ନୂଆଦିଲ୍ଲୀ, ୨୦।୭: ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ତଥା କଂଗ୍ରେସ ନେତ୍ରୀ ଶିଲା ଦୀକ୍ଷିତଙ୍କ ପରଲୋକ ହୋଇଛି। ମୃତ୍ୟୁ ବେଳକୁ ତାଙ୍କୁ ୮୧ ବର୍ଷ ବୟସ ହୋଇଥିଲା। ଶନିବାର ଦିଲ୍ଲୀରେ ତାଙ୍କର ପରଲୋକ ହୋଇଛି। ଅସ୍ବାଭାବିକ ହୃଦ୍ସ୍ପନ୍ଦନ ଯୋଗୁ ତାଙ୍କୁ ଦିଲ୍ଲୀସ୍ଥିତ ଫୋର୍ଟିସ୍ ଏସକର୍ଟସ୍ ହାର୍ଟ ଇନଷ୍ଟୁଚ୍ୟୁଟରେ ଭର୍ତ୍ତି କରାଯାଇଥିଲା। ସ୍ବାସ୍ଥ୍ୟାବସ୍ଥା ଜଟିଳ ଥିବାରୁ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲା। ଅପରାହ୍ନ ୩ଟା ୧୫ରେ ତାଙ୍କର ଏକ ଷ୍ଟ୍ରୋକ୍ ହେବା ସହ ୩ଟା ୫୫ରେ ପରଲୋକ ହୋଇଥିଲା ବୋଲି ଫୋର୍ଟିସ୍ ଏସକର୍ଟସ୍ ହାର୍ଟ ଇନଷ୍ଟୁଚ୍ୟୁଟର ନିର୍ଦ୍ଦେଶକ ଡା. ଅଶୋକ ସେଠ ପ୍ରକାଶ କରିଛନ୍ତି। ସେ ଦିଲ୍ଲୀ ପ୍ରଦେଶ କଂଗ୍ରେସ କମିଟିର ସଭାପତି ଥିବା ବେଳେ ଦିଲ୍ଲୀର ମୁଖ୍ୟମନ୍ତ୍ରୀ ଭାବେ ସର୍ବାଧିକ ୧୫ ବର୍ଷ କାଳ ଶାସନ କ୍ଷମତା ହାତେଇଥିଲେ। ୨୦୧୪ରେ ୫ ମାସପାଇଁ ସେ କେରଳର ରାଜ୍ୟପାଳ ଭାବେ ଦାୟିତ୍ୱ ତୁଲାଇଥିଲେ।
