ଖଇରପୁଟ, ୭ା୮(ଡି.ଏନ.ଏ.): ମାଲକାନଗିରି ଜିଲାର ଖଇରପୁଟ ବ୍ଲକରେ ଲଗାଣବର୍ଷା ଯୋଗୁ ଅନେକ ସ୍ଥାନରେ ବନ୍ୟା ପରିସ୍ଥିତି ଉପୁଜିଛି। ଅନେକ ଗ୍ରାମ ଜଳବନ୍ଦୀ ହୋଇରହିଛି। କେତେକ ଗ୍ରାମ ବାହ୍ୟଜଗତରୁ ବିଚ୍ଛିନ୍ନ ହୋଇପଡିଛି। ବଣ୍ଡାଘାଟିରେ ମଧ୍ୟ ପ୍ରବଳ ବର୍ଷା ଯୋଗୁ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଏହି ଅଞ୍ଚଳର ମୁଦୁଲିପଡା ଓ ଅଣ୍ଡ୍ରାହାଲ ପଞ୍ଚାୟତର ପାତ୍ରପୁଟ, ଖୋଇଗୁଡା, କିଚାପଡା, ତୁସେଇପଡା, ଖାଲଗୁଡା, ଭେଜଗୁଡା, ଦାଣ୍ଡିଗୁଡା ଗ୍ରାମବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଛନ୍ତି । ବର୍ତ୍ତମାନ ସୁଦ୍ଧା ଗ୍ରାମଗୁଡିକରେ ପ୍ରଶାସନ ପହଞ୍ଚତ୍ପାରିନାହିଁ । ପ୍ରବଳ ବର୍ଷା ଯୋଗୁ ଅନେକ ଲୋକଙ୍କ ଘରେ ପାଣି ପଶି ଲୋକଙ୍କ ଘର ଭାଙ୍ଗିଯାଇଛି। ନିତ୍ୟବ୍ୟବହୃତ ଜିନିଷପତ୍ର ନଷ୍ଟ ହୋଇଛି। କେତେକ ଗ୍ରାମରେ ମହାମାରୀ ଦେଖାଦେଲାଣି। ଗ୍ରାମଗୁଡିକର ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡିଛି। କୌଣସି ସ୍ବାସ୍ଥ୍ୟକର୍ମୀଙ୍କ ଗ୍ରାମଗୁଡିକରେ ପାଦ ପଡୁନାହିଁ। ଜିଲା ପ୍ରଶାସନ କିମ୍ବା ବ୍ଲକ ପ୍ରଶାସନ ପକ୍ଷରୁ ଗ୍ରାମବାସୀଙ୍କୁ କୌଣସି ସହାୟତା ମିଳି ନ ଥିବା ଅଭିଯୋଗ ହୋଇଛି। ପାହାଡିଆ ଅଞ୍ଚଳ ରୂପେ ପରିଚିତ ବଣ୍ଡାଘାଟିରେ କ୍ରମାଗତ ଭାବେ ବର୍ଷା ଲାଗିରହିଛି। ଲୋକେ ଘରୁ ବାହାରକୁ ବାହାରି ପାରୁନାହାନ୍ତି। ଅନେକ ଚାଷଜମିରେ ବର୍ଷାପାଣି ପଶି ଚାଷ ନଷ୍ଟ ହୋଇଯାଇଛି। ଫଳରେ ଏହି ଆଦିମ ବଣ୍ଡା ଜନଜାତିର ଲୋକେ କିଭଳି ଚଳିବେ ସେ ନେଇ ଚିନ୍ତାରେ ପଡିଛନ୍ତି । ବର୍ତ୍ତମାନ ସୁଦ୍ଧା ଗ୍ରାମରେ କୌଣସି ପ୍ରଶାସନିକ ଅଧିକାରୀ, ସ୍ବାସ୍ଥ୍ୟସେବା କିମ୍ବା ରିଲିଫ ସାମଗ୍ରୀ ପହଞ୍ଚତ୍ ନ ଥିବା ଦାଣ୍ଡିଗୁଡାର ସମରା ଶିଶା, ବୁଦ୍ରା ଦୋରା, ଗୁରୁ କିର୍ଷାନି, ଧବୁଲୁମୁଦୁଲି ଏବଂ କିଚାପଡା ଗ୍ରାମର ମଙ୍ଗଳା ମୁଦୁଲି, ବୁଦା ଶିଶା, ଶୁକ୍ରା ମୁଦୁଲି ପ୍ରମୁଖ କହିଛନ୍ତି। ପ୍ରଶାସନ ପକ୍ଷରୁ ଶୀଘ୍ର ସେମାନଙ୍କୁ ରିଲିଫ ସହ ସ୍ବାସ୍ଥ୍ୟସେବା ଯୋଗାଇଦେବାକୁ ଗ୍ରାମବାସୀ ଦାବି କରିଛନ୍ତି। ସେହିପରି ଖଇରପୁଟ ବ୍ଲକର ସଦର ମହକୁମାର ମାଝିଗୁଡା, କେନ୍ଦୁଗୁଡା ଓ ଗମ୍ଭାରିଭଟ୍ଟା ୩ଟି ଗ୍ରାମ ବାହ୍ୟଜଗତରୁ ବିଚ୍ଛିନ୍ନ ହୋଇଯାଇଛି। ଜଣେ ରୋଗୀ ମଧ୍ୟ ଫସି ରହିଛନ୍ତି। ମାଝିଗୁଡା ଗ୍ରାମର ଗୁରୁମାଝି ଅସୁସ୍ଥ ହୋଇପଡିବାରୁ ତାଙ୍କୁ ଚିକିତ୍ସା ପାଇଁ ଡାକ୍ତରଖାନା ନେବା ପାଇଁ ଟୋକେଇରେ ବୋହି ଅଣାଯାଇଥିଲା। ତେବେ ଗ୍ରାମ ନିକଟରେ ଥିବା ଅସ୍ଥାୟୀ ପୋଲଟି ଧୋଇଯିବାରୁ ରୋଗୀଙ୍କୁ ତାଙ୍କ ସମ୍ପର୍କୀୟମାନେ ଡାକ୍ତରଖାନା ନେବା ସମ୍ଭବପର ହୋଇ ନଥିବା ପ୍ରକାଶ କରିଛନ୍ତି। ପୂର୍ବରୁ ଗ୍ରାମବାସୀ ବାରମ୍ବାର ପୋଲ ନିର୍ମାଣ ପାଇଁ ବାରମ୍ବାର ଦାବି କରିଆସୁଥିଲେ ମଧ୍ୟ ପ୍ରଶାସନ କୌଣସି ପଦକ୍ଷେପ ନେଇନାହିଁ। ଫଳରେ ଆମେ ନାହିଁ ନ ଥିବା ହଇରାଣ ହେଉଛୁ ବୋଲି ଗ୍ରାମବାସୀ ପ୍ରକାଶ କରିଛନ୍ତି। ପ୍ରଶାସନ ପକ୍ଷରୁ ତୁରନ୍ତ ବର୍ଷାରେ କ୍ଷୟକ୍ଷତି ହୋଇଥିବା ସମସ୍ତ ଗ୍ରାମକୁ ରିଲିଫ ସହ ସ୍ବାସ୍ଥ୍ୟସେବା ଯୋଗାଇ ଦେବାକୁ ଦାବି ହେଉଛି।
