ଭୁବନେଶ୍ୱର, ୨୧।୧୧(ବ୍ୟୁରୋ): ଏନ୍କାଉଣ୍ଟର ତଥା ବିଭିନ୍ନ ଆପରାଧିକ ମାମଲାରେ ସମ୍ପୃକ୍ତି ଅଭିଯୋଗରେ ଗିରଫ ହୋଇ ଝାରପଡ଼ା ଜେଲରେ ଥିବା ଗ୍ୟାଙ୍ଗଷ୍ଟର ରବି ରାଓଙ୍କ ଅପହରଣ ଯୋଜନା ଫସର ଫାଟିଛି। ଜେଲରୁ କୋର୍ଟ ଯିବା ବେଳେ ରବିଙ୍କୁ ଅପହରଣ କରିନେବାର ଯୋଜନା ରଚିଥିବା ୫ଜଣଙ୍କୁ ବୁଧବାର କମିଶନରେଟ ପୋଲିସ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ଖାରବେଳ ନଗର ଶାନ୍ତି ନଗରର ରଘୁ ବିଶ୍ୱାଳ, ପଶ୍ଚିମବଙ୍ଗ ମେଦିନାପୁର ଅଞ୍ଚଳର ସେକ୍ ଆମିନ ଓରଫ ତିଓ୍ବାରି ଓ ମୋତିବୁଲ୍ଲା, ପଶ୍ଚିମବଙ୍ଗ ହାଓଡ଼ା ମାଟିଆବୁର୍ଜର ଶିବୁ ଠାକୁର, ବେଗୁନିଆ ନୂଆସାହିର ପବିତ୍ର ମୋହନ ଦାସ ଓରଫ ସାନୁ। ସେମାନଙ୍କ ନିକଟରୁ ପୋଲିସ ଗୋଟିଏ ଦେଶୀ ପିସ୍ତଲ, ଗୋଟିଏ ଖେଳଣା ପିସ୍ତଲ, ୫ଟି ମୋବାଇଲ ଫୋନ୍, କଟୁରୀ ସମେତ ଲଙ୍କାଗୁଣ୍ଡ ପ୍ୟାକେଟ ଜବତ କରିଛି। ଏମାନେ ରବିଙ୍କ ମୁଖ୍ୟ ସହଯୋଗୀ ବୋଲି ପୋଲିସ କହିଛି।
ସୂଚନା ଅନୁଯାୟୀ, ଅଭିଯୁକ୍ତମାନେ ପୋଲିସକୁ ଆକ୍ରମଣ କରି ରବିଙ୍କୁ ଉଠାଇ ନେବା ପାଇଁ କିଛିଦିନ ତଳେ ଯୋଜନା କରିଥିଲେ। ବୁଧବାର ସକାଳେ ବାଙ୍କୁଆଳରେ ଏମାନେ ଏକାଠି ହୋଇ ଏହି ଯୋଜନାକୁ ଚୂଡ଼ାନ୍ତ ରୂପରେଖ ଦେବା ଓ ଡକାୟତି କରିବା ପାଇଁ ଆଲୋଚନା ଚଳାଇଥିଲେ। କମିଶନରେଟ ପୋଲିସର ସ୍ପେଶାଲ ସ୍କ୍ବାଡ୍କୁ କୌଣସି ସୂତ୍ରରୁ ଏ ନେଇ ସୂଚନା ମିଳିଥିଲା। ଏହାପରେ ସ୍ପେଶାଲ ସ୍କ୍ବାଡ୍ର ଅଧିକାରୀମାନେ ଶହୀଦନଗର ଥାନା ପୋଲିସ ସହଯୋଗରେ ସେଠାରେ ପହଞ୍ଚତ୍ ଚଢାଉ କରିଥିଲେ। ପୋଲିସ ହାତରେ ଏହି ୫ ଅଭିଯୁକ୍ତ ଧରାପଡ଼ିଥିଲେ। ସେମାନଙ୍କୁ ଗିରଫ କରି ଥାନାକୁ ଆଣିଥିଲା ପୋଲିସ। ଜେରା ବେଳେ ସେମାନଙ୍କଠାରୁ ଚମକାଇ ଦେଲା ଭଳି ତଥ୍ୟ ମିଳିଥିଲା। ଜେଲରୁ ରବିଙ୍କୁ କୋର୍ଟରେ ହାଜର ପାଇଁ ନିଆଯିବା ବେଳେ ସେମାନେ ପୋଲିସ କର୍ମଚାରୀଙ୍କ ଆଖିକୁ ଲଙ୍କାଗୁଣ୍ଡ ଫିଙ୍ଗି ଏବଂ ଆବଶ୍ୟକ ପଡ଼ିିଲେ ଗୁଳି ଚଳାଇ ରବିଙ୍କୁ ଛଡ଼ାଇ ନେବାକୁ ଯୋଜନା ରଚିଥିଲେ ବୋଲି ପୋଲିସ ନିକଟରେ କହିଥିଲେ। ଏପରି କି ଜେଲ ଗେଟ୍ ଏବଂ ଯେଉଁ ଟ୍ରାଫିକ ଛକ ଦେଇ ରବିଙ୍କୁ କୋର୍ଟ ନିଆଯିବ ସେସବୁ ସ୍ଥାନର ଭିଡିଓ ରେକର୍ଡିଂ କରିଥିଲେ। ଏହି ଅଭିଯୁକ୍ତମାନେ ଅନୁଗୋଳରେ ଘଟିଥିବା ଚୋରା କୋଇଲା କାରବାରକୁ ନେଇ ଗୁଳିକାଣ୍ଡ ମାମଲାରେ ରବିଙ୍କ ମୁଖ୍ୟ ସହଯୋଗୀ ଥିଲେ। ଏମାନଙ୍କ ନାମରେ ଭୁବନେଶ୍ୱର ସମେତ ବିଭିନ୍ନ ଥାନାରେ ବହୁ ଆପରାଧିକ ମାମଲା ରହିଛି। ଏମାନଙ୍କ ବିରୋଧରେ ଶହୀଦନଗର ଥାନାରେ କେସ୍ ନଂ. ୬୦୫/୧୯ ରୁଜୁ କରିଛି। ଜାମିନ ଆବେଦନ ଖାରଜ ହେବାରୁ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଅଧିକ ତଥ୍ୟ ସଂଗ୍ରହ ନିମନ୍ତେ ପଚରାଉଚରା ଲାଗି ଅଭିଯୁକ୍ତମାନଙ୍କୁ ରିମାଣ୍ଡରେ ଅଣାଯିବ ବୋଲି ପୋଲିସ କହିଛି।
