ନୂଆଦିଲ୍ଲୀ,୧୨।୫ (ପି.ଟି.): ପୂର୍ବତନ ଜାତୀୟ ଟେବୁଲ ଟେନିସ ଚାମ୍ପିୟନ ମନ୍ମୀତ୍ ସିଂ ଓ୍ବାଲିଆ ୫୮ ବର୍ଷ ବୟସରେ କାନାଡାର ମଣ୍ଟ୍ରିଲ୍ରେ ମୃତ୍ୟୁ ବରଣ କରିଛନ୍ତି। ଗତ ଦୁଇବର୍ଷ ଧରି ସେ ଅସୁସ୍ଥତା ଦେଇ ଗତି କରୁଥିଲେ। ମୃତ୍ୟୁ ବେଳକୁ ତାଙ୍କ ସ୍ତ୍ରୀ ଓ ଦୁଇ ଝିଅ ଉପସ୍ଥିତ ଥିଲେ। ସୋମବାର ସେ ଶେଷ ନିଃଶ୍ୱାସ ତ୍ୟାଗ କରିଥିଲେ। ମନ୍ମୀତ୍ ଏଏଲ୍ଏସ୍ (ଆମ୍ୟୋଟ୍ରୋଫିକ ଲାଟେରାଲ ସ୍କେଲେରୋସିସ୍) ରୋଗରେ ପୀଡ଼ିିତଥିଲେ। ପୂର୍ବରୁ ସେ କୋଏମ୍ବାଟୁରରେ ଡାକ୍ତରଙ୍କ ପରାମର୍ଶ ଅନୁଯାୟୀ ଚିକିତ୍ସା କରାଉଥିଲେ।
୮୦ ଦଶକରେ ସେ ଶ୍ରେଷ୍ଠ ତଥା ସ୍ଥିର ପ୍ରଦର୍ଶନ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ। ୧୯୮୯ରେ ସେ ଜାତୀୟ ଚାମ୍ପିୟନ ହେବାର ଗୌରବ ଅର୍ଜନ କରିଥିଲେ। ସେତେବେଳେ ସେ ହାଇଦ୍ରାବାଦ୍ରେ ଅନୁଷ୍ଠିତ ଫାଇନାଲ ମ୍ୟାଚ୍ରେ ଏସ୍. ଶ୍ରୀରାମଙ୍କୁ ପରାସ୍ତ କରିଥିଲେ। ସେ ବିଭିନ୍ନ ଅନ୍ତର୍ଜାତୀୟ ଇଭେଣ୍ଟରେ ଦେଶ ତରଫରୁ ପ୍ରତିନିଧିତ୍ୱ କରିଥିଲେ। ୧୯୮୦ ଏସିଆନ ଚାମ୍ପିୟନଶିପ୍ରେ ୮ଥର ଜାତୀୟ ଚାମ୍ପିୟନ କମଳେଶ ମେହେଟାଙ୍କ ସହିତ ଅଂଶଗ୍ରହଣ କରିଥିଲେ। ତାଙ୍କ ଦେହାନ୍ତରେ କମଳେଶ ଶୋକ ଜାହିର କରିଛନ୍ତି। ଟେବୁଲ ଟେନିସ ଫେଡେରେଶନ ଅଫ୍ ଇଣ୍ଡିଆ (ଟିଟିଏଫ୍ଆଇ) ସାଧାରଣ ସମ୍ପାଦକ ଏମ୍.ପି. ସିଂ ମଧ୍ୟ ଶୋକ ପ୍ରକାଶ କରିଛନ୍ତି।
