ବନ୍ତଳା,୧୯ା୧୧(ଡି.ଏନ.ଏ.) ଗେଟ୍ରେ ପଡ଼ୁଥିବା ତାଲାର ଡୁପ୍ଲିକେଟ୍ ଚାବିକୁ ନେଇ ପ୍ରଧାନ ଶିକ୍ଷକ ଓ ଅଙ୍ଗନଓ୍ବାଡି ଦିଦିଙ୍କ ମଧ୍ୟରେ କଳି ଯୋଗୁ ସୋମବାର ବନ୍ତଳା ଥାନା ବଡ଼କଣ୍ଟକୁଳ ପଞ୍ଚାୟତ ଜାମ୍ମୁଗାଡ଼ିଆ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ ଅପ୍ରୀତିକର ପରିସ୍ଥିତି ଉପୁଜିଥିଲା। ଏଥିଯୋଗୁ ଅଙ୍ଗନଓ୍ବାଡିର କୁନି କୁନି ପିଲାମାନଙ୍କୁ ଭୋକିଲା ରହିବାକୁ ପଡ଼ିଥିବା ବେଳେ ପ୍ରକଳ୍ପ ବିଦ୍ୟାଳୟର ଛାତ୍ରୀଛାତ୍ରମାନେ ଘଣ୍ଟା ଘଣ୍ଟା ଧରି ଗେଟ୍ ବାହାରେ ବସି ରହିଥିଲେ। ଖବରପାଇ ସିଆରସିସି ଓ ଗ୍ରାମବାସୀ ପହଞ୍ଚି ସମାଧାନ କରିବା ପରେ ମଧ୍ୟାହ୍ନ ୧୨ଟା ୨୦ରେ ଗେଟ୍ ତାଲା ଖୋଲାଯାଇଥିଲା।
ଘଟଣାରୁ ପ୍ରକାଶ ଯେ, ଗ୍ରାମରେ ଅଙ୍ଗନଓ୍ବାଡି ଗୃହ ନ ଥିବାରୁ ଜାମ୍ମୁଗାଡ଼ିଆ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟର ଗୋଟିଏ ଶ୍ରେଣୀଗୃହରେ ସକାଳ ୬ଟା ୩୦ ରୁ ୯ଟା ୩୦ ଯାଏ ଅଙ୍ଗନଓ୍ବାଡି ପିଲାଙ୍କୁ ପାଠ ପଢ଼ାଇବାକୁ ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଥିଲା। ଏଥିସହିତ ଗୋଟିଏ ଶ୍ରେଣୀଗୃହ ଓ ସ୍କୁଲ ଗେଟ୍ର ଚାବି ଅଙ୍ଗନଓ୍ବାଡି ଦିଦି ରଖିବା ପାଇଁ ନିର୍ଦ୍ଦେଶରେ ଉଲ୍ଲେଖ କରାଯାଇଥିଲା। କିନ୍ତୁ ଚାବି ରଖିବାକୁ ନେଇ ଅଙ୍ଗନଓ୍ବାଡି ଦିଦି ଓ ସହାୟିକାଙ୍କ ମଧ୍ୟରେ ବିବାଦ ଦେଖାଦେବାରୁ ଦିଦି ଏକ ଡୁପ୍ଲିକେଟ ଚାବି ତିଆରି କରି ସହାୟିକାଙ୍କୁ ଦେଇଥିଲେ। ଏ ନେଇ ସ୍କୁଲ ପ୍ରଧାନ ଶିକ୍ଷକ ଜାଣିବା ପରେ ଶନିବାର ଅଙ୍ଗନଓ୍ବାଡି ଦିଦିଙ୍କ ଠାରୁ ଅର୍ଜିନାଲ ଚାବି ନେଇଯାଇଥିଲେ। ସୋମବାର ସକାଳେ ଅଙ୍ଗନଓ୍ବାଡି