ମୁମ୍ବାଇ: ବଲିଲଡ୍ ମୁଭି ନିର୍ମାଣ କରିବାରେ ପ୍ରଯୋଜକ ନିର୍ଦ୍ଦେଶକ କୋଟି କୋଟି ଟଙ୍କା ଖର୍ଚ୍ଚ କରିଥାଆନ୍ତି। ଫିଲ୍ମ ହିଟ୍ ହେଉ ଅବା ଫ୍ଲପ୍ ଟଙ୍କା ଖର୍ଚ୍ଚ କରିବାରେ ସାଧାରଣତଃ କେହି କଞ୍ଜୁସି କରନ୍ତି ନାହିଁ। ବେଳେ ବେଳେ ଦେଖାଯାଏ ଫିଲ୍ମରେ ବିଶେଷ କରି ନାୟକ ନାୟିକାମାନେ ଯେଉଁ ପୋଷାକ ପିନ୍ଧି ଥାଆନ୍ତି ତାହା ଖୁବ୍ ସୁନ୍ଦର ହୋଇଥାଏ। ହେଲେ ପରେ ଏହି ପୋଷାକ କୁଆଡେ ଯାଏ ବା କ’ଣ ହୁଏ ଏହାକୁ ନେଇ ଅନେକଙ୍କ ମନରେ ପ୍ରଶ୍ନ ଉଠିଥାଏ। ୟଶରାଜ ଫିଲ୍ମର ଷ୍ଟାଇଲିସ ଆୟଶା ଖାନ୍ନା ଯାହା କୁହନ୍ତି ତାହା ହୁଏତ ଅନେକ ଜାଣି ନ ଥିବେ। ସେ କୁହନ୍ତି ଫିଲ୍ମ ଶୁଟିଂ ସରିବା ଓ ରିଲିଜ୍ ସରିବା ପରେ ସେଲିବ୍ରିଟିଙ୍କ କିଛି ପୋଷକକୁ ସାଇତା ହୋଇ ରଖାଯାଏ। ଏହାସହ ସେହି କପଡାରେ ଫିଲ୍ମର ଟ୍ୟାଗ ଲଗାଇ ଦିଆଯାଇଥାଏ। ଏହାପରେ ଏହାକୁ ମିକ୍ସ ଆଣ୍ଡ ମ୍ୟାଚ୍ କରି ଜୁନିୟର ଆର୍ଟିଷ୍ଟମାନଙ୍କୁ ଦିଆଯାଇଥାଏ। ଆହୁରି ମଧ୍ୟ ପ୍ରଡକସନ୍ ହାଉସର ପରବର୍ତ୍ତି ଫିଲ୍ମରେ ଏହି ପୋଷାକକୁ ବ୍ୟବହାର କରାଯାଇଥାଏ। ହେଲେ ଏହାକୁ ଯେତେବେଳେ ପୁଣିଥରେ ବ୍ୟବହାର କରାଯାଏ ସେତେବେଳେ ଧ୍ୟାନ ଦିଆଯାଏ ଯେମିତି ଦର୍ଶକେ ଏହି ପୋଷାକକୁ ଆଗରୁ ଦେଖିଥିଲେ ବୋଲି ଜାଣି ନ ପାରନ୍ତି। କିନ୍ତୁ ସବୁ ପୋଷାକକୁ ଏମିତି ବ୍ୟବହାର କରାଯାଏ ନାହିଁ। କେବେ କେବେ କଳାକାରମାନଙ୍କୁ ପସନ୍ଦ ଆସିଲେ ସେମାନେ ନିଜ ପାଖରେ ମଧ୍ୟ ନିଜର ପୋଷାକକୁ ରଖି ଦିଅନ୍ତି। ସେହିପରି ଯଦି କୌଣସି ଡିଜାଇନର କୌଣସି ଫିଲ୍ମ ପାଇଁ ପୋଷାକ ଦେଇଥାଆନ୍ତି ଫିଲ୍ମ ସରିବା ପରେ ସେ ତାକୁ ଫେରାଇ ନିଅନ୍ତି। ବେଳେବେଳେ ଅନ୍ ଲାଇନ୍ରେ ଏହାର ନିଲାମି ମଧ୍ୟ କରାଯାଇଥାଏ। ଆଉ ସେହି ଟଙ୍କାକୁ କୌଣସି ଅନୁଷ୍ଠାନକୁ ଦାନ କରାଯାଇଥାଏ।
