ପୋଲିସ ଡିଜି ଦେଲେ ଅନୁମୋଦନ: ପିଟିସିରେ ପ୍ରଶିକ୍ଷଣ ନେବେ ଅଫିସର
8:25 amSeptember 8, 2019 / 21

ଅନୁଗୋଳ ଅଫିସ, ୮।୯ – ଅନୁଗୋଳ ସ୍ଥିତ ପୋଲିସ ପ୍ରଶିକ୍ଷଣ କେନ୍ଦ୍ର(ପିଟିସି)ରେ ଦୀର୍ଘ ବର୍ଷ ପରେ ପୋଲିସ ଅଫିସରମାନେ ପ୍ରଶିକ୍ଷଣ ନେବେ। ଏ ନେଇ ରାଜ୍ୟ ପୋଲିସ ମହାନିର୍ଦ୍ଦେଶକ ମୋହର ମାରିବା ପରେ ପିଟିସି ଚଳଚଞ୍ଚଳ ହୋଇପଡ଼ିଛି। ତେବେ ପିଟିସିରେ ପ୍ରଶିକ୍ଷଣ ନେଉଥିବା ୬୮୩ କନଷ୍ଟେବଳଙ୍କ ପାସିଂ ଆଉଟ ପରେଡ ଆସନ୍ତା ସପ୍ତାହରେ ଅନୁଷ୍ଠିତ ହେବା ପରେ ଅଫିସରମାନଙ୍କ ପ୍ରଶିକ୍ଷଣ ଆରମ୍ଭ ହେବ ବୋଲି ପିଟିସି ଅଧ୍ୟକ୍ଷ ତଥା ଡିଆଇଜି ନରସିଂହ ଭୋଳ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ଅନୁଗୋଳ ପିଟିସିରେ ରାଜ୍ୟର ବିଭିନ୍ନ ଅଞ୍ଚଳର ୩୫୩ ଜଣ ସବ୍‌ଇନ୍ସପେକ୍ଟର ତାଲିମ ଗ୍ରହଣ କରିବେ। ଶନିବାର ପୋଲିସ ଡିଜି ବିଜୟ କୁମାର ଶର୍ମା ଏହାକୁ ଅନୁମୋଦନ କରିଛନ୍ତି। ଓଡ଼ିଶା ପୋଲିସର କେନ୍ଦ୍ରୀୟ ମନୋନୟନ ବୋର୍ଡ ଶୁକ୍ରବାର ଏହି ୩୫୩ ଜଣ ଆସିଷ୍ଟାଣ୍ଟ ସବଇନ୍ସପେକ୍ଟରଙ୍କୁ ସବଇନ୍ସପେକ୍ଟର ଭାବେ ପଦୋନ୍ନତି ଦେଇଥିଲେ। ପଦୋନ୍ନତି ପାଇଥିବା ଅଫିସରଙ୍କ ମଧ୍ୟରେ ୨୭୩ ଜଣ ସାଧାରଣ ବର୍ଗର ଥିବାବେଳେ ୬୭ ଜଣ ଅନୁସୂଚିତ ଜାତି ଓ ୧୩ ଜଣ ଅନୁସୂଚିତ ଜନଜାତି ବର୍ଗର ଅଛନ୍ତି। ପଦୋନ୍ନତି ପାଇଥିବା ଏହି ଅଫିସରମାନେ ଅନୁଗୋଳ ପିଟିସି ଠାରେ ଛଅ ମାସ ପ୍ରଶିକ୍ଷଣ ଗ୍ରହଣ କରିବେ ବୋଲି ପିଟିସି ପକ୍ଷରୁ ସୂଚନା ମିଳିଛି। ଆସନ୍ତା ୧୫ ତାରିଖ ସୁଦ୍ଧା ପିଟିସି ଠାରେ ପହଞ୍ଚତ୍ବା ପରେ ସେମାନଙ୍କ ପ୍ରଶିକ୍ଷଣ ଆରମ୍ଭ ହେବ। ତେବେ ବର୍ତ୍ତମାନ ପିଟିସିରେ ମୋଟ ୯ ଜଣ ପ୍ରଶିକ୍ଷକ ରହିଛନ୍ତି। ସେମାନଙ୍କ ମଧ୍ୟରୁ ଜଣେ ଡିଏସ୍‌ପି ପାହ୍ୟାର ହୋଇଥିବାବେଳେ ଅନ୍ୟ ୮ ଜଣ ଇନ୍ସପେକ୍ଟର ପାହ୍ୟାର। ତେଣୁ ଅଫିସରମାନଙ୍କୁ ପଢ଼ାଇବା ପାଇଁ ଦୁଇ ଜଣ ଦକ୍ଷ ଡିଏସ୍‌ପି ପାହ୍ୟା ଓ ଦୁଇ ଜଣ ଦକ୍ଷ ଇନ୍ସପେକ୍ଟର ପାହ୍ୟାର ଅଫିସରଙ୍କୁ ପିଟିସିରେ ନିଯୁକ୍ତି କରିବାକୁ ଅଧ୍ୟକ୍ଷ ତଥା ଡିଆଇଜି ଭୋଳ ପୋଲିସ ବିଭାଗକୁ ଅବଗତ କରାଇଛନ୍ତି। ତେବେ ଅଫିସରମାନଙ୍କ ପ୍ରଶିକ୍ଷଣ କିଭଳି ଭଲ ହେବ ସେଥିପାଇଁ ପିଟିସିର ପ୍ରଶିକ୍ଷକ ଓ କର୍ମକର୍ତ୍ତାମାନେ ସଜାଗ ରହିଛନ୍ତି। ଦୀର୍ଘ ଦିନ ପରେ ପିଟିସିକୁ ଅଫିସରମାନଙ୍କ ପ୍ରଶିକ୍ଷଣ ପ୍ରଦାନ କରାଯାଇଥିବାରୁ ଅନୁଗୋଳବାସୀଙ୍କ ମଧ୍ୟରେ ଉତ୍ସାହ ଦେଖାଦେଇଛି।