ଭୁବନେଶ୍ୱର, ୬-୯(ବ୍ୟୁରୋ): ସାରା ଦେଶରେ ନିଯୁକ୍ତି ସୃଷ୍ଟି କ୍ଷେତ୍ରରେ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମ୍ଏସ୍ଏମ୍ଇ) ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି। ଦେଶର ଅର୍ଥନୈତିକ ବିକାଶ କ୍ଷେତ୍ରରେ ଏହି ସଂସ୍ଥାଗୁଡିକର ଯୋଗଦାନ ଅତୁଳନୀୟ। ସରକାର ଉଦ୍ୟୋଗୀଙ୍କୁ ପ୍ରୋତ୍ସାହନ କରିବା ଦିଗରେ ବିଭିନ୍ନ ପଦକ୍ଷେପ ନେଉଛନ୍ତି। ଏଭଳି ସ୍ଥିତିରେ ଶିଳ୍ପ ସଂସ୍ଥା ସ୍ଥାପନ ଲାଗି ଉଦ୍ୟୋଗୀଙ୍କୁ ସହାୟତା କରିବା ଦିଗରେ ବ୍ୟାଙ୍କଗୁଡିକ ଆଗେଇ ଆସିବାକୁ କେନ୍ଦ୍ର ଏମ୍ଏସ୍ଏମ୍ଇ ରାଷ୍ଟ୍ରମନ୍ତ୍ରୀ ପ୍ରତାପ ଷଡଙ୍ଗୀ ଆହ୍ବାନ ଜଣାଇଛନ୍ତି।
ସ୍ଥାନୀୟ ଏକ ହୋଟେଲରେ ଖଦି ଏବଂ ଗ୍ରାମୋଦ୍ୟୋଗ କମିଶନ(କେଭିଆଇସି) ପକ୍ଷରୁ ଅନୁଷ୍ଠିତ ରାଜ୍ୟସ୍ତରୀୟ ପ୍ରଧାନମନ୍ତ୍ରୀ ନିଯୁକ୍ତି ସୃଷ୍ଟି କାର୍ଯ୍ୟକ୍ରମ(ପିଏମ୍ଇଜିପି) କର୍ମଶାଳାରେ ମୁଖ୍ୟ ଅତିଥି ଭାବେ ଯୋଗଦେଇ ଷଡଙ୍ଗୀ କହିଛନ୍ତି, ସଂସ୍ଥାଗୁଡିକ କିଭଳି ଭଲ ଭାବେ ଋଣ ପାଇ ପାରିବେ ସେ ଦିଗରେ ବ୍ୟାଙ୍କ ଯନତ୍ବାନ ହେବା ଆବଶ୍ୟକ। ଏହି ଯୋଜନାରେ ଧାର୍ଯ୍ୟ ଲକ୍ଷ୍ୟ ମଧ୍ୟରୁ ଅଧିକରୁ ଅଧିକ ଋଣ ପ୍ରଦାନ ପାଇଁ ବ୍ୟାଙ୍କ ଆଗେଇ ଆସନ୍ତୁ ବୋଲି ସେ ମତ ଦେଇଛନ୍ତି। ସଂସ୍ଥାଗୁଡିକ ବିଭିନ୍ନ ସମୟରେ ଋଣ ଲାଭ କରିବାକୁ ଅସୁବିଧାର ସାମ୍ନା କରୁଛନ୍ତି। ଅପରପକ୍ଷରେ ଧାର୍ଯ୍ୟ ଲକ୍ଷ୍ୟଠାରୁ ବ୍ୟାଙ୍କଗୁଡିକ ଋଣ ପ୍ରଦାନ ହାରକୁ ଆହୁରି ଉନ୍ନତ କରିବାକୁ ହେବ। ସଂସ୍ଥାଗୁଡିକ ନିଯୁକ୍ତିକୁ ପ୍ରୋତ୍ସାହିତ କରୁଥିବାରୁ ସେମାନେ ଉତ୍ସାହିତ ହେଲେ ଅଧିକ ହାରରେ ନିଯୁକ୍ତି ସୃଷ୍ଟି ଦିଗରେ କାର୍ଯ୍ୟ କରିବେ। ଏହା ରାଜ୍ୟ ତଥା ଦେଶର ବିକାଶ ଦିଗରେ ସହାୟକ ହୋଇ ପାରିବ ବୋଲି ଷଡଙ୍ଗୀ କହିଛନ୍ତି। ଏ ଦିଗରେ ମିଳିତ ହୋଇ କାର୍ଯ୍ୟ କରିବାକୁ ବ୍ୟାଙ୍କ, ବିତ୍ତୀୟ ପ୍ରତିଷ୍ଠାନ ଏବଂ ଅଂଶୀଦାରଙ୍କୁ ସେ ଆହ୍ବାନ ଜଣାଇଛନ୍ତି।
ସେହିଭଳି ପିଏମ୍ଇଜିପିରେ ଆସୁଥିବା ପ୍ରସ୍ତାବଗୁଡିକ ଉପରେ ବ୍ୟାଙ୍କଗୁଡିକ ତ୍ୱରିତ ମଞ୍ଜୁରୀ ପ୍ରଦାନ କରିବା ନେଇ କେଭିଆଇସିର ରାଜ୍ୟ ନିର୍ଦ୍ଦେଶକ ସମୀର କୁମାର ମହାନ୍ତି ମତପ୍ରକାଶ କରିଛନ୍ତି। କାର୍ଯ୍ୟକ୍ରମରେ ଖଦି ଏବଂ ଗ୍ରାମୋଦ୍ୟୋଗ କମିଶନର ସଭାପତି ସଂଗ୍ରାମ କେଶରୀ ପାଇକରାଏ, ଶିଳ୍ପ ନିର୍ଦ୍ଦେଶକ ପ୍ରଣବ ଜ୍ୟୋତି ନାଥ, ଏସ୍ଏଲ୍ବିସି କନଭେନର ଟି.ଆର. ଚୋକଲିଙ୍ଗମ, କେଭିଆଇସି ଡେପୁଟି ଡାଇରେକ୍ଟର ପି.କେ ଶତପଥୀ ପ୍ରମୁଖ ଯୋଗ ଦେଇ ପିଏମ୍ଇଜିପିର ବିଭିନ୍ନ ଦିଗ ଉପରେ ଗୁରୁତ୍ୱାରୋପ କରିଥିଲେ। ଏଥିରେ ବ୍ୟାଙ୍କଗୁଡିକର ସ୍ଥାନୀୟ ମୁଖ୍ୟ, ଜିଲା ସ୍ତରରୁ ପ୍ରବନ୍ଧକ, ଡିଆଇସି, ଆରଆଇସିର ସାଧାରଣ ପ୍ରବନ୍ଧକ, ରିଜର୍ଭ ବ୍ୟାଙ୍କ, ନାବାର୍ଡ, ସିଡବି, କୟରବୋର୍ଡ, ଖଦି ଏବଂ ଗ୍ରାମୋଦ୍ୟୋଗ ବୋର୍ଡ, ଏନ୍ଏସ୍ଆଇସି, ସିଟିଟିସି ଏବଂ ଏମ୍ଏସ୍ଏମ୍ଇ ଡିଆଇର ପ୍ରତିନିଧି ମାନେ ଉପସ୍ଥିିତ ଥିଲେ।
