ବାସୁଦେବପୁର, ୮।୧୧ (ଡି.ଏନ.ଏ.)- ଭଦ୍ରକ ଜିଲା ବାସୁଦେବପୁର ସହରରେ ଏବେ ଐତିହାସିକ କାଳୀପୂଜାର ମାହୋଲ ଚାଲିଛି। ଜିଲାରେ ପଥର ମୂର୍ତ୍ତି ଏବଂ ପଥରରେ ନିର୍ର୍ମିତ ସାମଗ୍ରୀର ଚାହିଦା ରହିଛି। ଏହି ଶିଳ୍ପ କାରୁକାର୍ଯ୍ୟ ଲାଗି ପଥରଶିଳ୍ପୀ ମୁକ୍ତିକାନ୍ତ ନାୟକ(୩୨) ବେଶ୍ ଜଣାଶୁଣା। ନିଆରା ପଥରଶିଳ୍ପୀ ମୁକ୍ତିକାନ୍ତଙ୍କ ଘର ବାଲେଶ୍ୱର ଜିଲା ନୀଳଗିରି ଥାନା ଅଧୀନ ଚିନ୍ତାମଣିପୁର ଗ୍ରାମରେ। ସେ ବାସୁଦେବପୁର ସହର ଏବଂ ଆଖପାଖ ଅଞ୍ଚଳରେ କାରୁକାର୍ଯ୍ୟ ଲାଗି ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ନିଜର ଦୃଢ଼ ଇଚ୍ଛାଶକ୍ତି ଓ ଉଦ୍ୟମ ବଳରେ ସେ ପଥରଶିଳ୍ପୀ ହେବାରେ ସକ୍ଷମ ହୋଇପାରିଛନ୍ତି। ବାସୁଦେବପୁର କାଳୀପୂଜା ମେଳାରେ ପଡ଼ିଥିବା ବିଭିନ୍ନ ଷ୍ଟଲରେ ଲୋକଙ୍କ ଭିଡ଼ ଜମୁଥିବା ବେଳେ ମୁଖ୍ୟତଃ ପଥର ମୂର୍ତ୍ତି ଓ ଏଥିରେ ନିର୍ମିତ ଘରୋଇ ସାମଗ୍ରୀର ଆଦର ବଢ଼ିବାରେ ଲାଗିଛି। ସହର ମଧ୍ୟରେ ବାଳିକା ଉଚ୍ଚ ବିଦ୍ୟାଳୟ ସାମ୍ନାରେ ଏପରି ଏକ ପଥର ନିର୍ମିତ ମୂର୍ତ୍ତି ଓ ସାମଗ୍ରୀ ଦୋକାନ ଖୋଲାଯାଇଥିଲା ବେଳେ ପୂଜା ପାଇଁ ବ୍ଲକରୋଡ୍ରେ ଏକ ଷ୍ଟଲ ପଡ଼ିଛି।
ମୁକ୍ତିକାନ୍ତ କହନ୍ତି, ପିଲାଟି ଦିନରୁ ତାଙ୍କର ପଥର ଶିଳ୍ପୀ ହେବାକୁ ଇଚ୍ଛା ଥିଲା। ମାଟ୍ରିକ୍ ଶେଷ ପରେ ଅର୍ଥାଭାବରୁ ଆଉ ଆଗକୁ ପାଠ ନ ପଢ଼ି ପଥର କାରୁକାର୍ଯ୍ୟ ନିର୍ମାଣ ନିମନ୍ତେ ପ୍ରଥମେ ବଉଳଗଡ଼ିଆରେ ପ୍ରାଥମିକ ଶିକ୍ଷା ଗ୍ରହଣ କରିଥିଲେ। ପରେ ଭୁବନେଶ୍ୱର ଗଣ୍ଡମୁଣ୍ଡାଠାରେ ସରକାରୀ ଶିକ୍ଷାକେନ୍ଦ୍ରରେ ଦୁଇବର୍ଷ ତାଲିମ ନେଇ ପରୀକ୍ଷାରେ କୃତକାର୍ଯ୍ୟ ହୋଇଥିଲେ। ଏହାପରେ ସେ ରାଜ୍ୟ ବାହାର ମହାରାଷ୍ଟ୍ର, ଗୁଜୁରାଟ, ତାମିଲନାଡୁ, ରାଜସ୍ଥାନ, ଆନ୍ଧ୍ରପ୍ରଦେଶ ଭଳି ବିଭିନ୍ନ ସ୍ଥାନକୁ ଯାଇ ପଥରରେ ବିଭିନ୍ନ ମୂର୍ତ୍ତି ନିର୍ମାଣ କରି ସୁନାମ ଅର୍ଜନ କରିଛନ୍ତି। ପାରଶ୍ରମିକ ବାବଦକୁ ମାସିକ ଆନୁମାନିକ ୩୦ହଜାର ଟଙ୍କାରୁ ଊର୍ଦ୍ଧ୍ୱ ରୋଜଗାର ହୋଇଥାଏ। ତେବେ ବର୍ଷେ ହେବ ସେ ଗଁାକୁ ଫେରି ବାସୁଦେବପୁରରେ ତାଙ୍କର ଦୋକାନ ଖୋଲିଛନ୍ତି। ନିହାଣମୁନ ଓ ଗ୍ରାଇଣ୍ଡର ସହାୟତାରେ ସେ ମୂର୍ତ୍ତି ନିର୍ମାଣ କରନ୍ତି। ପଥରରେ ଯେକୌଣସି ମୂର୍ତ୍ତିକୁ ଜୀବନ୍ତ ଭାବେ ନିର୍ମାଣ କରିବାକୁ ୮ରୁ୧୦ ଦିନ ଲାଗୁଛି। ମୂର୍ତ୍ତି ତିଆରି ଲାଗି ରାଜସ୍ଥାନ, ଖିଚିଂ ଆଦି ଅଞ୍ଚଳରୁ ପଥର ଆମଦାନୀ କରାଯାଇଥାଏ ବୋଲି ସେ କହିଛନ୍ତି। ଏହି କାରବାରରେ ସାନଭାଇ ଦୀପ୍ତିକାନ୍ତ ତାଙ୍କୁ ସହଯୋଗ କରନ୍ତି। ବାପା, ମା’, ଦୁଇଭାଇ, ସ୍ତ୍ରୀ ଓ ୫ବର୍ଷର ଝିଅଙ୍କୁ ନେଇ ତାଙ୍କ ପରିବାର। ଏଥିରୁ ଯାହା ରୋଜଗାର ହୁଏ ସେଥିରେ ତାଙ୍କ ପରିବାର ଚଳେ। ଓଡ଼ିଶାରେ ପଥର ଶିଳ୍ପ ଓ ଶିଳ୍ପୀର ଯଥେଷ୍ଟ ଗୁରୁତ୍ୱ ରହିଛି। ଏ ଦିଗରେ ବେକାର ଯୁବକମାନେ ମନୋନିବେଶ କରି ପଥର ଶିଳ୍ପୀ ହେବାକୁ ଇଚ୍ଛା କଲେ ବେକାର ସମସ୍ୟା ଦୂର ହେବା ସହିତ ସେମାନେ ଆତ୍ମନିର୍ଭରଶୀଳ ହୋଇପାରିବେ ବୋଲି ମୁକ୍ତିକାନ୍ତ ମତ ପ୍ରକାଶ କରିଛନ୍ତି।
