ଇସଲାମାବାଦ,୨୨।୮: ଜମ୍ମୁ-କଶ୍ମୀରରେ ଭାରତ ଅନୁଚ୍ଛେଦ ୩୭୦ ହଟାଇବା ପରଠାରୁ ପାକିସ୍ତାନ ଏକ ପ୍ରକାର ରକ୍ତ ଚାଉଳ ଚୋବାଉଛି କହିଲେ ଚଳେ। ହେଲେ ପାକିସ୍ତାନର ଏଭଳି କାର୍ଯ୍ୟକୁ ନେଇ କେତେଜଣ ପାକିସ୍ତାନୀ ବୁଦ୍ଧିଜିବୀ ଇମ୍ରାନ ସରକାରଙ୍କ ସମାଲୋଚନା କରିଛନ୍ତି। ପୂର୍ବରୁ ଭାରତୀୟ ନାଗରିକତା ପାଇଥିବା ପାକିସ୍ତାନୀ କଳାକାର ଅଦନାନ ସାମୀ କଶ୍ମୀର ମାମଲାରେ ପାକିସ୍ତାନକୁ ସମାଲୋଚନା କରିଥିବା ବେଳେ ଏବେ ପାକିସ୍ତାନୀ ଖବରଦାତା ହସନ ନିସାର ମଧ୍ୟ ପାକିସ୍ତାନକୁ ସମାଲୋଚନା କରିଛନ୍ତି। ସେ କହିଛନ୍ତି କଶ୍ମୀର ମାମଲାରେ ପାକିସ୍ତାନ ସ୍ବପ୍ନ ଦେଖିବା ଛାଡି ଦେଉ। ସୂଚନାଯୋଗ୍ୟ, ଅନେକ ସମୟରେ ହସନ ସରକାରଙ୍କ ବିରୋଧରେ ଖୋଲାଖୋଲି ଭାବେ ଆଲୋଚନା କରୁଥିବା ସାମ୍ବାଦିକଙ୍କ ମଧ୍ୟରେ ବେଶ୍ ପରିଚିତ। ଏଥର ହସନଙ୍କର ଏକ ଭିଡିଓ ଭାଇରାଲ ହେବାରେ ଲାଗିଛି। ଯେଉଁଥିରେ ସେ ପାକିସ୍ତାନ ସରକାରଙ୍କ ବିରୋଧରେ ଖୋଲାଖୋଲି କଥା ହେଉଛନ୍ତି। ଭିଡିଓରେ ଦେଖିବାକୁ ମିଳିଛି କି ହସନ ଏକ ଟେଲିଭିଜନ ଚ୍ୟାନେଲର ଟକ୍ ଶୋ’ରେ ଯୋଗ ଦେଇଥିବା ସମୟରେ ସେଠାରେ ଉପସ୍ଥିତ ଥିବା ଜଣେ ବ୍ୟକ୍ତି ତାଙ୍କୁ ପାକିସ୍ତାନର ଭବିଷ୍ୟତ ବିଷୟରେ ପଚାରିବାରୁ ସେ ଇମ୍ରାନ ସରକାରଙ୍କ କଶ୍ମୀର ସ୍ପପ୍ନକୁ ନେଇ ସରକାରଙ୍କ ଉପରେ ଖୁବ୍ ବର୍ଷିଥିଲେ।
