ଭୁବନେଶ୍ୱର,୯।୮(ବ୍ୟୁରୋ) : ଆସନ୍ତା ୧୨ତାରିଖରେ ଘରୋଇ ବସ୍ ମାଲିକ ସଂଘ ପକ୍ଷରୁ ରାଜ୍ୟବ୍ୟାପୀ ଧର୍ମଘଟ କରିବା ଲାଗି ନିଷ୍ପତ୍ତି ନିଆଯାଇଛି। ଏନେଇ ଶୁକ୍ରବାର ବସ୍ ମାଲିକ ସଂଘର ସାଧାରଣ ପରିଷଦ ବୈଠକରେ ଚୂଡାନ୍ତ ନିଷ୍ପତ୍ତି ନେବା ସକାଶେ ସ୍ଥିର ହୋଇଛି। ବସ୍ ଧର୍ମଘଟ ରୋକିବା ଲାଗି ରାଜ୍ୟ ସରକାରଙ୍କ ପକ୍ଷରୁ ମଧ୍ୟ ପ୍ରୟାସ କରାଯାଇଛି। ଏନେଇ ଗୁରୁବାର ପରିବହନ ମନ୍ତ୍ରୀ ପଦ୍ମନାଭ ବେହେରାଙ୍କ ଅଧ୍ୟକ୍ଷତାରେ ଏକ ବୈଠକ ବସି ଆଲୋଚନା କରାଯାଇଛି। ସୂଚନାଯୋଗ୍ୟ ଯେ, ରଥଯାତ୍ରା ସମୟରେ ଏକ ଘରୋଇ ବସ୍ରେ ଜଣେ ଯୁବତୀଙ୍କୁ ହେଲପର୍ ବଳାତ୍କାର କରିଥିଲେ। ଉକ୍ତ ବସ୍ ମଧ୍ୟରେ ଏହା ଘଟିବା ଖବର ପ୍ରଘଟ ହେବାପରେ ଉକ୍ତ ହେଲ୍ପରଙ୍କୁ ପୋଲିସ ଗିରଫ କରାଯାଇଥିଲା। ଏହାପରେ ପରିବହନ କମିଶନର ଉକ୍ତ ବସ୍ର ପରମିଟ୍ ରଦ୍ଦ କରିଦେଇଥିଲେ, ଯେଉଁଥିପାଇଁ ଏହି ବସ୍ ଧର୍ମଘଟ ଡାକରା ଦିଆଯାଇଛି। ଏନେଇ ମନ୍ତ୍ରୀ ବସ୍ ସଂଘ ସହିତ ଆଲୋଚନା କରାଯାଇଛି। ପରିବହନ ମନ୍ତ୍ରୀଙ୍କ ପ୍ରକୋଷ୍ଠରେ ଅନୁଷ୍ଠିତ ହୋଇଥିବା ବୈଠକରେ ବିଭିନ୍ନ ପ୍ରସଙ୍ଗରେ ଆଲୋଚନା କରାଯାଇଛି। ମୁଖ୍ୟତଃ ପୁରୀ ଘଟଣାର ତର୍ଜମା କରାଯାଇ ଆଗାମୀ ୧୫ଦିନ ମଧ୍ୟରେ ପରିସ୍ଥିତି ସମ୍ପର୍କରେ ପରିବହନ କମିଶନର ନିଷ୍ପତ୍ତି ନେବେ ବୋଲି ଜଣାପଡିଛି। ତେଣୁ ବସ୍ ମାଲିକ ସଂଘ ଆଗାମୀ ପଦକ୍ଷେପ କ’ଣ ନେବେ ସେନେଇ ଶୁକ୍ରବାର ସ୍ଥିର କରିବେ ବୋଲି ଜଣାପଡିଛି। ଏହାସହ ବରମୁଣ୍ଡା ସମସ୍ୟା ନେଇ ମଧ୍ୟ ଆଲୋଚନା ହୋଇଛି। ପରିବହନ ବିଭାଗର ଏକ ଉଚ୍ଚପଦସ୍ଥ ଅଧିକାରୀ ଟିମ୍ ବରମୁଣ୍ଡା ଯାଇ ଆସନ୍ତା ୫ ଦିନ ମଧ୍ୟରେ ସମସ୍ୟା ସମ୍ପର୍କରେ ଅନୁଧ୍ୟାନ କରିବେ। ଏହାପରେ ରିପୋର୍ଟ ପ୍ରଦାନ କରିବାକୁ ମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ପୂର୍ବରୁ ଗାଡି ବିକିଲେ ପର୍ମିଟ ଟ୍ରାନ୍ସଫର ହେବା ସମ୍ଭବ ହେଉ ନ ଥିଲା, ଆଗକୁ ଏହା ହୋଇପାରିବ ବୋଲି ବସ୍ ସଂଘକୁ ମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି।
