ପୁରୀ ଅଫିସ,୩ା୬: ରାଜ୍ୟରେ ଦ୍ରୁତଗତିରେ କରୋନା ଆକ୍ରାନ୍ତଙ୍କ ସଂଖ୍ୟା ବଢୁଛି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ନୂଆ ଗାଇଡ଼ଲାଇନ ଜାରି କରିଛନ୍ତି। ଜୁନ୍ ୩୦ ପର୍ଯ୍ୟନ୍ତ କୌଣସି ଧାର୍ମିକସ୍ଥଳକୁ ସର୍ବସାଧାରଣ ଯାଇପାରିବେ ନାହିଁ। ସେହିପରି ଧାର୍ମିକ ସମାବେଶ ଉପରେ ବି ପୂର୍ବବତ କଟକଣା ରହିଛି। ଏଥିପାଇଁ ବୁଧବାର ଚମ୍ପକ ଦ୍ୱାଦଶୀରେ ବଡ଼ଦାଣ୍ଡକୁ ଠାକୁରଙ୍କ ବିମାନ ବାହାରିବ ନାହିଁ, ଶ୍ରୀମନ୍ଦିର ଭିତରେ କେବଳ ବିଧି ରକ୍ଷା ହେବ। ଶ୍ରୀମନ୍ଦିର ପ୍ରଶାସନର ଏହି ନଷ୍ପତ୍ତି ପରେ ଏବେ ରଥଯାତ୍ରା ଆୟୋଜନକୁ ନେଇ ଆଶଙ୍କା ବଢିଯାଇଛି। ନୂଆ ଗାଇଡ଼ଲାଇନ ଅବଧି ମଧ୍ୟରେ ରଥଯାତ୍ରା ପଡ଼ୁଥିବାରୁ ଏଭଳି ଅନିଶ୍ଚିତତା ସୃଷ୍ଟି ହୋଇଛି।
ଆସନ୍ତା ୫ତାରିଖରେ ଦେବସ୍ନାନ ପୂର୍ଣ୍ଣିମା। ସ୍ନାନବେଦିରେ ପ୍ରତ୍ୟକ୍ଷ ସ୍ନାନ କରିବେ ଚତୁର୍ଦ୍ଧାବିଗ୍ରହ। ଏଥର କରୋନା ପାଇଁ ବିନା ଭକ୍ତରେ ହେବ ସ୍ନାନଯାତ୍ରା। କୌଣସି ଶ୍ରଦ୍ଧାଳୁ ସ୍ବଚକ୍ଷୁରେ ଠାକୁରଙ୍କ ଦିବ୍ୟସ୍ନାନ ଏବଂ ହାତୀବେଶ ଦେଖିପାରିବେ ନାହିଁ। ଘରେ ରହି ଟିଭିରେ ଦେଖିବା ଲାଗି ବ୍ୟବସ୍ଥା କରାଯାଇଛି। ମନ୍ଦିର ପରିସର ସ୍ନାନମଣ୍ଡପରେ ଯେହେତୁ ଏହି ନୀତି ରହିଛି ତେଣୁ ଆୟୋଜନ ପାଇଁ କୌଣସି ଅସୁବିଧା ନାହିଁ। କିନ୍ତୁ ରଥଯାତ୍ରାକୁ ନେଇ ଏବେ ସମସ୍ତଙ୍କ ମନରେ ସନ୍ଦେହ ଉଠିଲାଣି। ଜୁନ୍ ୨୩ରେ ରଥଯାତ୍ରା। ଯଦି ସରକାରଙ୍କ ଗାଇଡ୍ଲାଇନ ପାଳନ କରାଯାଏ ତେବେ ବଡଦାଣ୍ଡରେ ଠାକୁରଙ୍କ ରଥ ଗଡ଼ିବା ନେଇ ସନ୍ଦେହ ରହିଛି। ତେବେ ଏ ନେଇ ବର୍ତ୍ତମାନ କେହି ମୁହଁ ଖୋଲୁନାହାନ୍ତି।
ଗତ ୩୦ ତାରିଖରେ ଶ୍ରୀମନ୍ଦିର ପରିଚାଳନା କମିଟି ବୈଠକ ବସିଥିଲା। ବିନା ଭକ୍ତରେ ରଥଯାତ୍ରା ଆୟୋଜନ ଲାଗି କମିଟି ରାଜ୍ୟ ସରକାରଙ୍କୁ ପ୍ରସ୍ତାବ ଦେଇଥିଲା। ଅପରପକ୍ଷେ ରଥଖଳାରେ ତିନିରଥ ନିର୍ମାଣ କାମ ଆଗେଇ ଚାଲିଥିବାରୁ ରଥଯାତ୍ରାକୁ ନେଇ ପ୍ରାୟ ସମସ୍ତେ ସକାରାତ୍ମକ ଆଭିମୁଖ୍ୟ ରଖିଥିଲେ। ହେଲେ ଏହାକୁ ନୂଆ ଗାଇଡ୍ଲାଇନ ପୁଣି ଆଶଙ୍କା ଭିତରକୁ ଠେଲିଦେଇଛି। ଏପରି କି ଏଥିଯୋଗୁ ବୁଧବାର ହେବାକୁ ଥିବା ଚମ୍ପକ ଦ୍ୱାଦଶୀରେ ଠାକୁରଙ୍କ ଗୁଆଲି ଶୋଭାଯାତ୍ରା ବଡଦାଣ୍ଡକୁ ବାହାରିବ ନାହିଁ ବୋଲି ପ୍ରଶାସନ ନିଷ୍ପତ୍ତି ନେଇଛି। ଯେଉଁଠି ଠାକୁରଙ୍କ ବିମାନ ବାହାରକୁ ବାହାରି ପାରୁନାହିଁ ସେଠି ରଥଯାତ୍ରା କେମିତି ହେବ ଏମିତି ଭାବନା ସମସ୍ତଙ୍କ ମନକୁ ଘାରିଛି। ଏ ନେଇ ଶ୍ରୀମନ୍ଦିର ଉପମୁଖ୍ୟ ପ୍ରଶାସକ ତଥା ଜିଲାପାଳ ବଲୱନ୍ତ ସିଂ କହିଛନ୍ତି, ସରକାରଙ୍କ ନିର୍ଦ୍ଦେଶ ଅନୁଯାୟୀ ରଥ ନିର୍ମାଣ କାର୍ଯ୍ୟ ଚାଲିଛି। ଠିକଣା ସମୟରେ ଉପଯୁକ୍ତ ପ୍ଲାଟଫର୍ମରେ ଠିକ୍ ନିଷ୍ପତ୍ତି ନିଆଯିବ। ହେଲେ ଆଇନକୁ ପାଳନ କରିବାକୁ ପଡ଼ିିବ।
