ଚାନ୍ଦବାଲି,୨୦।୮ (ଡି.ଏନ.ଏ.) – ମୃତ୍ୟୁର ୫ ବର୍ଷ ପରେ ହାଇକୋର୍ଟଙ୍କ ନିର୍ଦ୍ଦେଶରେ ଜଣେ ମହିଳାଙ୍କ ମୃତଦେହର ଫୋରେନ୍ସିକ ପରୀକ୍ଷା ପାଇଁ ଶ୍ମଶାନରୁ ମାଟି ଖୋଳି ଅସ୍ଥି, କଙ୍କାଳ ବାହାର କରାଯାଇଛି। ସୋମବାର ଏଭଳି ଘଟଣା ଭଦ୍ରକ ଜିଲା ଧାମରା ନିକଟସ୍ଥ ନରସିଂହପ୍ରସାଦ ଗ୍ରାମରେ ଦେଖିବାକୁ ମିଳିଛି।
ଉଲ୍ଲେଖନୀୟ ଯେ, ଏହି ଗଁାର ବୃନ୍ଦାବନ ମହାନ୍ତିଙ୍କ ସ୍ତ୍ରୀ ଶକୁନ୍ତଳା(୫୦)ଙ୍କର ୨୦୧୪ରେ ମୃତ୍ୟୁ ହୋଇଥିଲା। ମୃତ୍ୟୁର କାରଣ ଅସ୍ପଷ୍ଟ ଥିବାବେଳେ ପରିବାର ପକ୍ଷରୁ ମୃତଦେହ ବ୍ୟବଚ୍ଛେଦ କରା ନ ଯାଇ ଗଁା ଶ୍ମଶାନରେ ପୋତି ଦିଆଯାଇଥିଲା। ବୃନ୍ଦାବନ ତାଙ୍କ ସ୍ତ୍ରୀଙ୍କ ମୃତ୍ୟୁର ପ୍ରକୃତ କାରଣ ଜାଣିବାକୁ ଉଦ୍ୟମ କରିବା ସହ ୨୦୧୬ରେ ହାଇକୋର୍ଟରେ ଏକ ମାମଲା (ନଂ.୧୪୮୩/୨୦୧୬) ଦାଏର କରିଥିଲେ। ଶକୁନ୍ତଳାଙ୍କ ମୃତଦେହର ଫୋରେନ୍ସିକ ପରୀକ୍ଷା ପାଇଁ ସେ ଆବେଦନ କରିଥିଲେ। ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ସେ ଏ ନେଇ ୨୦୧୮ରେ ବାଂଶଡ଼ା ଥାନାରେ ଏତଲା ଦେବା ପରେ ମାମଲା(ନଂ.୧୭୧/୧୮) ରୁଜୁ ହୋଇଥିଲା। ଶକୁନ୍ତଳାଙ୍କୁ ତାଙ୍କ ବୋହୂ ମାରି ଦେଇଥିବା ବୃନ୍ଦାବନ ଏତଲାରେ ଦର୍ଶାଇଥିଲେ। ହାଇକୋର୍ଟ ବୃନ୍ଦାବନଙ୍କ ଆବେଦନକୁ ବିଚାରକୁ ନେଇ ଶକୁନ୍ତଳାଙ୍କ ମୃତଦେହର ଫୋରେନ୍ସିକ ପରୀକ୍ଷା ପାଇଁ ନିକଟରେ ନିର୍ଦ୍ଦେଶ ଦେଇଛନ୍ତି। ମାଜିଷ୍ଟ୍ରେଟ, ପୋଲିସ ଓ ଗ୍ରାମବାସୀ ତଥା କେତେକ ସାକ୍ଷୀଙ୍କ ଉପସ୍ଥିତିରେ ସୋମବାର ଶ୍ମଶାନରୁ ମାଟି ଖୋଳାଯାଇ ନମୁନା ସଂଗ୍ରହ କରି ଫୋରେନ୍ସିକ ପରୀକ୍ଷା ଲାଗି ପଠାଯିବାର ବ୍ୟବସ୍ଥା କରାଯାଇଛି।
