ନୂଆଦିଲ୍ଲୀ,୨୦।୫(ପି.ଟି.): ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଏବେ ନୂଆ ଚିଫ୍ ଫାଇନାନ୍ସିଆଲ ଅଫିସର (ସିଏଫ୍ଓ) ନିଯୁକ୍ତି କରିବାର ସମ୍ଭାବନା ନାହିଁ। ୬ ମାସ ପୂର୍ବରୁ ସନ୍ତୋଷ ରାନଗ୍ନେକର ଇସ୍ତାଫା ଦେଇଥିଲେ ମଧ୍ୟ ନିକଟ ଭବିଷ୍ୟତ ଏହି ପଦରେ କାହାକୁ ନିଯୁକ୍ତି ଦିଆଯିବ ନାହିଁ ବୋଲି ସ୍ପଷ୍ଟ କରାଯାଇଛି।
ତାଙ୍କ ଇସ୍ତଫା ଗ୍ରହଣ କରିବାକୁ ବିସିସିଆଇ ମୁଖ୍ୟ କାର୍ଯ୍ୟନିର୍ବାହୀ ରାହୁଲ ଜୋହରୀଙ୍କୁ କୁହାଯାଇଥିଲା। ଜାରି ହୋଇଥିବା ନୂଆ ସମ୍ବିଧାନରେ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀଙ୍କ ଦାୟିତ୍ୱ ସମ୍ପର୍କରେ ଉଲ୍ଲେଖ କରାଯାଇଛି। ତେବେ ସିଏଫ୍ଓଙ୍କ ସମ୍ପର୍କରେ କିଛି ବି ଉଲ୍ଲେଖ କରାଯାଇନାହିଁ ବୋଲି ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି। ଜଣେ କୋଷାଧ୍ୟକ୍ଷ ଦାୟିତ୍ୱରେ ରହିଥିବା ବେଳେ ଏଭଳି ପଦର ଆବଶ୍ୟକତା ନାହିଁ ବୋଲି କୁହାଯାଇଛି। ସେତେବେଳେ କୋଷାଧ୍ୟକ୍ଷଙ୍କୁ ଜାଣିଶୁଣି ଅଣଦେଖା କରିବା ପାଇଁ ପ୍ରଶାସକ କମିଟି (ସିଓଏ) ରାନ୍ଗ୍ନେକରଙ୍କୁ ନିଯୁକ୍ତି ଦେଇଥିଲା। ବୋର୍ଡରେ ଥରେ ଗଣତାନ୍ତ୍ରିକ ପ୍ରକ୍ରିୟା ଆରମ୍ଭ ହେଲେ ସିଏଫ୍ଓ ପଦ ନିରର୍ଥକ ସାବ୍ୟସ୍ତ ହେବ। ଏବେ ବୋର୍ଡ ଆର୍ଥିକ ସମସ୍ୟା ଦେଇ ଗତିକରୁଥିବା ବେଳେ ଆଉ ଜଣେ ଉଚ୍ଚ ଦରମାପ୍ରାପ୍ତ ଅଧିକାରୀ ନିଯୁକ୍ତି ଦେବ ବୋଲି ଆଶା କରାଯାଉନାହିଁ। ସିଏଫ୍ଓଙ୍କ ଦାୟିତ୍ୱ ଅରୁଣ ଧୁମାଲ ଓ ମୁଖ୍ୟ କାର୍ଯ୍ୟନିର୍ବାହୀ ତୁଲାଇପାରିବେ।
ବିସିସିଆଇ ଓ କ୍ରୀଡ଼ା ପୋଷାକ ଉତ୍ପାଦନକାରୀ ସଂସ୍ଥା ନାଇକ୍ ମଧ୍ୟରେ ହୋଇଥିବା ଚୁକ୍ତି ଅବଧି ଖୁବ୍ଶୀଘ୍ର ଶେଷ ହେବାକୁ ଯାଉଛି। ଫଳରେ ବୋର୍ଡ ଏ ନେଇ ଟେଣ୍ଡର ଡାକିବା ପ୍ରକ୍ରିୟା ଆରମ୍ଭ କରିବ। ୨୦୦୬ ଓ ୨୦୧୬ରେ ନାଇକ୍ ବୋର୍ଡ ପାଇଁ ପ୍ରାୟୋଜକ ଥିଲା। ଏହାପରେ ପୁଣି ୫ ବର୍ଷ ପାଇଁ ଏହି ଚୁକ୍ତିର ନବୀକରଣ ହୋଇଥିଲା। ଏହି ଚୁକ୍ତି ଆଗାମୀ ସେପ୍ଟେମ୍ବର ୩୦ ତାରିଖରେ ଶେଷ ହେବାକୁ ଯାଉଛି। ଚୁକ୍ତି ନବୀକରଣ ନ କରି ବିସିସିଆଇ ସ୍ବଚ୍ଛତା ଅବଲମ୍ବନ ପୂର୍ବକ ଟେଣ୍ଡର ପ୍ରକ୍ରୟା ଆରମ୍ଭ କରିବ ବୋଲି ଆଶା କରାଯାଉଛି।
