ଶ୍ରୀନଗର:୨।୮: ଜମ୍ମୁ-କଶ୍ମୀର ଘାଟିରେ ପାକିସ୍ତାନ ସେନା ଓ ଆତଙ୍କବାଦୀଙ୍କ ଅନୁପ୍ରବେଶକୁ ନେଇ ଲାଗିରହିଥିବା ଅଶାନ୍ତ ପରିସ୍ଥିତିର ମୁକାବିଲା କରିବାକୁ ଯାଇ ଶୁକ୍ରବାର ଶ୍ରୀନଗରରେ ସେନା ଓ ପୋଲିସ ପକ୍ଷରୁ ଏକ ମିଳିତ ଖବରଦାତା ସମ୍ମିଳନୀ ଆୟୋଜନ କରାଯାଇଥିଲା। ଏଥିରେ ସେନା କମାଣ୍ଡର ଲେଫ୍ଟନାଣ୍ଟ ଜେନେରାଲ କେ.ଜେ.ଏସ୍ ଧିଲୋନ କହିଛନ୍ତି, କଶ୍ମୀରରେ ହେଉଥିବା ଆତଙ୍କବାଦୀ ଘଟଣା ପଛରେ ପାକିସ୍ତାନୀ ସେନା ଓ ଆଇଏସ୍ଆଇର ହାତ ରହିଛି। ଏ ସମସ୍ତ ଘଟଣା ପାଇଁ ଏମୋନେ ହିଁ ଦାୟୀ ବୋଲି ସେନା କମାଣ୍ଡର କହିଛନ୍ତି। ଏଥିସହ ପାକିସ୍ତାନ ଚଳିତ ବର୍ଷ ଅମରନାଥ ଯାତ୍ରାରେ ବଡ଼ ଧରଣର ଆକ୍ରମଣ ପାଇଁ ଷଡଯନ୍ତ୍ର ରଚିଥିଲା। ଯେଉଁ ଯୋଜନାକୁ ପଣ୍ଡ କରିବାରେ ଭାରତୀୟ ସୁରକ୍ଷାକର୍ମୀ ସଫଳ ହୋଇଛନ୍ତି। ଅମରନାଥ ଯାତ୍ରା ରାସ୍ତାରେ ଏକ ସ୍ଥାନରୁ ଏମ୍-୨୪ ଆମେରିକା ସ୍ନିପର ରାଇଫଲ୍ ଓ ଦୂରବୀକ୍ଷଣ ଯନ୍ତ୍ରକୁ ପୋଲିସ ପକ୍ଷରୁ ଜବତ କରାଯାଇଛି ବୋଲି ଧିଲୋନ କହିଛନ୍ତି। ଏଥିସହ କଶ୍ମୀରରେ ଆତଙ୍କବାଦୀଙ୍କ ଗତିବିଧି ଉପରେ ସେନା ପକ୍ଷରୁ ନଜର ରଖାଯାଇଥିବା ନେଇ ସେ ସୂଚନା ଦେଇଛନ୍ତି। ଅପରପକ୍ଷରେ ପୋଲିସ ଡିଜିପି ଦିଲ୍ବାଗ ସିଂହ କହିଛନ୍ତି, କଶ୍ମୀରରେ ସ୍ଥାନୀୟ ଯୁବକ ଆତଙ୍କବାଦୀ ହେଉଥିବା ମାମଲା ଏବେ ହ୍ରାସ ପାଇଛି। ଆତଙ୍କବାଦୀ ହେଉଥିବା ବହୁ କଶ୍ମୀର ଯୁବକ ଏବେ ନିଜ ଘରକୁ ଫେରିଯାଇଛନ୍ତି ବୋଲି ପୋଲିସ ଡିଜିପି କହିଛନ୍ତି। ଅପରପକ୍ଷରେ ଆତଙ୍କବାଦୀ ଆକ୍ରମଣ ସନ୍ଦେହ ନେଇ ଅମରନାଥ ଯାତ୍ରୀଙ୍କୁ ତୁରନ୍ତ ଯାତ୍ରା ସାରି ଫେରିଯିବାକୁ ସରକାରଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଛି।
