ବେଳେବେଳେ ଆମ ଘରେ ଏମିତି କିଛି ଜିନିଷ ଥାଏ ଯାହାର ମୂଲ୍ୟ ଆମକୁ ଜଣା ନ ଥାଏ। ଆଉ ତାହା ଜାଣିବା ପରେ ଆମେ ଆଶ୍ଚର୍ଯ୍ୟ ହୋଇଯାଇଥାଉ। ଏମିତି କିଛି ଘଟିଛି ଫ୍ରାନ୍ସର କମ୍ପେନିୟନ ସହରରେ ରହୁଥିବା ଫିଲୋମେନ ଓ୍ବଲ୍ଫ ନାମକ ମହିଳାଙ୍କ କ୍ଷେତ୍ରରେ। ଫିଲୋମେନଙ୍କ ରୋଷେଇ ଘରେ ଏକ ପେଣ୍ଟିଂ(ଫଟୋଚିତ୍ର) ଲାଗିଥିଲା। ଯାହାର ମୂଲ୍ୟ ସେ ଜାଣି ନ ଥିଲେ। ଆଉ ଯେତେବେଳେ ସେ ଜାଣିବାକୁ ପାଇଲେ ଆଶ୍ଚର୍ଯ୍ୟ ହୋଇଗଲେ।
ପ୍ରକୃତ ଘଟଣାଟି ଏପରି। ଫିଲୋମେନଙ୍କ ରୋଷେଇ ଘର କାନ୍ଥରେ ଏକ ପେଣ୍ଟିଂ ଲଗାଯାଇଥିଲା। ଏହାକୁ ସେ ସାଧାରଣ ପେଣ୍ଟିଂ ଭାବୁଥିଲେ। ଫିଲୋମେନ ନିଜ ପୂରୁଣା ଘର ବିକ୍ରିକରି ନୂଆ ଘରକୁ ଯିବାକୁ ଚାହୁଁଥିଲେ। ତେଣୁ ସେ ପୁରୁଣା ଘରେ ଥିବା ସମସ୍ତ ଜିନିଷପତ୍ର ନିଲାମ କରିବା ପାଇଁ ନିଲାମୀ ବିଶେଷଜ୍ଞଙ୍କୁ ଡାକିଥିଲେ। ସେମାନେ ଯେତେବେଳେ ଉକ୍ତ ପେଣ୍ଟିଂର ମୂଲ୍ୟ ନିର୍ଦ୍ଧାରିତ କଲେ ତାହା ଶୁଣି ଫିଲୋମେନ ଆଶ୍ଚର୍ଯ୍ୟ ହୋଇଯାଇଥିଲେ। ଉକ୍ତ ପେଣ୍ଟିଂଟି ୧୩ଶହ ଶତାବ୍ଦିର। ଏହାକୁ ଲୋକପ୍ରିୟ ଚିତ୍ରକାର ଚିମାବୁଏ ତିଆରି କରିଥିଲେ। ଚିମାବୁଏ ସେନୀ-ଡି-ପେପୋ ନାମରେ ମଧ୍ୟ ପରିଚିତ ଥିଲେ। ଏହାର ଲମ୍ବ ୨୬ ସେଣ୍ଟିମିଟର ଥିବା ବେଳେ ଚଉଡ଼ା ୨୦ ସେଣ୍ଟିମିଟର ରହିଛି। ବିଶେଷଜ୍ଞଙ୍କ ମତରେ ଫଟୋଚିତ୍ରର ମୂଲ୍ୟ ୩୧ ରୁ ୪୬ କୋଟି ଟଙ୍କା ମଧ୍ୟରେ ହେବ।
ଏହା ବିଷୟରେ ଫିଲୋମେନ କୁହନ୍ତି, ପେଣ୍ଟିଂଟି କେଉଁଠାରୁ ଆସିଲା ଏବଂ ଘରେ କେବେଠାରୁ ଅଛି ତାହା ତାଙ୍କୁ ଜଣା ନାହିଁ। ଆଗାମୀ ଅକ୍ଟୋବର ୨୬ରେ ଏହାର ନିଲାମ ଡକାଯିବ। ତାଙ୍କ ଘରେ ଆହୁରି ୧୦୦ଟି ଏପରି ଜିନିଷ ମଧ୍ୟ ମିଳିଛି, ଯାହାର ମୂଲ୍ୟ ପ୍ରାୟ ୪ ଲକ୍ଷ ୬୫ ହଜାର ଟଙ୍କା ହେବ ବୋଲି ଅନୁମାନ କରାଯାଉଛି।
ଈଶାଇ ସମୁଦାୟଙ୍କ ଭାବନାକୁ ପ୍ରକାଶ କରି ସେନୀ-ଡି-ପେପୋ ଏହିପରି ୮ଟି ପେଣ୍ଟିଂ ତିଆରି କରିଥିଲେ। ସେଥିମଧ୍ୟରୁ ଏହା ଗୋଟିଏ। ଏପରି ଆଉ ୨ଟି ପେଣ୍ଟିଂ ଲଣ୍ଡନର ନ୍ୟାଶନାଲ ଗ୍ୟାଲେରୀରେ ରଖାଯାଇଛି।
