ନୟାଗଡ଼ ଅଫିସ,୪ା୧୧: ଦିନେ ପରିତ୍ୟକ୍ତ ହୋଇପଡିଥିବା ପୋଖରୀ ଏବେ ପାର୍କର ଭ୍ରମ ସୃଷ୍ଟି କରୁଛି। ପୋଖରୀ ସଫା କରାଯିବା ସହିତ ହୁଡ଼ାରେ ବିଭିନ୍ନ ପ୍ରକାର ଫୁଲ ଓ ଫଳଗଛ ଲଗାଯାଇଛି। ଆବର୍ଜନା ପକାଇବା ପାଇଁ ୫ଟି କୁଣ୍ଡ ରଖାଯାଇଛି। ସେହିଭଳି ଅବସର ବିନୋଦନ ଲାଗି ପୋଖରୀ କୂଳରେ ସିମେଣ୍ଟ ବେଞ୍ଚ ସ୍ଥାପନ କରାଯାଇଛି। ଏଭଳି ଚିତ୍ର କୌଣସି ସହର ନୁହେଁ, ନୟାଗଡ଼ ବ୍ଲକ ଜେମାଦେଈପୁରପାଟଣା ପଞ୍ଚାୟତ ରଘୁନାଥପ୍ରସାଦ ଗ୍ରାମରେ ଦେଖିବାକୁ ମିଳିଛି।
ପ୍ରକାଶ ଯେ, ରଘୁନାଥପ୍ରସାଦ ଗ୍ରାମରେ ୧୭୩ ପରିବାର ବସବାସ କରନ୍ତି। ଗ୍ରାମର ଲୋକମାନେ ଗାଧୋଇବା ଓ ଅନ୍ୟାନ୍ୟ କାର୍ଯ୍ୟ ପାଇଁ ଗ୍ରାମରେ ଥିବା ଦୁଇଟି ପୋଖରୀ ଉପରେ ନିର୍ଭର କରିଥାନ୍ତି। ଗାଁ ମଝିରେ ଥିବା ପୋଖରୀରେ ପୂର୍ବରୁ ପାହଚ ଠିକ୍ ନ ଥିବାବେଳେ ଖରାଦିନେ ପାଣି ଶୁଖିଯାଉଥିଲା। ପୋଖରୀ ହୁଡ଼ା ଠିକ୍ ନ ଥିବାରୁ ବର୍ଷାଦିନେ ଗ୍ରାମର ମଇଳା ପାଣି ପୋଖରୀରେ ପଶୁଥିଲା। ଏହା ଦ୍ୱାରା ପୋଖରୀ ପାଣି ଦୂଷିତ ହେଉଥିଲା। ଏହାକୁ ବ୍ୟବହାର କରି ଲୋକମାନେ ଚର୍ମରୋଗରେ ଶିକାର ହେଉଥିଲେ। ଚଳିତ ବର୍ଷ ଗ୍ରାମ ବିକାଶ ଓ ଏଚ୍ଡିଏଫ୍ସି ବ୍ୟାଙ୍କ ପରିବର୍ତ୍ତନର ସାମଗ୍ରିକ ଗ୍ରାମୀଣ ବିକାଶ ପରିଯୋଜନାରେ ଗ୍ରାମର ଥିବା ଏହି ପୋଖରୀର ପୁନରୁଦ୍ଧାର ଓ ନବୀକରଣ କାର୍ଯ୍ୟ କରାଯାଇଛି। ପୋଖରୀକୁ ଗଭୀର କରାଯିବା ସହ ହୁଡ଼ା ଉଚ୍ଚା କରାଯାଇଛି। ପାହଚ ମରାମତି କାର୍ଯ୍ୟ ମଧ୍ୟ ହୋଇଛି। ସେହିଭଳି ପୋଖରୀ ସୁନ୍ଦର ଦେଖାଯିବା ପାଇଁ ଉପରୋକ୍ତ କାର୍ଯ୍ୟକ୍ରମ ହାତକୁ ନିଆଯାଇଥିଲା। ହୁଡ଼ାରେ ୮୦ଟି ନଡ଼ିଆ ଗଛ ଲଗାଯିବା ସହିତ ପୋଖରୀରେ ମାଛ ଯାଅଁଳ ଛଡ଼ାଯାଇଛି। ଗ୍ରାମରେ କମିଟି କରାଯାଇ ଏହାର ତଦାରଖ କରିବା ପାଇଁ ନିଷ୍ପତ୍ତି ନିଆଯାଇଛି। ଆଗାମୀ ଦିନରେ ଏଥିରୁ ଆଦାୟ ହେବାକୁ ଥିବା ଟଙ୍କା ଦ୍ୱାରା ଗ୍ରାମ୍ୟ ସମୂହ ଉନ୍ନୟନ ପାଣ୍ଠି ବୃଦ୍ଧି ପାଇବ। ପୋଖରୀ ହୁଡ଼ାକୁ ସମ୍ପୂର୍ଣ୍ଣ ମଳମୁକ୍ତ କରାଯାଇଛି। ଜଳର ସ୍ଥାୟିତ୍ୱ ଆମର ଦାୟିତ୍ୱ ନାରା ଦେଇ ଜଳକୁ ସଂରକ୍ଷଣ କରି ରଖାଯାଇଛି। ଗାଁ ଲୋକଙ୍କ ଏକତା ଓ ଉଦ୍ୟମ ବିକାଶମୂଳକ ଯୋଜନାକୁ ସଫଳ ରୂପାୟନ କରିବା ଦିଗରେ ସହାୟକ ହୋଇଛି। ଆଗାମୀ ଦିନରେ ଏହିଭଳି କାର୍ଯ୍ୟକ୍ରମ ଜିଲାର ଅନ୍ୟ ଗ୍ରାମରେ ଥିବା ପୋଖରୀମାନଙ୍କରେ କରାଯିବ ବୋଲି ଗ୍ରାମବିକାଶ ପ୍ରକଳ୍ପ ସଂଯୋଜକ ପବିତ୍ର ମୋହନ ସାହୁ ସୂଚନା ଦେଇଛନ୍ତି।
