ପରଜଙ୍ଗ, ୧୬।୮(ଡି.ଏନ.ଏ.)-ଅନୁଗୋଳ-ଡୁବୁରି ରେଲଓ୍ବେ ଟ୍ରାକ୍ ନିର୍ମାଣ ପାଇଁ ଖୋଳାଯାଇଥିବା ଖାତରେ ଖସିପଡ଼ି ଜଣେ ଛେଳିଚରାଳିଙ୍କ ମୃତ୍ୟୁ ଘଟିଛି। ସେ ହେଲେ ପରଜଙ୍ଗ ଥାନା ବାରିହାପୁର ଗ୍ରାମର ଆଦିତ୍ୟ ପରିଡ଼ା (୩୦)। ମୃତକଙ୍କ ପରିବାରକୁ କ୍ଷତିପୂରଣ ଦାବିରେ ଅଞ୍ଚଳବାସୀ ରାସ୍ତାରୋକୋ କରିଥିଲେ। ଏହାକୁ ନେଇ ପ୍ରବଳ ଉତ୍ତେଜନା ପ୍ରକାଶ ପାଇଥିଲା।
ସୂଚନାଯୋଗ୍ୟ, ବାରିହାପୁର ଗ୍ରାମ ଦେଇ ଅନୁଗୋଳ-ଡୁବୁରି ରେଳପଥ ନିର୍ମାଣ କାର୍ଯ୍ୟ ଚାଲିଛି। ବାରିହାପୁର ଗଁା ନିକଟରେ ଅଧିକ ଉଚ୍ଚା ହୋଇଥିବାରୁ ପ୍ରାୟ ୪୦ ଫୁଟ ଗଭୀରର ମାଟି ଖୋଳାଯାଇଛି। ଏବେ ଉକ୍ତ ସ୍ଥାନରେ ୨୦ ଫୁଟ ପାଣି ଜମି ରହିଛି। ଅନ୍ୟପଟେ ବିପଦ ଅଶଙ୍କା ଥିବା ସତ୍ତ୍ୱେ ଉଭୟ ପାର୍ଶ୍ୱରେ କୌଣସି ସୁରକ୍ଷା ବାଡ଼ ଦିଆଯାଇନାହିଁ। ଉକ୍ତ ରାସ୍ତା ଦେଇ ଆଦିତ୍ୟ ଛେଳି ଚରାଇବାକୁ ଯାଉଥିବାବେଳେ ଗୋଡ଼ ଖସିଯିବାରୁ ପାଣିରେ ଖସିପଡ଼ିଥିଲା। ଘଟଣାସ୍ଥଳରେ ଉପସ୍ଥିତ ଲୋକଙ୍କ ଉଦ୍ୟମ ସତ୍ତ୍ୱେ ତାଙ୍କୁ ଉଦ୍ଧାର କରିବା ସମ୍ଭବ ହୋଇ ନ ଥିଲା। ସୂଚନା ପାଇ ପରଜଙ୍ଗ ଅଗ୍ନିଶମ କର୍ମଚାରୀ ପହଁଚି ଆଦିତ୍ୟଙ୍କୁ ଉଦ୍ଧାର କରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏ ନେଇ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି।
ତେବେ ବ୍ୟବଛେଦ ପାଇଁ କୌଣସି ଡାକ୍ତର ଉପସ୍ଥିତ ନ ଥିବା ବେଳେ ସ୍ବାସ୍ଥ୍ୟକେନ୍ଦ୍ର ସମ୍ମୁଖ ରାସ୍ତା ଅବରୋଧ କରିଥିଲେ। ଡାକ୍ତର ପହଞ୍ଚତ୍ବା ପରେ ରାସ୍ତାରୋକୋ ହଟିଥିଲା। ଯୁବକଙ୍କ ମୃତଦେହ ଗ୍ରାମକୁ ଅଣାଯିବା ପରେ କ୍ଷତିପୂରଣ ଦାବିରେ ଉତ୍ତ୍ୟକ୍ତ ଗ୍ରାମବାସୀ ରେଲଓ୍ବେ କ୍ୟାମ୍ପ ସମ୍ମୁଖରେ ଧାରଣାରେ ବସିଥିଲେ। ତୁରନ୍ତ ମୃତକଙ୍କ ପରିବାରକୁ ୧୫ ଲକ୍ଷ ଟଙ୍କା ପ୍ରଦାନ ଏବଂ ଖୋଳାଯାଇଥିବା ସ୍ଥାନର ଉଭୟ ପାର୍ଶ୍ୱରେ ସୁରକ୍ଷା ପ୍ରାଚୀର ତିଆରି କରିବାକୁ ଦାବି କରି ନାରାବାଜି କରିଥିଲେ। ତଥାପି ରେଲଓ୍ବେ ବିଭାଗର କୌଣସି କର୍ମଚାରୀ ଆଲୋଚନା କରିବାକୁ ଆସି ନ ଥିଲେ। ଫଳରେ ପରିସ୍ଥିତି ଆହୁରି ଜଟିଳ ହୋଇଯାଇଥିଲା। ଅପରାହ୍ନରେ ଲୋକମାନେ କ୍ୟାମ୍ପ ସମ୍ମୁଖରୁ ଉଠିଯାଇ ୫୩ନଂ. ଜାତୀୟ ରାଜପଥ ଅବରୋଧ କରିଥିଲେ। ତହସିଲଦାର ଜୟନ୍ତ କୁମାର ଜୟସିଂ, ଥାନା ଅଧିକାରୀ ଆନନ୍ଦ ଡୁଙ୍ଗ୍ଡୁଙ୍ଗ୍ ପହଞ୍ଚତ୍ ବୁଝାଶୁଝା କରିଥିଲେ। ରେଲଓ୍ବେ ଟ୍ରାକ୍ ନିର୍ମାଣରେ ନିୟୋଜିତ ସଂସ୍ଥାର କର୍ମଚାରୀ ପହଞ୍ଚତ୍ ଆଦିତ୍ୟଙ୍କ ସ୍ତ୍ରୀଙ୍କୁ ୨ ଲକ୍ଷ ଟଙ୍କା ପ୍ରଦାନ କରିଥିଲେ। ଏଥିସହ କମ୍ପାନୀ କାର୍ଯ୍ୟ କରୁଥିବା ଯାଏ ମାସିକ ୮ହଜାର ଟଙ୍କା ଦେବାକୁ ପ୍ରତିଶ୍ରୁତି ଦେବା ପରେ ରାସ୍ତାରୋକୋ ପ୍ରତ୍ୟାହୃତ ହୋଇଛି।
