ପୁରୀ ଅଫିସ, ୯।୭: ପବିତ୍ର ରଥଯାତ୍ରା ପାଇଁ ଏବେ ଚଳଚଞ୍ଚଳ ଶ୍ରୀକ୍ଷେତ୍ର। ଭକ୍ତିଭରା ପରିବେଶରେ ଉଚ୍ଛୁଳୁଛି ବଡ଼ଦାଣ୍ଡ। ସହରର ବିଭିନ୍ନ ସ୍ଥାନରେ ଚାଲିଛି ସାଂସ୍କୃତିକ କାର୍ଯ୍ୟକ୍ରମ। ସାହି, ଗଳିରେ ବି ଆଧ୍ୟାତ୍ମିକ ବାତାବରଣ। ସଞ୍ଜ ନଇଁଲେ ଗୁଞ୍ଜରିତ ହେଉଛି ମହାପ୍ରଭୁଙ୍କ ଭଜନ ଓ ଜଣାଣ। ସୋମବାର ସନ୍ଧ୍ୟାରେ ବଡ଼ଶଙ୍ଖଠାରେ ଅନୁଷ୍ଠିତ ହୋଇଥିଲା ୩୯ତମ ହେରାପଞ୍ଚମୀ ଭଜନ ସମାରୋହ। ଶରଧାବାଲି ସାଂସ୍କୃତିକ ପରିଷଦ ପକ୍ଷରୁ ଆୟୋଜିତ ଏହି ଭକ୍ତିଭରା ଭଜନ ସମାରୋହ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ ପୂର୍ବତନ ମନ୍ତ୍ରୀ ମହେଶ୍ୱର ମହାନ୍ତି। ମୁଖ୍ୟଅତିଥି ଭାବେ ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ, ସମ୍ମାନିତ ଅତିଥି ଭାବେ ହାଇଟେକ୍ ଗ୍ରୁପ୍ର ପରିଚାଳନା ନିର୍ଦ୍ଦେଶକ ତିରୁପତି ପାଣିଗ୍ରାହୀ ଯୋଗଦେଇଥିଲେ। ଏଥିରେ ଅନୁଷ୍ଠାନର ସମ୍ପାଦକ ଘନଶ୍ୟାମ ମର୍ଦ୍ଦରାଜ ବାର୍ଷିକ ବିବରଣୀ ପାଠ କରିଥିଲେ।
ଆୟୋଜିତ ଭଜନ କାର୍ଯ୍ୟକ୍ରମରେ ବହୁ ପ୍ରବୀଣ ଓ ନବୀନ କଣ୍ଠଶିଳ୍ପୀ ମନଛୁଅଁା ଭଜନ ପରିବେଷଣ କରିଥିଲେ। କଣ୍ଠଶିଳ୍ପୀ ଶରତ ନାୟକଙ୍କ ମୋ ପ୍ରିୟ ଠାକୁର ହେ ଜଗନ୍ନାଥ…ରୁ ଆରମ୍ଭ ହୋଇଥିଲା ଏହି ଭଜନ ସମାରୋହ। ଏହାପରେ ସେ ବାଉଁଶ କଣିରେ… ଏବଂ କଣ୍ଠଶିଳ୍ପୀ ମାନସୀ ପାତ୍ର ଭକତେ ଡାକନ୍ତି ମଣିମା ମଣିମା…ପରିବେଷଣ କରିଥିଲେ। ଏମାନଙ୍କ ବ୍ୟତୀତ ମନ୍ମଥ ମିଶ୍ର, ଇରା ମହାନ୍ତି, ଶୈଳଭାମା ମହାପାତ୍ର, ଶ୍ରୀଚରଣ ମହାନ୍ତି, ସୌରଭ ନାୟକ, ଗଗନ ବିହାରୀ ଜେନା, ରବୀନ୍ଦ୍ର ମହାପାତ୍ର, ଅନିଲ ବାୱରା, ଅନ୍ତରା ଚକ୍ରବର୍ତ୍ତୀ, ଇପ୍ସିତା ପଣ୍ଡା, କ୍ରିଷ୍ଣା ମିଶ୍ର, ପ୍ରତିମା ମିଶ୍ର, କୃଷ୍ଣଚନ୍ଦ୍ର ପାଢୀ, ପ୍ରଦୀପ ପଲେଇ, ମଞ୍ଜୁଶ୍ରୀ ତ୍ରିପାଠୀ ପ୍ରମୁଖ କଣ୍ଠଶିଳ୍ପୀମାନେ ଏକାଧିକ ଭଜନ ପରିବେଷଣ କରିଥିଲେ। ରାତି ପର୍ଯ୍ୟନ୍ତ ବଡଦାଣ୍ଡରେ ଠିଆହୋଇ ଭକ୍ତିଭରା ଭଜନରେ ଭିଜିଥିଲେ ଶ୍ରୋତା।
ଏହି ଅବସରରେ ପଣ୍ଡିତ ବାଣୀଭୂଷଣ ନିରଞ୍ଜନ ବ୍ରହ୍ମାଙ୍କୁ ସମ୍ବିଧାନ ବିଶାରଦ ଉପାଧି, ଚୌଧୁରୀ ଭାରତୀକୃଷ୍ଣ ଦାସଙ୍କୁ ଉତ୍କଳ କଳା କଦମ୍ବ ଉପାଧି ପ୍ରଦାନ କରାଯାଇଥିଲା। ଏତଦ୍ବ୍ୟତୀତ କଣ୍ଠଶିଳ୍ପୀ ସୌରଭ ନାୟକଙ୍କୁ ମାଖନଲାଲ୍ ହାଲ୍ଦାର ସ୍ମୃତି ସମ୍ମାନରେ ସମ୍ମାନିତ କରାଯାଇଥିବା ବେଳେ ଭେଷଜ ନିରୀକ୍ଷକ ରୁଦ୍ରନାରାୟଣ ସାହୁ, କଣ୍ଠଶିଳ୍ପୀ ଅନିଲ ବାୱରା, ଗୀଟାର ବାଦକ ସିଦ୍ଧେଶ୍ୱର ପଟ୍ଟନାୟକ, କଣ୍ଠଶିଳ୍ପୀ ଅଞ୍ଜଳି ମିଶ୍ର, ଡାକ୍ତର ସଂଗ୍ରାମ କେଶରୀ ପ୍ରଧାନଙ୍କୁ ସମ୍ମାନିତ କରାଯାଇଥିଲା। ଭକ୍ତିସଙ୍ଗୀତ କାର୍ଯ୍ୟକ୍ରମକୁ ବିଚିତ୍ରାନନ୍ଦ ପଣ୍ଡା ଓ ଶ୍ୟାମପ୍ରକାଶ ସେନାପତି ସଞ୍ଚାଳନ କରିଥିଲେ।
