ଲାଠୋର, ୨୩ା୮(ଡି.ଏନ୍.ଏ.): ବଲାଙ୍ଗୀର ଜିଲା ତୁରେକେଲା ବ୍ଲକ କୁଇବାହାଲ ପଁଚେତ୍ ଅଧୀନ ବାଞ୍ଜିପାଲି ଗଁାର ଦିବ୍ୟାଙ୍ଗ ସୁରେନ୍ଦ୍ର ତାଣ୍ଡି। ମୋତେ ରୁଜ୍ଗାର ଯୁଗେଇ ଦିଆଯାଉ, ନାଇଁ ହେଲେ ଇଛା ମୁର୍ତୁ ଲାଗି ଅନୁମତି ଦିଆଯାଉ ବଲି ଟୁଇଟର ଜରିଆରେ ପ୍ରଧାନମନ୍ତ୍ରୀ ଆର ମୁଖ୍ୟମନ୍ତ୍ରୀକୁଁ ଗୁହାରି କରିଛନ୍।
ସୂଚନା ଅନ୍ସାରେ ସୁରେନ୍ଦ୍ର ଜନ୍ମୁ ଦିବ୍ୟାଙ୍ଗ ଆଏ। ବହୁତ୍ ବଛର ହେଲା ତାକର ବାପା ଘରଛାଡ଼ି ଉନିଆ କେନ୍ଆଡ଼େ ପଲେଇ ଯାଇଛନ୍। ଏନ୍ତାଥି ଘରର ସବୁ ବୋଝ୍ ତାକର ଉପରେ ରହିଛେ। ସୁରେନ୍ଦ୍ର ଉଚ ଶିକ୍ଷିତ ହେଇ ବି କାମ୍ଧଁଦା ଅଭାବୁ ଘରେ ବସି ରହିଛନ୍। ତାକର ଉପରେ ପରିବାର ଲୋକ୍ ରଖିଥିବାର ଅଶ୍ ଦିନୁଦିନ୍କେ ମହଲିବାରେ ଲାଗିଛେ। ପରିବାର କହେଲେ ମା’ ବହେନ୍ ଆର ଭାଇକେ ନେଇ ସେ ରହୁଛନ୍। ସରକାରୀ ସାହାଯ୍ କହେଲେ ପରିବାରକେ ମାସିକ୍ ମିଲୁଥିବାର ୩୫ କେ.ଜି. ଚାଉଲ, ମା’ ପାଉଥିବାର ୫ଶହ ଟଁକା ଭାତା ଆର ନିଜେ ପାଉଥିବାର ୭ଶହ ଟଁକା ଭିନ୍ନକ୍ଷମ ଭତା। ଯେନ୍ଟା ପରିବାର ଚଲବାରେ ନଅଁଟ୍ ହେଉଛେ। ଏନ୍ତାଥି ସେ କେନ୍ଥେଇ ପରିବାର ଚଲାବେ ସେ ଚିନ୍ତାରେ ଘାରି ହେଉଛନ୍। ଇଆଡ଼େ ଚାକ୍ରି ଖଁଡ଼େର ଲାଗି ଇ ଅଫିସ୍ରୁ ସେ ଅଫିସ୍ ନରଦି ନରଦି ନିରାଶ ହେଇଛନ୍। ଇ ଘଟନା ବାବ୍ଦେ ବରଗଡ଼ ଜିଲା ବିଜେପୁର ବ୍ଲକର ଝନେ ସାମାଜିକ କରମୀ ଦିବସ କୁମାର ସାହୁ ସୁରେନ୍ଦ୍ରକେ ସାହାଯ୍ କରବାର ଲାଗି ମୁଖ୍ୟମନ୍ତ୍ରୀ, ଓଡ଼ିଶା ଆର ବଲାଙ୍ଗୀର ଜିଲାପାଲକୁଁ ଟୁଇଟ୍ କରି ଅନୁରୋଧ୍ କରିଥିଲେ। ତାକର ଅନୁରୋଧ ଅନ୍ସାରେ ସିଏମ୍ଓରୁ ବଲାଙ୍ଗୀର ଜିଲାପାଲକୁଁ ଘଟନାର ତଦଁତ୍ କରବାକେ ନିରଦେଶ ଦିଆଯାଇଥିଲା। ଗଲା ଜୁନ୍ ୬, ୨୦୧୯ରେ କଣ୍ଟାବାଞ୍ଜି ତହସିଲଦାର ଆଲୋକ କୁମାର ମାଝି ଆର ତୁରେକେଲା ଗୋଷ୍ଠୀ ସାମାଜିକ ସୁରକ୍ଷା ଅଧ୍କାରୀ ହେମାନନ୍ଦ ବିଶ୍ୱାଲ ଘଟନାର ତଦଁତ୍ କରିଥିଲେ। ଟିଟିଲାଗଡ଼ ଉପଜିଲାପାଲକଁର କାର୍ଯ୍ୟାଲୟ ଚିଠି ସଂଖ୍ୟା ୧୯୩୧/ତା.୭ା୬ା୨୦୧୯ରେ ତଦଁତ୍ ରିପୋର୍ଟ ପଠାଯାଇଥିଲେ ବି ସୁରେନ୍ଦ୍ର କେହେନ୍ସି ପରକାର ଉପ୍କାର ନାଇଁପାଇ। ଶେଷେ ସୁରେନ୍ଦ୍ର ଉପେ ଶୂଇନ୍ ହେଇ ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ, ରାଜ୍ୟପାଳ ଆର ବଲାଙ୍ଗୀର ଜିଲାପାଲକୁଁ ସେ ନିଜେ ଟୁଇଟର ଜରିଆରେ ଗଲା ୨୮ା୭ା୨୦୧୯ରେ ରୁଜ୍ଗାର ଦିଆଯାଉ ନାଇଁ ହେଲେ ମୋତେ ଇଛା ମୁର୍ତୁ ଲାଗି ଅନୁମତି ଦିଆଯାଉ ବଲି ଅନୁରୋଧ୍ କରିଥିଲେ। ଠିକ୍ ତାର ଦୁଇ ଦିନ୍ ଉତାରୁ ୩୦ା୭ା୨୦୧୯ରେ ତୁରେକେଲା ବିଡିଓ ପ୍ରଭାତ କୁମାର ସାହୁ ଆର ଗୋଷ୍ଠୀ ସାମାଜିକ ସୁରକ୍ଷା ଅଧ୍କାରୀ ସୁରେନ୍ଦ୍ରକଁର ଘରେ ପୁହୁଁଚିଥିଲେ। ତାହାକୁ ବୁଝାସୁଝା କରିଥିଲେ। ଇ ବାବ୍ଦେ ତୁରେକେଲା ବିଡିଓକୁଁ ପଚ୍ରାଲାରୁ ଚାକିରିଟେ ଦେବାର ମୋର ପକ୍ଷେ ସମ୍ଭବ ନୁହେ। ମୁଇଁ ସବୁ ପରକାର ସୂଚନା ଉପର ଅଧ୍କାରୀକୁଁ ଦେଇଛେଁ, ସେମାନେ ଯାହା ପଦକ୍ଷେପ ନେବେ ବଲି ସେ କହିଥିଲେ।
