ଭୁବନେଶ୍ୱର, ୧୬।୭(ବ୍ୟୁରୋ): ରାଜ୍ୟରେ ଜଳବାୟୁ ପରିବର୍ତ୍ତନ ଜନିତ ସ୍ଥିତିର ମୁକାବିଲା ତଥା ସବୁଜୀକରଣ ପାଇଁ ବହୁ ମାତ୍ରାରେ ବୃକ୍ଷରୋପଣର ଆବଶ୍ୟକତା ରହିଛି। ତେଣୁ ରାଜ୍ୟ ସରକାର ବର୍ତ୍ତମାନ ବୃକ୍ଷରୋପଣକୁ ଅଧିକ ଗୁରୁତ୍ୱ ଦେଉଛନ୍ତି। ଜଙ୍ଗଲ ଓ ପରିବେଶ ବିଭାଗ ଏ ନେଇ ବିଭିନ୍ନ ପଦକ୍ଷେପ ହାତକୁ ନେଇଛି। ବିଭିନ୍ନ ପ୍ରକଳ୍ପ ବା ଯୋଜନା ଅଧୀନରେ ଆସୁଥିବା ବଜେଟ୍ରେ ଏହି ବୃକ୍ଷରୋପଣ କରାଯାଇଥାଏ। ତେବେ ଚଳିତ ୨୦୧୯-୨୦ ଆର୍ଥତ୍କ ବର୍ଷ ପାଇଁ ବଜେଟରେ କମ୍ ଟଙ୍କା ଅନୁମୋଦନ ହୋଇଛି। ଆଇଜିସି (ଇନ୍କ୍ରିଜିଂ ଦି ଗ୍ରୀନ୍ କଭର) ଯୋଜନାରେ ମୋଟ ୧୫୨.୧୨କୋଟି ଟଙ୍କା ଆବଶ୍ୟକ ଥିବାବେଳେ ମାତ୍ର ୩୫କୋଟି ଟଙ୍କା ଅନୁମୋଦନ ହୋଇଛି। ଆହୁରି ୧୧୭.୧୨କୋଟି ଟଙ୍କା କମ୍ ପଡ଼ୁଛି। ସେହିପରି ଗ୍ରୀନ୍ ମହାନଦୀ ମିଶନ ଯୋଜନା ପାଇଁ ମୋଟ ୧୦୫.୭୨ କୋଟି ଟଙ୍କା ଆବଶ୍ୟକ ଥିବାବେଳେ ୫୧କୋଟି ଟଙ୍କା ପାଇଁ ଅନୁମୋଦନ ମିଳିଛି। ଆହୁରି ୫୪.୭୨କୋଟି ଟଙ୍କା ଆବଶ୍ୟକ ରହିଛି। ଆମ ଜଙ୍ଗଲ ଯୋଜନା ପାଇଁ ୪୩.୩୫କୋଟି ଆବଶ୍ୟକ ଥିବା ବେଳେ ୧୦କୋଟି ପାଇଁ ଅନୁମୋଦନ ମିଳିଛି। ଆଉ ୩୩.୩୫କୋଟି ଆବଶ୍ୟକ ରହିଛି। ତେବେ ଓଏଫ୍ଏସ୍ଡିପି (ଓଡ଼ିଶା ଫରେଷ୍ଟ୍ରି ସେକ୍ଟର ଡେଭଲପ୍ମେଣ୍ଟ ପ୍ରୋଜେକ୍ଟ) ଯୋଜନା ସବୁଠାରୁ ଅଧିକ ଟଙ୍କାର ଆବଶ୍ୟକତା ରହିଛି। ଏହି ଯୋଜନା ପାଇଁ ମୋଟ ୧୬୩.୯୮କୋଟି ଟଙ୍କା ଆବଶ୍ୟକ ଥିବାବେଳେ ଚଳିତ ବଜେଟ୍ରେ ମାତ୍ର ୪୦କୋଟି ଟଙ୍କା ଅନୁମୋଦନ ମିଳିଛି। ଅର୍ଥାତ୍ ଏହି ଯୋଜନାରେ ଆହୁରି ୧୨୩.୯୮କୋଟି ଟଙ୍କା କମ୍ ପଡ଼ୁଛି। ତେଣୁ ଏସବୁ ଯୋଜନା ପାଇଁ ବଜେଟ୍ରେ ଅନୁମୋଦନ ହୋଇଥିବା ଟଙ୍କାକୁ ବୃଦ୍ଧି କରିବା ନିମନ୍ତେ ଜଙ୍ଗଲ ଓ ପରିବେଶ ବିଭାଗର ବିଧାନସଭା ଷ୍ଟାଣ୍ଡିଂ କମିଟି ରିପୋର୍ଟରେ ପରାମର୍ଶ ଦେଇଛି।
