ନୂଆଦିଲ୍ଲୀ: ଭାରତରେ ରାଜନୈତିକ ଏକତ୍ରୀକରଣ ପାଇଁ ଭାରତର ପୂର୍ବତନ ଉପ ପ୍ରଧାନମନ୍ତ୍ରୀ ଓ ପ୍ରଥମ ସ୍ବରାଷ୍ଟ୍ରମନ୍ତ୍ରୀ ସର୍ଦ୍ଦାର ବଲ୍ଲଭ ଭାଇ ପଟେଲ ସ୍ବାଧୀନତା ପରେ ଦେଶରେ ପାଖାପାଖିତ୍ ୫୦୦ଟି ସ୍ବତନ୍ତ୍ର ରାଜ୍ୟକୁ ଏକସୂତ୍ରରେ ବାନ୍ଧିବା ଭଳି ଅସମ୍ଭବ କାର୍ଯ୍ୟକୁ ସମ୍ଭବ କରିଥିଲେ । ଭାରତୀୟ ସ୍ବତନ୍ତ୍ରତା ଅଧିନିୟମ ୧୯୪୭ ମାଧ୍ୟମରେ ସେ ୧୯୪୭ରୁ ୧୯୪୯ ମଧ୍ୟରେ ଏହି ସବୁ ରାଜ୍ୟକୁ ଭାରତ ସହ ମିଶ୍ରଣ କରିପାରିଥିଲେ। ତାଙ୍କର କୂଟନୈତିକ ଇଚ୍ଛାଶକ୍ତି ଥିଲା ଅତି ପ୍ରବଳ ।
ସେ ଥିଲେ ଭାରତର ଲୌହ ମାନବ। ସର୍ଦ୍ଦାର ପଟେଲଙ୍କ ଯୋଗଦାନକୁ ଚିରଦିନ ମନେରଖିବା ପାଇଁ ତାଙ୍କ ଜୟନ୍ତୀ ୩୧ ଅକ୍ଟୋବରକୁ ‘ରାଷ୍ଟ୍ରୀୟ ଏକତା ଦିବସ’ ରୂପେ ପାଳନ କରାଯାଉଛି। ଏହା ପାଳନ କରିବା ପାଇଁ ଭାରତ ସରକାର ୨୦୧୪ରେ ସ୍ଥିର କରିଥିଲେ। ସେବେଠାରୁ ପ୍ରତିବର୍ଷ ଏହା ପାଲନ କରାଯାଉଛି ଓ ଏହି ଅବସରରେ ଜାତୀୟ ସ୍ତରରେ ‘ରନ୍ ଫର୍ ୟୁନିଟି’ ଗଣଦୌଡ ଆୟୋଜନ କରାଯାଉଛି। ଏଥିରେ ସମସ୍ତେ ଭାଗ ନେଉଛନ୍ତି। ରାଷ୍ଟ୍ରୀୟ ଏକତା ଦିବସ ଉପରେ ସଚେତନତା ଆଣିବା ଲକ୍ଷ୍ୟରେ ଏହା ଦିଲ୍ଲୀ ସମେତ ଦେଶର ବିଭିନ୍ନ ରାଜ୍ୟରେ ଆୟୋଜିତ ହେଉଛି। ଏଥିରେ ସ୍କୁଲ ,କଲେଜ,ବିଶ୍ୱବିଦ୍ୟାଳୟ, ଏନ୍ସିସି, ଏନଏସଏର ଯୁବକମାନେ ଭାଗନେଉଛନ୍ତି। ସର୍ଦ୍ଦାର ପଟେଲ ଦେଶକୁ ଏକତା ସୂତ୍ରରେ ବାନ୍ଧି ରଖିବା ପାଇଁ କରିଥିବା ତ୍ୟାଗର ବାର୍ତ୍ତା ଲୋକମାନଙ୍କ ପାଖରେ ପହଞ୍ଚାଇବା ଏହି ମାରାଥନ୍ର ଉଦ୍ଦେଶ୍ୟ। ପ୍ରତିବର୍ଷ ରାଷ୍ଟ୍ରୀୟ ଏକତା ଦିବସ ପାଳନ କରାଯିବା ଦ୍ୱାରା ଯୁବପିଢ଼ି ଭାରତର ଏକତାର ଶକ୍ତିକୁ ବଜାୟ ରଖିବା ପାଇଁ ପ୍ରେରଣା ଲାଭ କରୁଛନ୍ତି। ସରକାରୀ ଦପ୍ତର, ସାର୍ବଜନିକ କ୍ଷେତ୍ର ତଥା ସାର୍ବଜନିକ ସଂସ୍ଥାଗୁଡିକରେ ପ୍ରତିଜ୍ଞା ସମାରୋହ ମଧ୍ୟ ଆୟୋଜନ କରାଯାଏ। ସ୍କାଉଟ, ଗାଇଡସ୍,ଏନସିସି. ଏନ୍ଏସ୍ଏସ, ହୋମଗାର୍ଡ ଆଦି ସୁରକ୍ଷା ବଳ ଦ୍ୱାରା ମାର୍ଚ୍ଚପାଷ୍ଟ କରାଯାଏ। ଜାତୀୟ ଏକତା କିପରି ବାହ୍ୟ ଶତ୍ରୁ ପକ୍ଷରୁ ରହିଥିବା ବିପଦକୁ ସଫଳତାର ସହ ମୁକାବିଲା କରୁଛି ତାହା ଏହି ଦିବସରେ ପ୍ରତ୍ୟେକ ଭାରତୀୟ ଅନୁଭବ କରିପାରୁଛନ୍ତି।
