ଭୋପାଳ,୨୩ା୬: ଯୁବତୀ ଧନୀ ପରିବାରର ଓ ଯୁବକ ଜଣକ ଗରିବ। ଦୁହେଁ ପରସ୍ପରକୁ ଭଲପାଇ ବାହାହେବାକୁ ଚାହାନ୍ତି। ଭିଲାଲା ଜାତିର ଏହି ପ୍ରେମୀ ଯୁଗଳଙ୍କ ସମ୍ପର୍କ ସାମ୍ନାକୁ ଆସିବା ପରେ ଉଭୟଙ୍କୁ ନିର୍ଯାତନାର ଶିକାର ହେବାକୁ ପଡ଼ିଛି। ୨୦ ବର୍ଷୀୟା ଯୁବତୀଙ୍କ ପରିବାର ଲୋକେ ତାଙ୍କ ସହ ୨୨ ବର୍ଷୀୟ ଯୁବକଙ୍କୁ ଗୋରୁଙ୍କୁ ବନ୍ଧାଯାଉଥିବା ଦୁଇଟି ଖୁଣ୍ଟରେ ବାନ୍ଧି ମାଡ଼ ମାରି ଲହୁଲୁହାଣ କରିଦେଇଛନ୍ତି। ମଧ୍ୟପ୍ରଦେଶର ଅଲିରାଜପୁର ଜିଲା ଅମ୍ବୁଆ ଥାନା ଅଧୀନ କୁଣ୍ଡ ଗ୍ରାମରେ ଗତ ୧୬ ତାରିଖରେ ଘଟିଥିବା ଏହି କାଣ୍ଡର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ପୋଲିସ ନିଜଆଡ଼ୁ ମାମଲା ରୁଜୁ କରି ତଦନ୍ତ ଚଳାଇଛି। ଗ୍ରାମବାସୀ ସେମାନଙ୍କ ପ୍ରେମ ସମ୍ପର୍କ ଓ ପରେ ନିର୍ଯାତନା ନେଇ ଜାଣିବା ପରେ ବିବାଦ ସମାଧାନ କରିବାକୁ ଯୁବକଙ୍କ ବାପାଙ୍କୁ ୯୦ ହଜାର ଟଙ୍କା ମାଗିଥିଲେ। ସେ ପଞ୍ଚାୟତକୁ ୪୦ ହଜାର ଟଙ୍କା ଜରିମାନା ଦେଇଛନ୍ତି। ଏହି ଘଟଣାରେ ୪ ଅଭିଯୁକ୍ତଙ୍କୁ ଗିରଫ କରାଯାଇଛି।
