ନୂଆଦିଲ୍ଲୀ, ୭।୬(ପି.ଟି.)-ଆସନ୍ତାବର୍ଷ ଭାରତରେ ହେବାକୁଥିବା ଫିଫା ମହିଳା ୧୭ ବର୍ଷରୁ କମ୍ ବିଶ୍ୱକପ ପାଇଁ ନ୍ୟୁଜିଲାଣ୍ଡ ଯୋଗ୍ୟତା ଅର୍ଜନ କରିଛି। ଏଥିସହ ଓସେନିଆ ଅଞ୍ଚଳରୁ ଏକମାତ୍ର ଦଳଭାବେ ନ୍ୟୁଜିଲାଣ୍ଡ ପ୍ରତିନିଧିତ୍ୱ କରିବା ନିଶ୍ଚିତ ହୋଇଛି। ଆୟୋଜକ ହିସାବରେ ଭାରତ ପ୍ରତିଯୋଗିତା ଖେଳିବ। ପୂର୍ବରୁ ଜାପାନ ଓ ଉତ୍ତର କୋରିଆ ଏସିଆରୁ ଯୋଗ୍ୟତା ଅର୍ଜନ କରି ସାରିଛନ୍ତି। ଭାରତର ୫ଟି ଭେନ୍ୟୁରେ ଫେବୃୟାରୀ ୧୭ରୁ ମାର୍ଚ୍ଚ ୭ ପର୍ଯ୍ୟନ୍ତ ହେବାକୁଥିବା ଏହି ପ୍ରତିଯୋଗିତାରେ ୧୬ଟି ଦଳ ଅଂଶଗ୍ରହଣ କରିବେ। କରୋନା ଭାଇରସ ସଂକ୍ରମଣ ଯୋଗୁ ୨୦୨୦ ଏପ୍ରିଲରେ ହେବାକୁଥିବା ୧୭ ବର୍ଷରୁ କମ୍ ଓଏଫସି ମହିଳା ଚାମ୍ପିୟନଶିପ୍ ବାତିଲ ହେବାପରେ ଓସେନିଆ ଫୁଟବଲ କନ୍ଫେଡେରେଶନ କାର୍ଯ୍ୟନିର୍ବାହୀ କମିଟି ନ୍ୟୁଜିଲାଣ୍ଡ ନାମ ସୁପାରିସ କରିଥିଲା। ଏହା ପୂର୍ବରୁ ନ୍ୟୁଜିଲାଣ୍ଡ ସମସ୍ତ ୬ଟି ଫିଫା ମହିଳା ୧୭ ବର୍ଷରୁ କମ୍ ବିଶ୍ୱକପରେ ପ୍ରତିଦ୍ୱନ୍ଦ୍ୱିତା କରିଛି। ୨୦୧୮ରେ ଉରୁଗୁଏରେ ଅନୁଷ୍ଠିତ ପ୍ରତିଯୋଗିତାରେ ଦଳ ଏକ ବ୍ରୋଞ୍ଜ ପଦକ ପାଇଥିଲା। ୨୦୦୮ ପ୍ରଥମ ସଂସ୍କରଣକୁ ଏହି ଦେଶ ଆୟୋଜନ କରିଥିଲା।
ପ୍ରକାଶ ଯୋଗ୍ୟ ଯେ, ଫିଫା ମହିଳା ୧୭ ବର୍ଷରୁ କମ୍ ବିଶ୍ୱକପ ପ୍ରକୃତରେ ୨୦୨୦ ନଭେମ୍ବର ୨ରୁ ୨୧ ପର୍ଯ୍ୟନ୍ତ ହେବାର ଥିଲା। ମାତ୍ର କୋଭିଡ-୧୯ ଯୋଗୁ ଏହାକୁ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଛି। ବିଶ୍ୱବ୍ୟାପୀ ସ୍ବାସ୍ଥ୍ୟ ସଙ୍କଟ ଦେଖା ଦେଇଥିବାରୁ ଅନ୍ୟ ୪ଟି କନ୍ଫେଡେରେଶନ ଆଫ୍ରିକା, ୟୁରୋପ, ଦକ୍ଷିଣ ଆମେରିକା ଓ କନ୍କାକାଫ(ସେଣ୍ଟ୍ରାଲ ନର୍ଥ ଆମେରିକା ଓ କାରିବିୟନ) ଏପର୍ଯ୍ୟନ୍ତ ଯୋଗ୍ୟତା ପର୍ଯ୍ୟାୟ ଟୁର୍ନାମେଣ୍ଟ ଆୟୋଜନ କରିପାରି ନାହାନ୍ତି। ଚଳିତ ବର୍ଷ ଶେଷସୁଦ୍ଧା ଏହି କାର୍ଯ୍ୟ ସରିଯିବା ଆଶା ରହିଛି। ୪ଟି କନ୍ଫେଡେରେଶନରୁ ୩ଟି ଲେଖାଏ ଦଳ ଯୋଗ୍ୟତା ଅର୍ଜନ କରିବେ। ଭୁବନେଶ୍ୱରର କଳିଙ୍ଗ ଷ୍ଟାଡିୟମ, କୋଲକାତାର ସଲ୍ଟଲେକ୍, ଗୁଆହାଟୀର ଇନ୍ଦିରା ଗାନ୍ଧୀ ଆଥଲେଟିକ୍ ଷ୍ଟାଡିୟମ, ଅହମ୍ମଦାବାଦର ଏକ୍କା ଆରେନା ଓ ନଭି ମୁମ୍ବାଇର ଡି.ଓ୍ବାଇ. ପାଟିଲ ଷ୍ଟାଡିୟମରେ ମ୍ୟାଚ ଗୁଡ଼ିକ ଖେଳାଯିବ।
