ନୟାଗଡ଼ ଅଫିସ,୨୨।୯-ବିଦ୍ୟାଳୟ ପରିସରରେ ଥିବା ଖେଳପଡ଼ିଆରେ ବିଭିନ୍ନ ଖେଳ ଉପକରଣରେ ପିଲାମାନେ ମନଭରି ଖେଳିବା ଦୃଶ୍ୟ କିଛିଦିନ ହେଲା ଦେଖିବାକୁ ମିଳୁଛି। ଏବେ ଆମ ସରକାରୀ ପ୍ରାଥମିକ ବିଦ୍ୟାଳୟ ଖେଳପଡିଆରେ ଦୋଳି, ଟାୟାରରେ ଉପରକୁ ଚଢ଼ିବା, ଉଠାପକା, ଡିଆଡେଇଁ , ହାତୀ ପିଠି ଉପରେ ଚଢ଼ିବା ଆଦି ଖେଳ ଉପକରଣରେ ଖେଳିବାର ସୁଯୋଗ ପିଲାମାନଙ୍କୁ ମିଳିଛି। ଏହା ପିଲାଙ୍କ ଶାରୀରିକ ବିକାଶରେ ସହାୟକ ହେଉଛି। ଏଥିପ୍ରତି ପିଲାମାନେ ଆକୃଷ୍ଟ ହୋଇ ନିୟମିତ ସ୍କୁଲ ଆସିବାକୁ ଆଗ୍ରହ ପ୍ରକାଶ କରୁଥିବା ଜଣାଯାଇଛି। ଫଳରେ ସ୍କୁଲରେ ପିଲାଙ୍କ ଉପସ୍ଥାନ ହାର ବଢୁଥିବା କୁହାଯାଉଛି।
ଏହାର ଏକ ଦୃଷ୍ଟାନ୍ତ ନୟାଗଡ଼ ଜିଲା ନୂଆଗାଁ ବ୍ଲକ ଶିମିଳିସାହି ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ ଦେଖିବାକୁ ମିଳିଛି। ଏଠାରେ ପ୍ରଥମରୁ ଅଷ୍ଟମ ଶ୍ରେଣୀ ଯାଏ ୧୨୫ ଜଣ ଛାତ୍ରୀଛାତ୍ର ପାଠପଢନ୍ତି। ୧୨୫ ଛାତ୍ରୀଛାତ୍ରଙ୍କ ମଧ୍ୟରୁ କେବେ ବି ବିଦ୍ୟାଳୟରେ ପୂର୍ଣ୍ଣ ଉପସ୍ଥାନ ହୁଏ ନାହିଁ। ମାସେ ହେଲା ଏବେ ବିଦ୍ୟାଳୟରେ ଶତପ୍ରତିଶତ ଉପସ୍ଥାନ ଦେଖିବାକୁ ମିଳୁଛି। ଏହା ହୋଇପାରିଛି ବିଦ୍ୟାଳୟରେ ଉପରୋକ୍ତ ଖେଳ ଉପକରଣ ବ୍ୟବହାର ଯୋଗୁ। ଏଚ୍ଡିଏଫସି ବ୍ୟାଙ୍କର ସିଏସ୍ଆର ଅନୁଦାନ ଓ ସାମଗ୍ରିକ ଗ୍ରାମୀଣ ବିକାଶ ପରିଯୋଜନା, ନୟାଗଡ଼ ଗ୍ରାମବିକାଶ ସହାୟତାରେ ନୟାଗଡ ଜିଲାର ୬ଟି ପ୍ରାଥମିକ ବିଦ୍ୟାଳୟକୁ ଗତ ୧ମାସ ତଳେ ଖେଳ ଉପକରଣ ଯୋଗାଇ ଦିଆଯାଇଛି। ଏହି ଖେଳ ସାମଗ୍ରୀ ପିଲାମାନଙ୍କୁ ବିଦ୍ୟାଳୟ ପ୍ରତି ଆକୃଷ୍ଟ କରିବାରେ ଦେଖିବାକୁ ମିଳିଛି। ଛାତ୍ରୀଛାତ୍ରମାନଙ୍କ ମଧ୍ୟରେ ପ୍ରତିଦିନ ବିଦ୍ୟାଳୟକୁ ଆସି ପାଠ ପଢ଼ିବା ସହିତ ଖେଳ ଖେଳିବା ପାଇଁ ଆଗ୍ରହ ବଢୁଛି। ଏପରିକି ଖେଳ ପିରିୟଡ ଆସିଲେ (ଅପରାହ୍ନ ୩ଟା) ପିଲାମାନେ ଲାଇନ୍ରେ ଛିଡ଼ା ହୋଇ ପାଳି କରି ଖେଳ ସାମଗ୍ରୀରେ ଖେଳୁଥିବାର ଦେଖିବାକୁ ମିଳୁଛି। କିଛି ମାସ ତଳେ ଯେଉଁଠି କମ୍ ପିଲା ଆସୁଥିଲେ ବର୍ତ୍ତମାନ ସେଠାରେ ଶତପ୍ରତିଶତ ଉପସ୍ଥାନ ହେଉଛି ବୋଲି ଶିମିଳିସାହି ବିଦ୍ୟାଳୟର ପ୍ରଧାନ ଶିକ୍ଷକ ପୂର୍ଣ୍ଣଚନ୍ଦ୍ର ଘଡ଼େଇ ପ୍ରକାଶ କରିଛନ୍ତି। ଜିଲାର ୬ଟି ବିଦ୍ୟାଳୟରେ ଏହିଭଳି ବ୍ୟବସ୍ଥା କରାଯାଇଛି। ନୟାଗଡ଼ ବ୍ଲକର ଇକିରି ପ୍ରାଥମିକ ବିଦ୍ୟାଳୟ ଓ ଉଦୟପୁର ପ୍ରାଥମିକ ବିଦ୍ୟାଳୟ, ଓଡ଼ଗାଁ ବ୍ଲକର ପଦ୍ମାଦେଇପୁର ଓ ଭାଡ଼ିକିଳା ପ୍ରାଥମିକ ବିଦ୍ୟାଳୟ , ଖଣ୍ଡପଡ଼ା ବ୍ଲକ ବିରିଡ଼ିହି ପ୍ରାଥମିକ ବିଦ୍ୟାଳୟରେ ଖେଳ ଉପକରଣ ଯୋଗାଇ ଦିଆଯାଇଛି। ଛାତ୍ରୀଛାତ୍ରମାନଙ୍କର ଶାରୀରିକ ବିକାଶ ପାଇଁ ଆନ୍ଥହିଲ୍ କ୍ରିଏଶନ୍ ସଂସ୍ଥା ବାଙ୍ଗାଲୋରର ବୈଷୟିକ ପରାମର୍ଶରେ ପୁରୁଣା ମୋଟର ଟାୟାରକୁ ବ୍ୟବହାର କରାଯାଇ ଏହି ଖେଳ ଯନ୍ତ୍ରପାତିଗୁଡ଼ିକ ନିର୍ମାଣ କରାଯାଇଥିବା ଗ୍ରାମ ବିକାଶ ପକ୍ଷରୁ ସୂଚନା ଦିଆଯାଇଛି। ସମସ୍ତ ବିଦ୍ୟାଳୟର ଛାତ୍ରୀଛାତ୍ରମାନେ ଖେଳ ପିରିୟଡରେ ଖେଳ ଉପକରଣରେ ଭରପୂର ମଜା ନେଉଥିବା ଦେଖିବାକୁ ମିଳିଛି। ସରକାରୀ ବିଦ୍ୟାଳୟରେ ବେସରକାରୀ ବିଦ୍ୟାଳୟ ଭଳି ଖେଳିବାରେ ସୁବିଧା ମିଳୁ ଥିବାରୁ ଆଗାମୀ ଦିନରେ ଏହିଭଳି ବ୍ୟବସ୍ଥା ଜିଲାର ସମସ୍ତ ବିଦ୍ୟାଳୟରେ କରାଗଲେ ଛାତ୍ରୀଛାତ୍ରମାନେ ବିଦ୍ୟାଳୟମୁହଁା ହେବେ ବୋଲି ବୁଦ୍ଧିଜୀବୀମାନେ ଆଶା ବ୍ୟକ୍ତ କରିଛନ୍ତି।
