ପ୍ୟାରିସ୍, ୨୮।୭(ଏଏଫ୍ପି)- ରିୟଲ ମାଡ୍ରିଡ ଫରଓ୍ବାର୍ଡ ଗ୍ୟାରେଥ ବାଲେ ଏକ ବହୁମୂଲ୍ୟ ଚୁକ୍ତି କରିବାକୁ ଯାଉଛନ୍ତି। ସେ ଚାଇନିଜ ସୁପର ଲିଗ୍ କ୍ଳବ୍ ଜିଆଙ୍ଗସୁ ସୁନିଙ୍ଗ ସହ ଏକ ହାଇପ୍ରୋଫାଇଲ ଚୁକ୍ତିରେ ସ୍ବାକ୍ଷର କରିବାକୁ ଯାଉଛନ୍ତି। ଗୋଟିଏ ସପ୍ତାହକୁ ସେ ୧ ମିଲିୟନ ପାଉଣ୍ଡ ବିନିୟମରେ ଏହି ଚୁକ୍ତି କରିବେ ବୋଲି ଏକ ରିପୋର୍ଟରୁ ଜଣାପଡିଛି। ୩୦ ବର୍ଷୀୟ ଏହି ଓ୍ବଲ୍ସ ଫୁଟବଲରଙ୍କୁ ରିୟଲ ମାଡ୍ରିଡ କୋଚ୍ ଜିନେଡାଇନ ଜିଡାନ ମଧ୍ୟ ତାଙ୍କ ଆଭିମୁଖ୍ୟ ଜଣାଇସାରିଛନ୍ତି। ମାଡ୍ରିଡର ଭବିଷ୍ୟତ ଯୋଜନାରେ ବାଲେ ସାମିଲ ନୁହନ୍ତି ବୋଲି ଜିଡାନ ସ୍ପଷ୍ଟ କରିସାରିଛନ୍ତି। ୨୦୧୩ରୁ ବାଲେ ରିୟଲ ମାଡ୍ରିଡ ସହ ଜଡିତ ରହିଆସିଛନ୍ତି। ତେବେ ସେ ଏହାପୂର୍ବରୁ ଟୋଟେନହାମ୍ ପାଇଁ ଖେଳିଆସୁଥିଲେ। ଏବେ ସେ ଚାଇନାରେ ସେସନ ପିଛା ୨୨ ମିଲିୟନ ଅର୍ଥ ରୋଜଗାର କରିବେ ଓ ଏହି ଚୁକ୍ତି ପ୍ରାୟତଃ ଅନ୍ତିମ ରୂପ ନେଇ ସାରିଛି।
ଅନ୍ୟପଟେ ବାଲେ ଯେତେଶୀଘ୍ର ରିୟଲ ମାଡ୍ରିଡ ଛାଡିବେ ସମସ୍ତଙ୍କ ପାଇଁ ସେତେ ଭଲ ହେବ ବୋଲି କୋଚ୍ ଜିଡାନ କହିଛନ୍ତି। ତେବେ ଏହାକୁ ବାଲେଙ୍କ ପ୍ରତିନିଧି ଜୋନାଥନ ବାର୍ନେଟ୍ ୁ ନାପସନ୍ଦ କରିଛନ୍ତି। ଏଭଳି ଉକ୍ତି ବାଲେଙ୍କ ପ୍ରତି ଅସମ୍ମାନ ବୋଲି ସେ କହିଛନ୍ତି। ଗତ ୬ ବର୍ଷ ମଧ୍ୟରେ ବାଲେ ରିୟଲ ମାଡ୍ରିଡକୁ ଝରେ ସ୍ପାନିସ ଲିଗ୍ ଟାଇଟଲ ଓ ୪ଥର ଚାମ୍ପିୟନ୍ସ ଲିଗ୍ ଟାଇଟଲ ପ୍ରଦାନ କରିବାରେ ମୁଖ୍ୟ ଭୂମିକା ଗ୍ରହଣ କରିଛନ୍ତି। ତେବେ ବାଲେଙ୍କୁ ଆମେ ଅସମ୍ମାନ କରିନାହୁଁ ବୋଲି ଜିଡାନ ସ୍ପଷ୍ଟ କରିଛନ୍ତି। ବାଲେଙ୍କ ପାଇଁ ମୁଁ ବେଶ୍ ଖୁସି। ବାଲେ ବିଶ୍ୱର ଅନ୍ୟତମ ଶ୍ରେଷ୍ଠ ଫୁଟବଲର ଭାବେ ବିବେଚିତ ହୁଅନ୍ତି। ଏହି ଚୁକ୍ତି ତାଙ୍କ କ୍ୟାରିୟରକୁ ନୂଆ ମୋଡ ଦେବ ଓ ସେ ଆହୁରି ସଫଳ ହେବେ ବୋଲି ବାର୍ନେଟ କହିଛନ୍ତି। ଉଲ୍ଲେଖଥାଉ କି, ୬ ଫୁଟ୍ ୧ ଇଞ୍ଚ୍ ଉଚ୍ଚତା ବିଶିଷ୍ଟ ବାଲେ ସାଉଥାମ୍ପଟନ, ଟୋଟେନହାମ ଓ ରିୟଲ ମାଡ୍ରିଡ ପାଇଁ ଫୁଟବଲ ଖେଳିଛନ୍ତି। ସେ ଓ୍ବେଲ୍ସ ତରଫରୁ ୧୭, ୧୯ ଓ ୨୧ ବର୍ଷରୁ କମ୍ ବର୍ଗରେ ଫୁଟବଲ ଖେଳି ବେଶ୍ ସଫଳ ରହିଥିଲେ। ଓ୍ବେଲ୍ସ ସିନିୟର ଦଳ ପାଇଁ ବାଲେ ୭୭ଟି ମ୍ୟାଚ୍ ଖେଳି ୩୧ଟି ଆନ୍ତର୍ଜାତିକ ଗୋଲ ସ୍କୋର କରିଛନ୍ତି।
