କେନ୍ଦୁଝର,୯ା୪(ସ୍ବ.ପ୍ର.)-ଛତିଶଗଡରୁ ପୁରୀ ଦେଇ କେନ୍ଦୁଝର ଜିଲାକୁ ଆସି ସଦର ବ୍ଲକ ପଳାଶପଙ୍ଗା ନିକଟ ସନ୍ଥେଭଞ୍ଜ ପାହାଡ଼ ଖୋଲରେ ଆମତ୍ଗୋପନ କରିଥିବା ଜଣେ ଯୁବକଙ୍କୁ ପୋଲିସ ଉଦ୍ଧାର କରି ସଙ୍ଗରୋଧ କେନ୍ଦ୍ରକୁ ପଠାଇଛି। ଯୁବକ ଜଣକ ହେଲେ ଛତିଶଗଡ ରାଜ୍ୟର କ୍ଷେମରାଜ ପଟେଲ (୨୪)। ସେ ତାଙ୍କ କେତେକ ସହଯୋଗୀଙ୍କ ସହ ମିଶି ପଳାଶପଙ୍ଗା ନିକଟସ୍ଥ ସନ୍ଥେଭଞ୍ଜ ପାହାଡ଼ ଖୋଲରେ ଗତ କିଛିଦିନ ହେବ ଆମତ୍ଗୋପନ କରିଥିଲେ। ଉକ୍ତ ପାହାଡ଼ ଜନବସତିଠାରୁ ଦୂରରେ ଅବସ୍ଥିତ ଥିବାରୁ ଲକ୍ଡାଉନ ଭୟରେ ସେମାନେ ସେଠାରେ ଲୁଚି ରହିଥିବା ଚର୍ଚ୍ଚା ହେଉଛି। ଉକ୍ତ ପାହାଡଖୋଲ ବିପଦପୂର୍ଣ୍ଣ ଥିବାରୁ ସେମାନଙ୍କର ଅବସ୍ଥିତି ଜାଣି ମଧ୍ୟ ସ୍ଥାନୀୟ ଲୋକେ ସେମାନଙ୍କ ପାଖକୁ ଯିବାକୁ ସାହାସ ଜୁଟାଇ ପାରି ନ ଥିଲେ। କରୋନା ପାଇଁ ଲକଡାଉନ ଘୋଷଣା ହୋଇ ବାହାରକୁ ବାହାରିବା ନେଇ କଟକଣା ଲାଗୁ ହୋଇଥିବାରୁ ସ୍ଥାନୀୟ ଲୋକ ସେମାନଙ୍କ ପାଖକୁ ଯାଇ ପାରୁ ନ ଥିଲେ ା ରାତିରେ ଉକ୍ତ ପାହାଡ଼ରୁ ଲାଇଟ ଦେଖାଯିବା ଓ ଦିନରେ ସେମାନେ ପାହାଡ଼ରୁ ତଳକୁ ଯିବା ଆସିବା କରୁଥିବା କେତେକ ଲୋକ ଦେଖି ସନ୍ଦେହ କରିଥିଲେ। ବୁଧବାର ସେମାନଙ୍କ ମଧ୍ୟରୁ କ୍ଷେମରାଜ ଖାଦ୍ୟ ସଂଗ୍ରହ ଲାଗି ପଳାଶପଙ୍ଗା ବଜାରକୁ ଆସିଥିବା ବେଳେ ସ୍ଥାନୀୟ ଲୋକେ ତାଙ୍କୁ ଅଟକ ରଖି ପୋଲିସକୁ ଖବର ଦେଇଥିଲେ। ପଳାଶପଙ୍ଗା ବିଟହାଉସ ପୋଲିସ ପହଞ୍ଚିି ତାଙ୍କୁ ଗାଡ଼ିରେ ବସାଇ ପ୍ରଥମେ ଝୁମ୍ପୁରା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ସ୍ବାସ୍ଥ୍ୟ ପରୀକ୍ଷା କରାଇଥିଲେ। ପରେ ପଳାଶପଙ୍ଗା ସନ୍ଥେଭଞ୍ଜ ସରକାରୀ ଉଚ୍ଚ ବିଦ୍ୟାଳୟରେ ଥିବା ସଙ୍ଗରୋଧ କେନ୍ଦ୍ରରେ ରଖିଥିଲେ। ସେ ଭୋକିଲା ଥିଲେ ଏବଂ ହିନ୍ଦୀରେ କଥାବାର୍ତ୍ତା କରୁଥିଲେ। ଉକ୍ତ ପାହାଡ଼ରେ ଅନ୍ୟମାନେ ଥିବା ଓ ସେମାନେ ତାଙ୍କୁ ଖାଇବାକୁ ଦେଲେନାହିଁ ବୋଲି ସେ ତଳକୁ ଖାଇବା ପାଇଁ ଆସିଥିବା ସ୍ଥାନୀୟ ଲୋକଙ୍କ ଆଗରେ ପ୍ରକାଶ କରିଛନ୍ତି। ତେବେ ଉକ୍ତ ଯୁବକ ଓ ତାଙ୍କ ସହଯୋଗୀମାନେ ଛତିଶଗଡରୁ ପୁରୀ ଦେଇ ପଳାଶଙ୍ଗା ଆସିବା ପଛର କାରଣ କ’ଣ ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଜିଲା ପ୍ରଶାସନ ତୁରନ୍ତ ଏ ଦିଗରେ ଧ୍ୟାନ ଦେବାକୁ ସାଧାରଣରେ ଦାବି ହେଉଛି ା ଉକ୍ତ ପାହାଡ଼ରେ ରହୁଥିବା ଅନ୍ୟମାନଙ୍କ ସମ୍ପର୍କରେ ଯାଞ୍ଚ କରାଯିବ ବୋଲି ଡିଏସପି ଇନ୍ଦୁପ୍ରଭା ପଶ୍ଚିମକବାଟ କହିଛନ୍ତି।
