ଭୁବନେଶ୍ୱର,୨୮।୨(ବ୍ୟୁରୋ): ରାଜ୍ୟର ବିଭିନ୍ନ ଧର୍ମର ୨୩ଟି ତୀର୍ଥସ୍ଥଳୀର ବିକାଶ ପାଇଁ ଗୁରୁବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୩ କୋଟି ଟଙ୍କା ଅନୁମୋଦନ କରିଛନ୍ତି। ଏହି ଅର୍ଥ ସ୍ପେଶାଲ ପ୍ରୋବ୍ଲେମ ଫଣ୍ଡରୁ ଖର୍ଚ୍ଚ କରାଯିବ।
ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ ବରଗଡ ଜିଲାର ନୃସିଂହନାଥ ମନ୍ଦିର, ଭଦ୍ରକ ଜିଲାର ମା’ ଭଦ୍ରକାଳୀ, ବଲାଙ୍ଗୀରର ହରିଶଙ୍କର, ଢେଙ୍କାନାଳର ଶ୍ରୀଚନ୍ଦ୍ରଶେଖର ଜୀଉ ବିଜେ, ଜଗତ୍ସିଂହପୁରର ମା’ ଶାରଳା, ଯାଜପୁର ମା’ ବିରଜା, କେନ୍ଦୁଝରର ବଳଦେବ ଜୀଉ, କୋରାପୁଟର ଗୁପ୍ତେଶ୍ୱର ଏବଂ ନବରଙ୍ଗପୁରର ନୀଳକଣ୍ଠେଶ୍ୱର ମନ୍ଦିର ଉନ୍ନତୀକରଣ ପାଇଁ ୧ କୋଟି ଲେଖାଏ ଅନୁଦାନ ଘୋଷଣା କରାଯାଇଛି। ସେହିପରି ବଲାଙ୍ଗୀର ସିଏନଆଇ ଚର୍ଚ୍ଚ, ଖୋର୍ଦ୍ଧାର ବାପ୍ଟିଷ୍ଟ, କଟକ ମାଉଣ୍ଟ ହାଉସ, କଳାହାଣ୍ଡିର ସେଣ୍ଟ ପଲ୍ ପ୍ରୋଟେଷ୍ଟାଣ୍ଟ ଏବଂ ଭୁବନେଶ୍ୱରର ଚର୍ଚ୍ଚ ଅଫ ଖ୍ରୀଷ୍ଟକୁ ୧ କୋଟି ଲେଖାଏ ଅନୁଦାନ ଦେବାକୁ ଘୋଷଣା କରାଯାଇଛି। ସେହିପରି ପୁରୀର ଜାହାନାଇ ପୀର, ସୋନପୁରର ହାଜିର ଅବଦୁଲ ସକୁର ବାବା ତରଭା ସରିଫ, ଭଦ୍ରକର ଦରଘା-ଇ- ହଜୁର ମୁଜାହିଦ-ଇ- ମିଲାତ, ବାଲେଶ୍ୱରର ଭୁଜାଖିଆ ପୀର, ଭୁବନେଶ୍ୱରର ଜାମା ମସ୍ଜିଦ ଏବଂ ଖୋର୍ଦ୍ଧା ଜିଲାର ହଜରତ ବୁଖାରୀ ପୀର ବାବାଙ୍କ ମସ୍ଜିଦର ବିକାଶ ପାଇଁ ୧ କୋଟି ଲେଖାଏ ଏବଂ ସୁନ୍ଦରଗଡର ଗୁରୁସିଂ ସାହେବ ଗୁରୁଦ୍ୱାର ଏବଂ ପୁରୀ ଜିଲାର ବୌଳି ମଠ ପାଇଁ ୧ କୋଟି ଟଙ୍କା ଲେଖାଏ ଅନୁଦାନ ଦେବାକୁ ସରକାର ଘୋଷଣା କରିଛନ୍ତି।
