କେନ୍ଦୁଝର, ୯ା୪ (ସ୍ବ.ପ୍ର.)-କରୋନା ପାଇଁ ଲକ୍ ଡାଉନ୍ ଘୋଷଣା ହୋଇଛି । ଏଣୁ ସମଗ୍ର ଦେଶରେ ଗାଡି ଚଳାଚଳ ବନ୍ଦ ରହିଛି । ସେହିପରି ଯାତ୍ରୀବାହୀ ବସ, ଟ୍ରେନ ଆଦି ବନ୍ଦ ରହିଛି। ତେବେ ଏହି କଟକଣାରୁ ବାଦ ପଡିଛି ଅତ୍ୟାବଶ୍ୟକୀୟ ସାମଗ୍ରୀ, ଲୁହାପଥର, ଫଳ, ମାଛ, ଅଣ୍ଡା, ତେଲ, ପିଡିଏସ ସାମଗ୍ରୀ ଆଦି ବୋଝେଇ ମାଲବାହୀ ଟ୍ରକ। ତେବେ ଲକ୍ଡାଉନ୍ ପାଇଁ ହୋଟେଲ, ଦୋକାନବଜାର ଆଦି ବନ୍ଦ ଥିବାରୁ ରାସ୍ତାରେ ଯାତାୟତ କରୁଥିବା ଏହି ଟ୍ରକ ଚାଳକ, ହେଲପରମାନେ ଖାଇବା ପାଇଁ ବହୁ ଅସୁବିଧା ଭୋଗୁଥିବା ବେଳେ ଗାଡି ଖରାପ ହେଲେ ସଜାଡି ନ ପାରି ଅଧା ରାସ୍ତାରେ ହୀନସ୍ତା ହେଉଛନ୍ତି। ଏହାକୁ ଦୃଷ୍ଟିରେ ରଖି ସରକାର ହାଇଓ୍ବେ କଡରେ ପ୍ରତି ୨୦ କି.ମି. ଦୂରରେ ଏକ ଢାବା ଓ ଗ୍ୟାରେଜ ଖୋଲିବା ନେଇ ନିଷ୍ପତ୍ତି ହୋଇଛି । ଏହି ସବୁ ରାସ୍ତାରେ ଦୈନିକ ଶହ ଶହ ଟ୍ରକ ଚଳାଚଳ କରୁଛି । ତେବେ ରାସ୍ତାରେ କୌଣସି ଢାବା ବା ଗ୍ୟାରେଜ ଖୋଲା ନ ଥିବାରୁ ଗାଡି ଚାଳକ ମାନେ ଖାଇବା ପାଇଁ ବହୁ ଅସୁବିଧା ଭୋଗୁଛନ୍ତି। କେତେକ ରାସ୍ତା କଡରେ ଗାଡି ଛିଡା କରି ରୋଷେଇ କରି ଖାଦ୍ୟ ଖାଉଥିବା ଦେଖିବାକୁ ମିଳିଛି। ନଚେତ ଭୋକ ଓପାସରେ ଯାତାୟତ କରୁଥିବା ଲାଇନ ଟ୍ରକ ଚାଳକ ମାନେ ଦୁଃଖର ସହ କହିଛନ୍ତି। ସେହିପରି କରୋନା ବ୍ୟାପିବା ଆଶଙ୍କା କରି ଅନେକ ସ୍ଥାନରେ ସ୍ଥାନୀୟ ଗ୍ରାମବାସୀଙ୍କ ବିରୋଧ ଯୋଗୁ ଢାବା ଖୋଲାଯାଉନାହିଁ ବୋଲି ଢାବା ମାଲିକ କହିଛନ୍ତି। ଏଣୁ ପ୍ରଶାସନ ପକ୍ଷରୁ ସ୍ବତନ୍ତ୍ର ପଦକ୍ଷେପ ଗ୍ରହଣ କରି ଢାବା ଓ ଗ୍ୟାରେଜ ଖୋଲିବା ପାଇଁ ପଦକ୍ଷେପ ନେବାକୁ ଗାଡି ଚାଳକ ମାନେ ଦାବି କରୁଛନ୍ତି । ଏନେଇ ଡିଏସପି (ଡିଆଇବି) ହରିଶ ପାଣ୍ଡେ କହିଛନ୍ତି ଯେ, ଢାବା ଓ ଗ୍ୟାରେଜ ଖୋଲିବାକୁ କୁହାଯାଇଛି। ସେମାନେ ନିଜେ ବିଭିନ୍ନ କାରଣରୁ ବନ୍ଦ ରଖିଛନ୍ତି।
