ବାଲେଶ୍ୱର ଅଫିସ, ୫।୨-ବାଲେଶ୍ୱର ଜିଲା ସଦର ବ୍ଲକ ଅଧୀନ ରୂପ୍ସା ଅଞ୍ଚଳର କସିପଦା ସେବା ସମବାୟ ଅଧୀନରେ ଥିବା ଚାଷୀମାନେ ଧାନ ବିକ୍ରି କରି ନ ପାରି ଅଭାବୀ ବିକ୍ରିର ଶିକାର ହେଉଛନ୍ତି। ଏହାର ପ୍ରତିବାଦ କରି ମଙ୍ଗଳବାର ଚାଷୀମାନେ ଜିଲା ଯୋଗାଣ ବିଭାଗ ଅଧିକାରୀ ରବି ନାରାୟଣ ପୃଷ୍ଟିଙ୍କ ନିକଟରେ ଅଭିଯୋଗ କରିଛନ୍ତି।
କସିପଦା ସେବା ସମବାୟ ଅଧୀନରେ ଥିବା ଆଙ୍କୋ, କସିପଦା, ରୂପ୍ସା ପଞ୍ଚାୟତର ୨୫ଟି ଗ୍ରାମର ପ୍ରାୟ ଶତାଧିକ ଚାଷୀ ଅନଲାଇନ୍ରେ ନିଜର ନାମ ପଞ୍ଜିକରଣ କରିଥିଲେ। ଧାନ ବିକ୍ରି ପାଇଁ ଟୋକନ ନ ପାଇବାରୁ ସେବା ସମବାୟ ସମ୍ପାଦକ ସତ୍ୟପ୍ରକାଶ ପାଢ଼ୀଙ୍କୁ ପଚାରିଥିଲେ। ସମ୍ପାଦକ ସେମାନଙ୍କ କୁପନ ଭୁବନେଶ୍ୱରରୁ ଆସି ନାହଁି ବୋଲି କହି ବାରମ୍ବାର ଫେରାଇବାରୁ ଯୁବନେତା ବିକ୍ରମ ପଣ୍ଡାଙ୍କ ନେତୃତ୍ୱରେ କମଳାକାନ୍ତ ଜ୍ୟୋତି, ମନୋରଞ୍ଜନ ନାୟକ, ବିନୟ ମହାପାତ୍ର, ଜଗନ୍ନାଥ ବେହେରା, ଚତୁର୍ଭୁଜ ମହାପାତ୍ର, ଅଶୋକ ଦତ୍ତ, ମିହିର ନାୟକ, ରନତ୍ାକର ମହାପାତ୍ର, ପୂର୍ଣ୍ଣଚନ୍ଦ୍ର ଜ୍ୟୋତି, ସୃଷ୍ଟିଧର ବାରିକ, ଦିଦା ବିଶ୍ୱାଳ ପ୍ରମୁଖ ଚାଷୀ ଜିଲା ଯୋଗାଣ ବିଭାଗ ଅଧିକାରୀଙ୍କୁ ଲିଖିତ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ଯୋଗାଣ ଅଧିକାରୀ ପୃଷ୍ଟି ଚାଷୀଙ୍କ ସମ୍ପର୍କରେ ସହକାରୀ ଯୋଗାଣ ଅଧିକାରୀ ଅଜୟ ମଲ୍ଲିକଙ୍କୁ ଯଥାଶୀଘ୍ର ସମାଧାନ ପାଇଁ ନିର୍ଦ୍ଦେଶ ଦେଇଥିଲେ। ସହକାରୀ ଯୋଗାଣ ଅଧିକାରୀ ମଲ୍ଲିକଙ୍କ କହିବାନୁସାରେ କସିପଦା ସେବା ସମବାୟର ଶତାଧିକ ଚାଷୀ ଅନଲାଇନ୍ରେ ଆବେଦନ କରିଥିବା ବେଳେ ସେମାନଙ୍କର ପଟ୍ଟା ଏବଂ ନାମ ତାଳମେଳ ଖାଇ ନ ଥିବା ଦର୍ଶାଇ ସ୍ଥାନୀୟ ଆର୍ଆଇ ସେମାନଙ୍କ ଆବେଦନକୁ ଖାରଜ କରିଦେଇଥିଲେ। ଅଭିଯୋଗ ଆସିବା ପରେ ପୁନର୍ବାର ସେମାନଙ୍କର ଚାଷଜମି ଥିବା ଉପରେ ତଦନ୍ତ ରିପୋର୍ଟ ମଗାଯାଇଥିଲା। ରିପୋର୍ଟ ଅନୁଯାୟୀ ପୂର୍ବରୁ ଆର୍ଆଇ ଠିକ୍ ଭାବରେ ତଦନ୍ତ କରି ନ ଥିବା ସ୍ବୀକାର କରିଥିଲେ। ପରେ ସେମାନଙ୍କର ଜମି ସହ ନାମ ଠିକ୍ ଥିବାର ଅନ୍ୟ ଏକ ରିପୋର୍ଟ ପ୍ରଦାନ କରିଛନ୍ତି। ଅତିଶୀଘ୍ର ସେମାନଙ୍କର ଧାନ କିଣାଯିବ ବୋଲି ସେ ପ୍ରକାଶ କରିଛନ୍ତି।
