ନୂଆଦିଲ୍ଲୀ,୧।୪: କରୋନା ଭାଇରସ୍ ବିରୋଧରେ ଜାରି ରହିଥିବା ଲଢ଼େଇରେ ସାରା ଦେଶରୁ ସହାୟତାର ହାତ ବଢ଼ିଛି। ଇତିମଧ୍ୟରେ ସୁପ୍ରମିକୋର୍ଟର ପୂର୍ବତନ ବିଚାରପତି ଦୀପକ ବର୍ମା ବୁଧବାର ପିଏମ୍ କେୟାର୍ସ ଫଣ୍ଡକୁ ୫୧ଲକ୍ଷ ଟଙ୍କା ଦାନ କରିଥିବା ଜଣାପଡ଼ିଛି। କରୋନା ଭାଇରସ୍ ଯୋଗୁ ଯେଉଁମାନେ ବେରୋଜଗାର ହୋଇ ସହରରୁ ଗାଁମୁହାଁ ହେଉଛନ୍ତି ସେମାନଙ୍କ ସହୟତା ପାଇଁ ଦୀପକ ବର୍ମା ଏହି ରାଶି ପ୍ରଦାନ କରିଛନ୍ତି। ଏଥିସହ ବିଚାରପତି ବର୍ମା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏକ ଭାବପୂର୍ଣ୍ଣ ଚିଠି ଲେଖିଛନ୍ତି। ସେ ଚିଠିରେ ଉଲ୍ଲେଖ କରିଛନ୍ତି ଯେ, ବେଳ ଥାଉଁ ଦେଶରେ କରୋନା ଭାଇରସ୍କୁ ରୋକିବା ପାଇଁ ପ୍ରଧାନମନ୍ତ୍ରୀ ଯେଉଁ ଯେଉଁ ଉଚିତ ପଦକ୍ଷେପ ଗ୍ରହଣ କରିଛନ୍ତି ତାହା ଅତ୍ୟନ୍ତ ପ୍ରଶଂସନୀୟ। ଏଥିସହ ଦେଶରେ ଜାରି ହୋଇଥିବା ଲକ୍ଡାଉନ୍ ଯୋଗୁ ସହରରେ କାମଧନ୍ଦା ସବୁ ବନ୍ଦ ହୋଇଯାଇଛି। ଫଳରେ ହଜାର ହଜାର ଶ୍ରମିକ ଓ ଦିନ ମଜୁରିଆମାନେ ବେରୋଜଗାର ହୋଇ ନିଜ ପରିବାର ସହ ଚାଲି ଚାଲି ଗାଁକୁ ଫେରିବା ପାଇଁ ବାଧ୍ୟ ହେଉଛନ୍ତି। ଏହି ସମୟରେ ଏମାନଙ୍କ ଏଭଳି ଦୁର୍ଦ୍ଦଶାକୁ ଦେଖି ବିଚାରପତି ବର୍ମା ଚିନ୍ତା ପ୍ରକଟ କରିଛନ୍ତି। ତେଣୁ ତାଙ୍କର ଏହି ଛୋଟ ଯୋଗଦାନ ସେମାନଙ୍କର କିଛି ସହାୟତା କରିପାରିବ ବୋଲି ବିଚାରପତି କହିଛନ୍ତି।
