବନ ବିତୁଥିବା ବେଳେ ବହୁ ଲୋକ ଏବେ ବି ବିଭିନ୍ନ ସରକାରୀ ଯୋଜନାରେ ସାମିଲ ହେବାରେ ବ୍ୟତିକ୍ରମ ଦେଖାଦେଇଛି।