ବରୀ,୨୫।୧୦(ଡି.ଏନ.ଏ.): ବରୁହଁ।-କଳାମାଟିଆ ପୂର୍ତ୍ତ ବିଭାଗ ରାସ୍ତାର ଉଭୟ ପାର୍ଶ୍ୱରୁ ଜବରଦଖଲ ହଟୁନି। ଏଥିଯୋଗୁ ଏହି ରାସ୍ତାର ବିଭିନ୍ନ ସ୍ଥାନରେ ପ୍ରତ୍ୟେକ ଦିନ ଦୁର୍ଘଟଣା ଘଟି ଧନଜୀବନ ନଷ୍ଟ ହେଉଛି। ରାସ୍ତାକୁ ଜବରଦଖଲ କରି ଦୋକାନୀମାନେ ବ୍ୟବସାୟ କରୁଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି। ବିଶେଷକରି ଏହି ରାସ୍ତାର ସୁଜନପୁର, ଶିବାଛକ, ବାଲିଆପାଳ, ସନ୍ଥନଛକ, ବରୀ ମାଉଣ୍ଡ ଆଦି ସ୍ଥାନମାନଙ୍କରେ ସାପ୍ତାହିକ ହାଟ ଦିନ କିଛି ବ୍ୟବସାୟୀ ରାସ୍ତାକଡ଼ରେ ବସି ରହୁଥିବାରୁ ଯାତାୟାତ ପ୍ରଭାବିତ ହେଉଛି। ବରୁଅଁ। ଛକରେ ବରୀ ଓ ଯାଜପୁର ଟାଉନ୍ ଯିବାକୁ ଯାତ୍ରୀ ଅପେକ୍ଷା କରୁଥିବାରୁ ସେଠାରେ ସବୁ ସମୟରେ ଭିଡ଼ ଜମୁଛି। ମାତ୍ର ଏହା ସତ୍ତ୍ୱେ କେତେକ ବ୍ୟବସାୟୀ ରାସ୍ତାକୁ ମାଡ଼ ବେପାର କରୁଛନ୍ତି। ପରିବା ବ୍ୟବସାୟୀମାନେ ରାସ୍ତା କଡରେ ବସି ରହୁଥିବାରୁ ଆମ୍ବୁଲାନସ୍ ଟିଏ ମଧ୍ୟ ଯାତାୟାତ କରିବାରେ ସମସ୍ୟା ଦେଖାଦେଉଛି। ଏରବାଙ୍କ, ସୁଜନପୁର, ଶିବାଛକ ଆଦି ଅଞ୍ଚଳର କେତେଜଣ ଲୋକ ସରକାରୀ ଜାଗା ଜବରଦଖଲ କରି ଦୋକାନ କରିଛନ୍ତି। ତେଣୁ ଏମାନଙ୍କୁ ଜବରଦଖଲରୁ ହଟାଇବା ପାଇଁ ଯାଜପୁର ଜିଲାପାଳ ଓ ତହସିଲଦାରଙ୍କ ନିକଟରେ ଲିଖିତ ଅଭିଯୋଗ କରାଯାଇଛି। ବିଗତ ଦିନରେ ତତ୍କାଳୀନ ଜିଲାପାଳ ରଞ୍ଜନ କୁମାର ଦାସ ରାସ୍ତା କଡ଼ରେ ଥିବା ବ୍ୟବସାୟୀଙ୍କୁ ସ୍ଥାନାନ୍ତର କରିବାକୁ ପ୍ରତିଶ୍ରୁତି ଦେଇଥିଲେ। କିନ୍ତୁ ତାହା ଅଦ୍ୟାବଧି ଫଳପ୍ରଦ ହୋଇପାରି ନାହିଁ। ତେଣୁ ବର୍ତ୍ତମାନର ଜିଲାପାଳ ଏକ୍ଷେତ୍ରରେ ଗୁରୁତ୍ୱ ଦେବାକୁ ଅଭିଯୋଗରେ ଦର୍ଶାଯାଇଛି।