ଦିଦି ଓ ସହାୟିକା ସ୍କୁଲକୁ ଆସିଥିବା ବେଳେ ଗେଟ୍ରେ ତାଲା ପଡିଥିଲା। ଡୁପ୍ଲିକେଟ ଚାବି ପାଖରେ ନ ଥିବାରୁ ଦୀର୍ଘ ସମୟ ଧରି ଶିଶୁମାନେ ବାହାରେ ବସିଥିଲେ। ଏଥିରେ କ୍ଷୁବ୍ଧ ହୋଇ ଦିଦି ଆଉ ଏକ ତାଲା ଆଣି ଗେଟ୍ରେ ପକାଇ ଦେଇଥିଲେ। ଫଳରେ ସ୍କୁଲ ଛାତ୍ରୀଛାତ୍ରମାନେ ମଧ୍ୟ ଭିତରକୁ ପଶି ନ ପାରି ବାହାରେ ବସି ରହିଥିଲେ। ଏ ନେଇ ପ୍ରଧାନଶିକ୍ଷକ ନିତ୍ୟାନନ୍ଦ ହୋତା କୁହନ୍ତି, ଦିଦିଙ୍କୁ ଗେଟ୍ର ଚାବି ଦିଆଯାଇଥିଲା। କିନ୍ତୁ ଦିଦି ଓ ସହାୟିକାଙ୍କ ମଧ୍ୟରେ ଗଣ୍ଡଗୋଳ ଘଟିବାରୁ ଦିଦି ବେଆଇନ ଭାବେ ଏକ ଡୁପ୍ଲିକେଟ ଚାବି ତିଆରି କରିଥିଲେ। ଏହା ଜାଣି ତାଙ୍କ ପାଖରୁ ଅର୍ଜିନାଲ ଚାବି ସେ ମାଗି ନେଇଥିଲେ। ଛୁଟି ପରେ ବିଦ୍ୟାଳୟ ପରିସରରେ ଅନ୍ୟମାନେ ପ୍ରବେଶ କରୁଥିବାରୁ ଦୋଷ ପ୍ରଧାନ ଶିକ୍ଷକଙ୍କ ଉପରକୁ ଯିବ। ତେଣୁ ତାଙ୍କ ପାଖରୁ ଚାବି ଆଣିବାକୁ ବାଧ୍ୟ ହେଲି। ଦିଦି ମମତା ଘଡେଇ କୁହନ୍ତି, ଗୋଟିଏ ଚାବି ଦେଇଥିଲେ। ଅସୁବିଧା ଜାଣି ସରପଞ୍ଚ ଓ ଅନ୍ୟ ସଦସ୍ୟମାନେ ଏକ ଡୁପ୍ଲିକେଟ ଚାବି କରିଥିଲୁ। କିନ୍ତୁ ତାହା ହଜି ଯାଇଥିବାରୁ ସୋମବାର ଗେଟ୍ରେ ପଡ଼ିଥିବା ତାଲା ସକାଳୁ ଖୋଲାଯାଇ ପାରି ନ ଥିଲା। ଫଳରେ ଛୋଟ ଛୋଟ ପିଲାଙ୍କୁ ଭୋକିଲା ପେଟରେ ରହିବାକୁ ପଡ଼ିଥିଲା। ତେଣୁ ବାଧ୍ୟ ହୋଇ ଆଉ ଏକ ତାଲା ପକାଇ ଦେଇଥିଲି। ସିଆର୍ସିସି ବିମଳ ନାଏକ କୁହନ୍ତି, ଗ୍ରାମବାସୀଙ୍କ ସହାୟତାରେ ବିବାଦର ସମାଧାନ ହେଲା। ପ୍ରଧାନଶିକ୍ଷକ ଆଉ ଏକ ନୂତନ ତାଲାର ଚାବି ଦେଇଛନ୍ତି। ଉଭୟ ଶିକ୍ଷା କମିଟି ଓ ମାତୃ କମିଟି ସହିତ ସରପଞ୍ଚ, ୱାର୍ଡମେମ୍ବର ବସି ଏହାର ସମାଧାନ କରିବା ପାଇଁ ନିର୍ଦ୍ଦେଶ ଦେଇଛନ୍ତି।
