ଧର୍ମଶାଳା/ଜେନାପୁର,୪ା୩(ଡି.ଏନ୍.ଏ.)- ଧର୍ମଶାଳା ବ୍ଲକ ଜେନାପୁର ଥାନା ଅନ୍ତର୍ଗତ ସୁକୁଟିଝର ଗ୍ରାମରେ ଏକ ନଳକୂପ ନିକଟରେ ଅଳିଆ ପକାଇବାକୁ କେନ୍ଦ୍ର କରି ଦୁଇ ଗୋଷ୍ଠୀ ମଧ୍ୟରେ ମାରପିଟ ହୋଇଛି। ଏଥିରେ ୫ଜଣ ଆହତ ହୋଇଛନ୍ତି । ଆହତଙ୍କ ଅଭିଯୋଗ କ୍ରମେ ପୋଲିସ ଏକ ମାମଲା ରୁଜୁ କରି ୩ଜଣଙ୍କୁ ଗିରଫ କରିଛି। ମିଳିଥିବା ସୂଚନା ଅନୁସାରେ ସୁକୁଟିଝର ଗ୍ରାମରେ ରବିବାର ନୀଳକଣ୍ଠ ବେହେରା ଓ ତାଙ୍କ ପରିବାର ନଳକୂପ ନିକଟରେ ଅଳିଆ ପକାଉଥିବାରୁ ଅମୂଲ୍ୟ ବେହେରା ଓ ଅନ୍ୟମାନେ ଏହାକୁ ବାରଣ କରିଥିଲେ। ଏଥିରେ ଉତ୍କ୍ଷୀପ୍ତ ହୋଇ ନୀଳକଣ୍ଠଙ୍କ ପରିବାର ଅମୂଲ୍ୟ ଓ ଅନ୍ୟମାନଙ୍କୁ ଆକ୍ରମଣ କରିଥିଲେ। ଏଥିରେ ଅମୂଲ୍ୟଙ୍କ ସମେତ ୫ଜଣ ଆହତ ହୋଇଥିଲେ। ଅମୂଲ୍ୟଙ୍କ ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା(ନଂ.୪୫/୨୦୨୦) ରୁଜୁ କରି ନୀଳକଣ୍ଠ,ଚକ୍ରଧର ବେହେରା(୫୦),ନିତ୍ୟାନନ୍ଦ ବେହେରା(୨୫)ଙ୍କୁ ସୋମବାର ରାତିରେ ଗିରଫ କରିଥିଲା। ମଙ୍ଗଳବାର ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇଛି।
