କୋଟଗଡ଼,୧୮ା୮(ଡି.ଏନ.ଏ.)-କୋଟଗଡ ବ୍ଲକ ସଦର ମହକୁମାଠାରୁ ସାରତୁଲ ପଞ୍ଚାୟତ ପାଙ୍ଗାଲପଦର ଗାଁ ୧୨ କି.ମି ଦୂର। ଗତ ଲଗାଣ ବର୍ଷାରେ ଗାଁକୁ ଯାଇଥିବା ରାସ୍ତା ଧୋଇଯିବା ସହ ମାଟି ଅତଡା ପଡି ଯାତାୟାତରେ ଅସୁବିଧା ହେଉଛି। ବର୍ଷା ଛାଡିବାର ୪ ଦିନ ପରେ ବି ବ୍ଲକ ପକ୍ଷରୁ ରାସ୍ତା ମରାମତି କରାଯାଇନାହିଁ। ଲୋକେ ନିଜେ ଶ୍ରମଦାନ କରି ରାସ୍ତା କରିଛନ୍ତି। ମରାମତି ସହ ପକ୍କାରାସ୍ତା ନିର୍ମାଣ କରିବା ନେଇ ପୂର୍ବରୁ ଗ୍ରାମବାସୀ ବହୁବାର ଜିଲା ଓ ବ୍ଲକ ପ୍ରଶାସନକୁ ଜଣାଇଥିଲେ ବି କୌଣସି ସୁଫଳ ମିଳୁ ନ ଥିବା ଅଭିଯୋଗ ହୋଇଆସୁଥିଲା। ଏଭଳି ସ୍ଥିତିରେ ଶୁକ୍ରବାର ସକାଳେ ପାଙ୍ଗାଲପଦରର ଜଣେ ବୃଦ୍ଧା ଅସୁସ୍ଥ ହେବାରୁ ଗ୍ରାମବାସୀ ତାଙ୍କୁ ଦୋଳାରେ ବୋହି କୋଟଗଡ ଡାକ୍ତରଖାନାକୁ ଆଣିଥିଲେ। ଶନିବାର ପଙ୍ଗାଲପଦର ଗ୍ରାମ ସମେତ ଉକ୍ତ ରାସ୍ତା ଉପରେ ନିର୍ଭର କରୁଥିବା ଆଖପାଖ ପଞ୍ଚାୟତ ତଥା ପକାରି, ପାରିଗଡ, ରାଣିପଙ୍ଗା ଭଳି ଦୁର୍ଗମ ପଞ୍ଚାୟତର ଗ୍ରାମବାସୀ ବାଲିଗୁଡା ଉପଜିଲାପାଳ ରାଜେନ୍ଦ୍ର କୁମାର ରଣଜିତଙ୍କୁ ଭେଟି ସମସ୍ୟା ଜଣାଇବା ସହ ଏକ ପକ୍କାରାସ୍ତା ନିର୍ମାଣ ପାଇଁ ଦାବିପତ୍ର ପ୍ରଦାନ କରିଛନ୍ତି। ଖୁବଶୀଘ୍ର ଏଥିପ୍ରତି ଦୃଷ୍ଟି ଦିଆଯିବ ବୋଲି ଉପଜିଲାପାଳ ପ୍ରତିଶ୍ରୁତି ଦେଇଛନ୍ତି। ଏ ନେଇ ଗୋଷ୍ଠୀ ଉନ୍ନୟନ ଅଧିକାରୀ କୈଳାସ ଚନ୍ଦ୍ର ମୁର୍ମୁ କହିଛନ୍ତି, କୋଟଗଡ ଠାରୁ ପାଙ୍ଗାଲପଦର ରାସ୍ତାର ଉନ୍ନତୀକରଣ ପାଇଁ ୪୦ ଲକ୍ଷ ଟଙ୍କା ଆକ୍ସନ ପ୍ଲାନ ରଖାଯାଇଛି। ଧୋଇ ଯାଇଥିବା ରାସ୍ତାର ମରାମତି ପାଇଁ ୧ଲକ୍ଷ ଟଙ୍କା ପଞ୍ଚାୟତ ସମିତି ପକ୍ଷରୁ ରଖାଯାଇଛି। ଖୁବଶୀଘ୍ର ମରାମତି କରାଯିବ।
