ଏରସମା,୧୯ା୭(ସ୍ବ.ପ୍ର.): ଏରସମା ବ୍ଲକ ନାରଦିଆ ପଞ୍ଚାୟତସ୍ଥିତ ପଞ୍ଚପଲି ପୋଲରେ କ୍ରିକ ନିର୍ମାଣ ପାଇଁ ଦୀର୍ଘଦିନ ହେଲା ଦାବି ହୋଇଆସୁଛି। ଇତିମଧ୍ୟରେ ବିଭାଗୀୟ ଅଧିକାରୀ ଓ ଲୋକ ପ୍ରତିନିଧିମାନେ ଘଟଣାସ୍ଥଳକୁ ଆସି ଅନୁଧ୍ୟାନ କରିଥିଲେ ମଧ୍ୟ କ୍ରିକ୍ ନିର୍ମାଣ ହୋଇପାରୁନି। ଏହାକୁ ନେଇ ସ୍ଥାନୀୟ ଅଞ୍ଚଳର ଚାଷୀମାନେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ପ୍ରକାଶ ଯେ, ତିର୍ତ୍ତୋଲ ବ୍ଲକ ତଣ୍ଡିକୁଳ ପଞ୍ଚାୟତରୁ ହଂସୁଆ ସଫେଇ ବାହାରି ଏରସମା ବ୍ଲକର ସୋମପୁର, ନାରଦିଆ, ଜିରାଇଲୋ, ଆମ୍ବିକି ଆଦି ପଞ୍ଚାୟତରେ ପ୍ରବାହିତ ହୋଇ ଜଟାଧାର ମୁହାଣ ଦେଇ ସମୁଦ୍ରରେ ମିଶିଛି। ଏରସମା ବ୍ଲକ ତଥା ସମଗ୍ର ଜଗତ୍ସିଂହପୁର ଜିଲାର ଉଦବୃତ ବର୍ଷାଜଳ ଏହି ସଫେଇ ଦେଇ ସମୁଦ୍ରକୁ ନିଷ୍କାସିତ ହୋଇଥାଏ। ମାତ୍ର ଏହି ଜଳକୁ କ୍ରିକ ମାଧ୍ୟମରେ ଅଟାକାଇ ରଖିପାରିଲେ ଚାଷୀମାନେ ଉଭୟ ଖରିଫ ଓ ରବି ଋତୁରେ ଫସଲ ଉପତ୍ାଦନ କରିପାରନ୍ତେ। ସେଥିପାଇଁ ୧୦୧୬ରୁ କ୍ରିକ ନିର୍ମାଣ ପାଇଁ ଦାବି ହୋଇଆସୁଥିଲେ ମଧ୍ୟ ତାହା କେବଳ କାଗଜପତ୍ରରେ ସୀମିତ ହୋଇ ରହିଛି। ୨୮ା୮ା୧୦୧୬ରେ ଜଳ ସମ୍ପଦ ବିଭାଗ ପକ୍ଷରୁ ମୁଖ୍ୟଯନ୍ତ୍ରୀ ଜାନକୀ ବହ୍ଲବ ମହାପାତ୍ର, ବାଲିକୁଦା-ଏରସମାର ପୂର୍ବତନ ବିଧାୟକ ପ୍ରଶାନ୍ତ କୁମାର ମୁଦୁଲି ଏହି ସ୍ଥାନ ପରିଦର୍ଶନ କରିଥିଲେ। ଜିଲା ପ୍ରଶାସନ ନିକଟରେ ଦାବି ହେବା ପରେ ପୁନର୍ବାର ୨୦୧୭ରେ ବିଭାଗୀୟ ଅଧିକାରୀ ପରିଦର୍ଶନରେ ଆସିବା ସହିତ କାଯର୍ୟ କରିବାକୁ ସମସ୍ତ ଯୋଜନା ପ୍ରସ୍ତୁତ ହୋଇଥିଲା। ମାତ୍ର ପରିତାପର ବିଷୟ ଏହା ମଧ୍ୟରେ ୪ ବର୍ଷ ବିତିଥିଲେ ମଧ୍ୟ ଯୋଜନା କେବଳ ଫାଇଲ ମଧ୍ୟରେ ସୀମିତ ହୋଇରହିଛି। ଏହି କ୍ରିକ କାଯର୍ୟକାରୀ ହେଲେ ନାରଦିଆ ସହିତ ଜାନକାଦେଈପୁର, ପୋଖରିଆପଡ଼ା, ଜିରାଇଲୋ, ଆମ୍ବିକି, ଗଡ଼ବିଶୁନିପୁର, ସୋମପୁର, ପଏଦା ପଞ୍ଚାୟତର ଚାଷୀମାନେ ଉପକୃତ ହୋଇ ପାରନ୍ତେ। ଏଥିପ୍ରତି ମନ୍ତ୍ରୀ ରଘୁନନ୍ଦନ ଦାସ ଦୃଷ୍ଟି ଦେବାକୁ ପଞ୍ଚପଲିର ପୂର୍ବତନ ସରପଞ୍ଚ ଶିଶିର କୁମାର ବିଶ୍ୱାଳ, ଅମୂଲ୍ୟ ମହାନ୍ତି, ସ୍ମୃତିରଞ୍ଜନ ମହାନ୍ତି ପ୍ରମୁଖ ଦାବି ଜଣାଇଛନ୍ତି।
