ୱାଶିଂଟନ,୫ ।୪: କରୋନା ସଂକ୍ରମଣ ଏବେ ବିଶ୍ୱର ପ୍ରାୟ ୧୮୦ ଦେଶରେ ତା’ର କାୟା ବିସ୍ତାର କରିସାରିଥିବା ବେଳେ ଆମେରିକା ଭଳି ଶକ୍ତିଶାଳୀ ଦେଶ ବି କରୋନା ଆଗରେ ଯେମିତି ମୁଣ୍ଡ ନୁଆଇଁ ଦେଇଛି । ୟୁରୋପ ମଧ୍ୟ ଏବେ କରୋନାର ଆଉ ଏକ ଠିକଣା ପାଲଟି ଯାଇଛି । ଚାଇନାରୁ ଆରମ୍ଭ ହୋଇଥିବା ଏହି କରୋନା ସଂକ୍ରମଣ ଏବେ ବିଶ୍ୱ ପାଇଁ ଚିନ୍ତାର କାରଣ ହୋଇଥିବା ବେଳେ ଏମିତି କିଛି ସ୍ଥାନ ରହିଛି ଏପର୍ଯ୍ୟନ୍ତ ସେଠାରେ କୌଣସି ଗୋଟିଏ ବି କରୋନା ସଂକ୍ରମଣ ଦେଖାଯାଇ ନ ଥିବା କୁହାଯାଏ । ଆମେରିକାର ଜନ୍ ହପକିନ୍ସ ୟୁନିଭର୍ସିଟିର ଏକ ରିପୋର୍ଟରୁ ଏହା ଜଣାପଡିଛି । ଉକ୍ତ ରିପୋର୍ଟ ଅନୁଯାୟୀ ବିଶ୍ୱର ପ୍ରାୟ ୪୦ଟି ସ୍ଥାନରେ କୌଣସି କରୋନା ସଂକ୍ରମଣ ଦେଖାଯାଇନାହିଁ । ଏଥିମଧ୍ୟରେ ଜନବସତି ଅଞ୍ଚଳ, ଆଇଲ୍ୟାଣ୍ଡ ଓ ଘନ ଜଙ୍ଗଲ ଅଞ୍ଚଳ ରହିଛି ବୋଲି କୁହାଯାଇଛି । ପ୍ରଶାନ୍ତ ମହାସାଗରରେ ଥିବା ଦ୍ୱୀପ ତୁବାଲିରେ କେହି କରୋନା ସଂକ୍ରମିତ ନ ଥିବା ଉକ୍ତ ରିପୋର୍ଟ କହିଛି । ସେହିପରି ପୂର୍ବ ସୋଭିଏତ୍ ରିପବ୍ଲିକ୍ ଦେଶ ତୁର୍କମେନିସ୍ତାନରେ ମଧ୍ୟ କରୋନା ସଂକ୍ରମଣ ଦେଖାଯାଇ ନାହିଁ । ସେହିପରି ଆଦୌ ଜନବସତି ନ ଥିବା ଆଣ୍ଟାର୍କଟିକାରେ ମଧ୍ୟ କରୋନା ସଂକ୍ରମଣ ହୋଇ ନାହିଁ ବୋଲି କୁହାଯାଇଛି । ସେହିପରି ତାଜାକିସ୍ତାନ, ଟୋଙ୍ଗା, ୱେଷ୍ଟର୍ଣ୍ଣ ସାହାରା ଓ ୟମନରେ ଜଣେ ବି କରୋନା ସଂକ୍ରମଣ ହୋଇ ନ ଥିବା ଜଣାପଡିଛି । କାରଣ ସରକାରୀ ଭାବେ ଏଠାରେ କରୋନା ସଂକ୍ରମଣ ସମ୍ପର୍କରେ କୌଣସି ତଥ୍ୟ ଆସିନାହିଁ । ତେବେ ଉକ୍ତ ରିପୋର୍ଟ କହିଛି ଏହାର କାରଣ ହେଉଛି ଏସବୁ ସ୍ଥାନରେ ଜନସଂଖ୍ୟା ବହୁତ କମ୍ ଓ ଏହା ବିଶ୍ୱରୁ ଏକ ପ୍ରକାର ଅଲଗା ହୋଇ ରହିଛି । ଆଉ କେତେକ ସ୍ଥାନକୁ ବିମାନ ସେବା ନ ଥିବାରୁ ଓ ବାହାର ପର୍ଯ୍ୟଟକ ସହଜରେ ନ ପହଞ୍ଚିପାରିବାରୁ ଏଠାରେ କରୋନା ସଂକ୍ରମଣ ହୋଇନାହିଁ ବୋଲି କୁହାଯାଇଛି । ଉତ୍ତର କୋରିଆ ଓ ୟମନରେ କରୋନା ସଂକ୍ରମିତ ନ ମିଳିବା ପଛରେ କାରଣ ମଧ୍ୟ ରହିଛି । ଏବେବି ସେଠାରେ ଯୁଦ୍ଧ ପରିସ୍ଥିତି ଲାଗି ରହିଥିବାରୁ କରୋନା ଉପରେ କାହାର ଧ୍ୟାନ ନାହିଁ ବୋଲି କୁହାଯାଉଛି । ଏହା ସହ କିଛି ଆଫ୍ରିକୀୟ ଦେଶରେ ମଧ୍ୟ କରୋନା ସଂକ୍ରମଣ ଦେଖିବାକୁ ମିଳିନାହିଁ । ଏହାର ଆଉ ଏକ କାରଣ ହେଉଛି ସେଠାରେ କରୋନା ଟେଷ୍ଟ ପାଇଁ କୌଣସି ସୁବିଧା ନ ଥିବାରୁ ଏଠାରେ ଏପର୍ଯ୍ୟନ୍ତ କରୋନାକୁ ନେଇ କେହି ସଂକ୍ରମିତ ହେବାର ଖବର ଆସିନାହିଁ ବୋଲି କୁହାଯାଉଛି ।