କମିଟି ଉପସ୍ଥାପନା କରିଥିବା ରିପୋର୍ଟରେ ବିଭାଗର ବିଭିନ୍ନ କାର୍ଯ୍ୟକ୍ରମ ପାଇଁ ଆବଶ୍ୟକ ଟଙ୍କା ଉପରେ ମଧ୍ୟ ଦର୍ଶାଇଛି। ରିପୋର୍ଟ ଅନୁସାରେ, କାମ୍ପା ପ୍ରୋଜେକ୍ଟ ଓ ଷ୍ଟେଟ୍ ପ୍ଲାନ୍ ଅଧୀନରେ ଭୁବନେଶ୍ୱରରେ ଏକ ଫରେଷ୍ଟ ଏକାଡେମୀ ନିର୍ମାଣ ହେଉଛି। ଏଠାରେ ହେବାକୁ ଥିବା ଫାକଲ୍ଟି ଓ ଷ୍ଟାଫ୍ କ୍ୱାର୍ଟର୍ସ ପାଇଁ ମୋଟ ୫କୋଟି ଆବଶ୍ୟକ ରହିଥିବା ବେଳେ ବଜେଟ୍ରେ ୨କୋଟି ଟଙ୍କା ପାଇଁ ଅନୁମୋଦନ ହୋଇଛି। ତେଣୁ ଆଉ ୩କୋଟି ଦେବା ପାଇଁ ବିଭାଗ ପକ୍ଷରୁ କୁହାଯାଇଛି। ସେହିଭଳି ନନ୍ଦନକାନନରେ ଏକ ମଲ୍ଟି ଲେଭଲ ପାର୍କିଂ ନିର୍ମାଣ କାର୍ଯ୍ୟ ଚାଲିଛି। ନୂଆ କାଠଯୋଡ଼ି ବ୍ରିଜ୍ ହେବା ପରେ କଟକ ପର୍ଯ୍ୟନ୍ତ ନନ୍ଦନକାନନ ରୋଡ୍କୁ ବଢ଼ାଯାଉଛି। ସ୍କୁଲ ଛାତ୍ରୀଛାତ୍ରଙ୍କ ପାଇଁ ନନ୍ଦନକାନନକୁ ପ୍ରବେଶ ଓ ପ୍ରସ୍ଥାନ ପାଇଁ ରାସ୍ତାରେ ଏକ ଅଣ୍ଡରପାସ୍ ହେବ। ଏହିସବୁ କାର୍ଯ୍ୟ ପାଇଁ ଆଉ ୫କୋଟି ଦେବା ପାଇଁ ବିଭାଗ ପକ୍ଷରୁ କୁହାଯାଇଛି। ଚିଲିକା ଲାଗୁନ୍ର ମ୍ୟାନେଜ୍ମେଣ୍ଟ ଓ ସଂରକ୍ଷଣ ସହିତ ବିଭିନ୍ନ ଗବେଷଣା ଏବଂ ଜବରଦଖଲ ଉଚ୍ଛେଦ ପାଇଁ ଅଧିକ ଟଙ୍କାର ଆବଶ୍ୟକ ରହିଥିବା କମିଟି କହିଛି। ତେଣୁ ଅନୁମୋଦିତ ହୋଇଥିବା ୪କୋଟି ବଜେଟ୍ରେ ଆଉ ୩କୋଟି ଟଙ୍କା ଦେବାପାଇଁ କମିଟି ପକ୍ଷରୁ କୁହାଯାଇଛି। ସେହିଭଳି ପର୍ଯ୍ୟଟକଙ୍କୁ ଆକର୍ଷିତ କରିବା ପାଇଁ ତପ୍ତପାଣି ଓ ମାଙ୍କଡ଼ାଡିଆଁ ଉନ୍ନତୀକରଣ ଏବଂ ଭିତରକନିକା ଜାତୀୟ ଉଦ୍ୟାନରେ ଇକୋ-ଟୁରିଜମ୍ ଭିତ୍ତିଭୂମିର ଉନ୍ନତୀକରଣ ପାଇଁ କମିଟି ପରାମର୍ଶ ଦେଇଛି।
