ନିଜକୁ ସୁନ୍ଦର ଦେଖାଯିବା ପାଇଁ ସମସ୍ତେ ବିଭିନ୍ନ ପ୍ରକାରର ଜିନିଷ ବ୍ୟବହାର କରନ୍ତି। ଆଜିକାଲି ହେୟାର ଷ୍ଟ୍ରେଟନିଂ କରିବା ଏକ ଫ୍ୟାଶନରେ ପରିଣତ ହେଲାଣି। ହେୟାର ଷ୍ଟ୍ରେଟନିଂ କରି ଫ୍ୟାଶନେବୁଲ ଲାଗିବାକୁ ସବୁ ଯୁବତୀଙ୍କ ଇଚ୍ଛା। ହେଲେ ପାର୍ଲରରେ ଏହାକୁ କରିବାକୁ ପଡୁଥିବା ବେଳେ ଏହା ବହୁତ ବ୍ୟୟସାପେକ୍ଷ ମଧ୍ୟ। ତା’ ସହିତ ଏହାର ଆବଶ୍ୟକ ରକ୍ଷଣାବେକ୍ଷଣ ନିମନ୍ତେ ବହୁ ଖର୍ଚ୍ଚାନ୍ତ ହେବାକୁ ପଡ଼ିଥାଏ। ପାର୍ଲରରେ ହେୟାର ଷ୍ଟ୍ରେଟନିଂ କଲେ କେମିକାଲ ଭାଗ ବହୁତ ରହିଥାଏ। ପ୍ରଥମେ ଏହା ଦେଖିବାକୁ ଭାରି ଆକର୍ଷଣୀୟ ଲାଗେ। ହେଲେ ଧୀରେ ଧୀରେ କେମିକାଲ ପ୍ରଭାବରେ କେଶର ସୌନ୍ଦର୍ଯ୍ୟ ନଷ୍ଟ ହୋଇଯାଏ। ତେବେ ଘରୋଇ ଉପାୟରେ କେଶ ଷ୍ଟ୍ରେଟ କିପରି କରିହେବ ସେ ବିଷୟରେ ଆସନ୍ତୁ ଜାଣିବା। ଏହାଦ୍ୱାରା କେଶର ଚମକ ବଜାୟ ରହିବ ଓ ପାର୍ଶ୍ୱ ପ୍ରତିକ୍ରିୟା ମଧ୍ୟ ହେବ ନାହିଁ।
ନଡ଼ିଆ କ୍ଷୀରରେ ହେୟାର ମାସ୍କ କରିବା ବିଧି:
ନଡ଼ିଆ କ୍ଷୀର କେଶ ଲାଗି ବହୁ ଲାଭଦାୟକ। ଏହା କେଶରେ ଚମକ ଆଣିବା ସହ କେଶ ଝଡ଼ିବା ସମସ୍ୟା ଓ ଚନ୍ଦାପଣରୁ ମଧ୍ୟ ଏହା ମୁକ୍ତି ଦେଇଥାଏ। ଆସନ୍ତୁ ଜାଣିବା ଏହାକୁ କିପରି ପ୍ରସ୍ତୁତ କରିବେ।
*ପ୍ରଥମେ ନାଳି ନଡ଼ିଆକୁ ସାଇଜ କରି କାଟି ତାକୁ ଗ୍ରାଇଣ୍ଡିଂ କରିଦିଅନ୍ତୁ। ଏହାପରେ ସେଥିରୁ କ୍ଷୀର ବାହାର କରି ସେଥିରେ ୩ରୁ ୪ ବୁନ୍ଦା ଲେମ୍ବୁ ରସକୁ ମିଶାଇ ଏକ ପେଷ୍ଟ ତିଆରି କରନ୍ତୁ। ଏହାପରେ ଏହି ପେଷ୍ଟକୁ ରାତିସାରା ଫ୍ରିଜ୍ରେ ରଖିଦିଅନ୍ତୁ। ସକାଳୁ ଦେଖିବେ ଏହା ଉପରେ ଏକ କ୍ରିମ୍ର ଆସ୍ତରଣ ହୋଇଯାଇଥିବ।
ଲଗାଇବା ବିଧି:
ନଡ଼ିଆ କ୍ଷୀରର ପେଷ୍ଟକୁ ଲଗାଇବା ପୂର୍ବରୁ କେଶକୁ ଧୋଇ କିଛି ସମୟ ଶୁଖିବାକୁ ଛାଡ଼ି ଦିଅନ୍ତୁ। ହେୟାର ଡ୍ରାୟର କିମ୍ବା ଅନ୍ୟ କୌଣସି ଯନ୍ତ୍ର ଦ୍ୱାରା କେଶକୁ ଶୁଖାନ୍ତୁ ନାହିଁ। ପୂର୍ବରୁ କରାଯାଇଥିବା ନଡ଼ିଆ ରସର ପେଷ୍ଟକୁ କେଶର ମୂଳରେ ଏବଂ ସମ୍ପୂର୍ଣ୍ଣ ମୁଣ୍ଡରେ ଭଲଭାବେ ଲଗାନ୍ତୁ। ଏହାପରେ ଗରମ ପାଣିରେ ଏକ ଟାଓ୍ବେଲକୁ ଭିଜାଇ ଦେଇ ପରେ ଚିପୁଡି ମୁଣ୍ଡରେ ଗୁଡ଼ାଇ ଦିଅନ୍ତୁ। ଆଉ ଏହାକୁ ୧ ଘଣ୍ଟା ଛାଡ଼ି ଦିଅନ୍ତୁ। ଘଣ୍ଟେ ପରେ ଥଣ୍ଡା ପାଣିରେ ମୁଣ୍ଡ ଧୋଇ ଦିଅନ୍ତୁ । ଗରମ ପାଣିରେ କେବେ ବି କେଶକୁ ଧୁଅନ୍ତୁ ନାହିଁ। ଆପଣ ଚାହିଁଲେ ଶାମ୍ପୁ, କଣ୍ଡିଶନର ବ୍ୟବହାର ମଧ୍ୟ କରିପାରିବେ। ସପ୍ତାହରେ ଅତି କମ୍ରେ ୩ ଥର ପ୍ରୟୋଗ କରନ୍ତୁ। ପ୍ରୟୋଗ କରିବା ପରେ ଏହାର ଫରକ ଜାଣି ପାରିବେ। ଏହାଦ୍ୱାରା କେଶ ନମନୀୟ, ଉଜ୍ଜ୍ୱଳ ହେବା ସହ ଷ୍ଟ୍ରେଟ ମଧ୍ୟ ହୋଇଯିବ।
