ବଢୁଛି ଗଞ୍ଜେଇ ଚାଷ, ଅବକାରୀ ବିଭାଗ ନୀରବ୭୧୨୮ ଏକର ଜମିରୁ ଗଛ ନଷ୍ଟ, ଗିରଫ ଶୂନ
8:07 amJuly 9, 2019 / 21

ଫୁଲବାଣୀ ଅଫିସ, ୯ା୭ ରାକେଶ କୁମାର ରାଉତ କନ୍ଧମାଳ ଜିଲାରେ ବ୍ୟାପକ ଗଞ୍ଜେଇ ଚାଷ ହେବା ଘଟଣା କାହାରିକୁ ଅଛପା ନାହିଁ। ଜିଲାରୁ ରାଜ୍ୟ ଓ ରାଜ୍ୟ ବାହାରକୁ ଗଞ୍ଜେଇ ଚୋରା ଚାଲାଣ ହେଉଥିବା ନେଇ ବହୁ ନଜିର ରହିଛି। ଗଞ୍ଜେଇ ଗଛ ଲଗାଇବା ଏବଂ ଚୋରା କାରବାର ଯୋଗୁ ଜିଲାରେ ଅସାମାଜିକ ତତ୍ତ୍ୱଙ୍କ ଚଳପ୍ରଚଳ ବୃଦ୍ଧି ପାଉଛି। ସେମାନଙ୍କୁ ଧରାଯାଉନାହିଁ। ଗଞ୍ଜେଇ ଚାଷ ବର୍ଷକୁ ବର୍ଷ ବଢୁଛି ପଛେ, କମୁନାହିଁ। ଅବକାରୀ, ପୋଲିସ ବିଭାଗ ଗଞ୍ଜେଇ ଗଛ କାଟି ନଷ୍ଟ କରୁଥିବା କହୁଥିଲେ ହେଁ, ତାହା ସମୁଦ୍ରକୁ ଶଙ୍ଖେ ପରି। ଗଞ୍ଜେଇ ଚାଷ ସମ୍ପୂର୍ଣ୍ଣ ବନ୍ଦ କରିବା ଏବଂ ଏହା ଉପରେ ବିଭାଗ କ’ଣ ପଦକ୍ଷେପ ନେଇଥିବା ସଂକ୍ରନ୍ତରେ ଯେଉଁ ଉତ୍ତର ମିଳିଛି ତାହା ତାଜୁବ କଲାଭଳି। କାରଣ ବିଗତ ୨ ବର୍ଷରେ ୭୧୨୮ ଏକର ଜମିରୁ ଗଞ୍ଜେଇ ଗଛ କାଟି ନଷ୍ଟ କରାଯାଇଥିଲେ ହେଁ ଏହି ଘଟଣାରେ କାହାରିକୁ ଗିରଫ କରାଯାଇନାହିଁ।
ସାଧାରଣତଃ ଜିଲାର ଫିରିଙ୍ଗିଆ, ବାଲିଗୁଡା ଏବଂ ଖଜୁରିପଡା, କ.ନୂଆଗଁା ବ୍ଲକ ଅଞ୍ଚଳରେ ଅଧିକ ଚାଷ କରାଯାଉଛି। ଅଧିକାଂଶ ଚାଷ ନିଜ ଜମି ସମେତ ଜଙ୍ଗଲ ଜମିରେ ହୋଇଥାଏ। ଯେଉଁଠି ଚାଷ ହୁଏ ସେଠାରେ ଥିବା ବନବିଭାଗ ଅଧିକାରୀ, ପୋଲିସ, ଅବକାରୀ କର୍ମଚାରୀ, ପିଆର୍‌ଆଇ ମେମ୍ବରଙ୍କ ଗୋଚରରେ ଥାଏ। ସମସ୍ତେ ସବୁ ଜାଣିଥାନ୍ତି। ଯେତବେଳେ ଉପରୁ ନିର୍ଦ୍ଦେଶ ଆସେ ସେତବେଳେ ଗଞ୍ଜେଇ ଗଛ କଟା ଅଭିଯାନ ଆରମ୍ଭ ହୁଏ। କିନ୍ତୁ କିଏ ଗଞ୍ଜେଇ ଗଛ ଲଗାଇଥିଲା ତାହା ଜାଣିଥିଲେ ମଧ୍ୟ ଉପରିସ୍ଥ ଅଧିକାରୀଙ୍କୁ ଅବଗତ କରାନ୍ତିନାହିଁ। ସୂଚନା ଅନୁଯାୟୀ, ଯେତିକି ଗଛ ନଷ୍ଟ କରାଯାଏ ତାହା ୧୦ ପ୍ରତିଶତରୁ ବି କମ୍‌। ଗଞ୍ଜେଇ କାରବାରକୁ ରୋକିବା ଏବଂ ଏହାଦ୍ୱାରା ଜିଲାରେ ଅପରାଧ ବଢୁଛି ବୋଲି ଜିଲା ନାଗରିକ ମଞ୍ଚ ପକ୍ଷରୁ ଅବକାରୀ ଅଧୀକ୍ଷକଙ୍କ ପାଖରେ ଅଭିଯୋଗ କରାଯାଇଥିଲା। ହେଲେ ଅବକାରୀ ଅଧୀକ୍ଷକଙ୍କ ରିପୋର୍ଟ ଦେଖିଲେ ପ୍ରକୃତରେ ଜିଲାରେ କିପରି ଗଞ୍ଜେଇ ଚାଷ ରୋକାଯାଉଛି ତାହା ଆଶ୍ଚର୍ଯ୍ୟ ଲାଗିବ। ରିପୋର୍ଟ ଅନୁଯାୟୀ, ୨୦୧୫-୧୬ରେ ୧୪୩୧ ଏକରରେ ୧୨ ଲକ୍ଷ ୪୭ ହଜାର ଗଞ୍ଜେଇ ଗଛ ନଷ୍ଟ କରାଯାଇଥିଲା। ଯାହାର ମୂଲ୍ୟ ୧୨୪.୭୮ କୋଟି। ଏହି ଘଟଣାରେ ୧୧ଟି ମାମଲା ରୁଜୁ କରାଯାଇ ମୋଟ ୫୪ ଜଣଙ୍କୁ ଗିରଫ କରାଯାଇଥିଲା। ୨୦୧୬-୧୭ରେ ୨୩୮୪ ଏକରରେ ୨୩ ଲକ୍ଷ ୮୪ ହଜାର ଗଞ୍ଜେଇ ଗଛ ନଷ୍ଟ କରାଯାଇଥିଲା। ଯାହାର ମୂଲ୍ୟ ୨୩୮.୪୦ କୋଟି। ଏହି ଘଟଣାରେ ଗୋଟିଏ ମାମଲା ରୁଜୁ କରାଯାଇ ୫ ଜଣଙ୍କୁ ଗିରଫ କରାଯାଇଥିଲା। ହେଲେ ୨୦୧୭-୧୮ରେ ୨୪୨୪ ଏକରରେ ୨୪ ଲକ୍ଷ ୨୪ ହଜାର ଗଞ୍ଜେଇ ଗଛ କଟା ଯାଇଥିଲା। ଯାହାର ମୂଲ୍ୟ ୨୪୨.୪୦ କୋଟି। ଏହି ଘଟଣାରେ ୨୭ଟି ମାମଲା ରୁଜୁ ହୋଇଥିବା ବେଳେ ଜଣେ ବି କାହାରିକୁ ଗିରଫ କରାଯାଇ ନାହିଁ। ସେହିପରି ୨୦୧୮-୧୯ରେ ୪୭୦୪ ଏକରରେ ୪୭ ଲକ୍ଷ ୪ ହଜାର ଗଞ୍ଜେଇ ଗଛ କଟାଇଥିଲା। ଯାହାର ମୂଲ୍ୟ ୪୭୦.୪୦ କୋଟି। ହେଲେ ଏହି ଘଟଣାରେ ଗୋଟିଏ ବି ମାମଲା ରୁଜୁ ହୋଇ ନାହିଁ କି କେହି ଗିରଫ ହୋଇନାହାନ୍ତି। ରିପୋର୍ଟକୁ ଦେଖିଲେ ପ୍ରତିବର୍ଷ ଗଞ୍ଜେଇ ଚାଷ ବଢ଼ି ଚାଲିଛି। ସେହି ତୁଳନାରେ ମାମଲା ରୁଜୁ ହୋଇ ଗିରଫ ସଂଖ୍ୟା ବଢ଼ିବା କଥା, ହେଲେ ତାହା ହେଉନାହିଁ। ଏଥିରୁ ଗୋଟିଏ ଘଟଣା ସ୍ପଷ୍ଟ, ଅବକାରୀ ଅଧିକାରୀ/କର୍ମଚାରୀ, ପୋଲିସ, ବନ ବିଭାଗ ଏବଂ ଗଞ୍ଜେଇ ଚାଷୀଙ୍କ ମଧ୍ୟରେ ସଲାସୁତରା ରହିଛି। ଏ ନେଇ ଜିଲା ଅବକାରୀ ଅଧୀକ୍ଷକ ବିମ୍ବାଧର ସେଠୀଙ୍କୁ ପଚାରିବାରୁ ଜଙ୍ଗଲ ଭିତରେ ଚାଷ ହେଉଥିବାରୁ ମାମଲା ରୁଜୁ କରିବା ଏବଂ ଗିରଫ କରିବା କଷ୍ଟକର ହେଉଛି ବୋଲି କହିଛନ୍ତି।