ବରଗଡ଼ ଅଫିସ,୧୪।୯: ବରଗଡ଼ ସହରରେ ଅପରାଧୀ ସକ୍ରିୟ ହୋଇ ପଡିଛନ୍ତି। କେତେବେଳେ ଦାମି ଗାଡ଼ି ଏଠାରେ ଚୋରି ହେଉଛି ତ ଆଉ କେବେ ଦିନ ଦ୍ବିପ୍ରହରରେ ଲୁଟପାଟ ଚାଲିଛି। ସୋମବାର ପୂର୍ବାହ୍ନରେ ବରଗଡ଼ ମିନି ଷ୍ଟାଡିୟମ ପଛପଟ ନିକଟ ନେହେରୁ ଆସୋସିଏଶନର ସମ୍ମୁଖ ଗଳିରାସ୍ତାକୁ ୨ଲୁଟେରା ଏକ ବାଇକରେ ଆସି ଜ୍ୟୋତ୍ସ୍ନା ପଣ୍ଡା ନାମକ ଜଣେ ମହିଳାଙ୍କ ଗଳାରୁ ସୁନାଚେନ ଲୁଟି ଫେରାର୍ ହୋଇ ଯାଇଛନ୍ତି। ମହିଳା ଜଣକ ସୈନିକ ଡେଲି ନିଡ୍ସ ଦୋକାନ ଆଗରେ ଥିବାବେଳେ ଲୁଟେରାମାନେ ଏହି କାଣ୍ଡ ଭିଆଇଥିଲେ । ସ୍ଥାନୀୟ ଲୋକେ ସେମାନଙ୍କୁ କାବୁ କରିବାକୁ ଗୋଡାଇ ଥିଲେ ସୁଦ୍ଧା ଲୁଟେରାମାନେ ଚକମା ଦେଖାଇ ଖସି ଯାଇଥିଲେ। ଏ ନେଇ ବରଗଡ଼ ଟାଉନ ଥାନାରେ ଏତଲା ହେବା ପରେ ପୋଲିସ ଘଟଣାସ୍ଥଳରେ ପହଞ୍ଚି ତନାଘନା ଆରମ୍ଭ କରିଛି। ମାତ୍ର ଲୁଟେରାଙ୍କୁ ଠାବ କରି ପାରି ନାହିଁ । ଲୁଟେରାମାନେ ସମ୍ବଲପୁରୀ ଭାଷାରେ କଥାବାର୍ତ୍ତା ହେଉଥିବା କିଛି ପ୍ରତ୍ୟକ୍ଷଦର୍ଶୀ କହିଛନ୍ତି।
