ଅନୁଗୋଳ ଅଫିସ, ୨୯।୮: ଅନୁଗୋଳ ଥାନା କୁମଣ୍ଡ ଭଣ୍ଡୁବର ଠାରେ ବୁଧବାର ଏକ ଦୁର୍ଘଟଣାରେ ଗୁରୁତର ହୋଇଥିବା ୨ ଯୁବକଙ୍କୁ କଟକ ପଠାଯିବା ପାଇଁ ୧୦୮ ଆମ୍ବୁଲାନ୍ସ ନ ମିଳିବାରୁ ଜିଲା ମୁଖ୍ୟ ଚିକିତ୍ସାଳୟ ପରିସରରେ ଉତ୍ତେଜନା ଦେଖାଦେଇଥିଲା। ଉତ୍ତ୍ୟକ୍ତ ଲୋକେ ହୋହଲ୍ଲା କରିବାରୁ କିଛି ସମୟ ପାଇଁ ମେଡିକାଲରେ ଚିକିତ୍ସା ସେବା ବାଧାପ୍ରାପ୍ତ ହୋଇଥିଲା। ପରେ ପୋଲିସ ପହଞ୍ଚି ବୁଝାଶୁଝା କରିବା ସହ ଘରୋଇ ଆମ୍ବୁଲାନ୍ସରେ ଗୁରୁତରଙ୍କୁ କଟକ ପଠାଇବା ପରେ ପରିସ୍ଥିତି ଶାନ୍ତ ପଡ଼ିଥିଲା।
ଘଟଣାରୁ ପ୍ରକାଶ ଯେ, କେନ୍ଦ୍ରୀୟ ବିଦ୍ୟାଳୟରେ ଶିକ୍ଷକ ଥିବା ସମ୍ବଲପୁର ଅଞ୍ଚଳର ଦେବରାଜ ଭୋଇ (୨୬) ଓ କାନପୁର ଅଞ୍ଚଳର ମନୋଜ କୁମାର ସୋନି (୨୮) ଅପରାହ୍ନରେ ଭଡ଼ା ଘରକୁ ଫେରୁଥିଲେ। ଏହି ସମୟରେ କୁମଣ୍ଡ ଅଞ୍ଚଳର ତ୍ରିଲୋଚନ ନାଏକ(୨୦) ଓ କରନ ନାଏକ(୧୮) ପଛପଟୁ ଆଉ ଏକ ବାଇକ୍ରେ ଆସି ଶିକ୍ଷକଙ୍କ ବାଇକ୍କୁ ଧକ୍କା ଦେଇଥିଲେ। ଏହି ଦୁର୍ଘଟଣା ପରେ ଭଣ୍ଡୁବରରେ ଉତ୍ତେଜନା ପ୍ରକାଶ ପାଇଥିଲା। ପୋଲିସ ପହଞ୍ଚି ୪ ଆହତଙ୍କୁ ଅନୁଗୋଳ ମେଡିକାଲକୁ ଆଣିଥିଲା। ସେଠାରେ ପ୍ରାଥମିକ ଚିକିତ୍ସା ପରେ ଗୁରୁତର ଥିବା ତ୍ରିଲୋଚନ ଓ କରନଙ୍କୁ ଡାକ୍ତର କଟକ ରେଫର କରିଥିଲେ। କିନ୍ତୁ ସେତେବେଳେ ମେଡିକାଲରେ ୧୦୮ ଆମ୍ବୁଲାନ୍ସ ଉପଲବ୍ଧ ନ ଥିବାରୁ ଏହାକୁ ନେଇ ଉତ୍ତେଜନା ପ୍ରକାଶ ପାଇଥିଲା। ଭଣ୍ଡୁବରରୁ ଆସିଥିବା ଲୋକମାନେ ପାଟିତୁଣ୍ଡ କରିବାରୁ ବହିର୍ବିଭାଗ ସୁରକ୍ଷାକର୍ମୀ ବାଧ୍ୟ ହୋଇ ଭିତରୁ କବାଟ କିଳି ଦେଇଥିଲେ। ଫଳରେ ଦୂର ଦୂରାନ୍ତରୁ ଆସିଥିବା ଅନ୍ୟ ରୋଗୀମାନେ କିଛି ସମୟ ପାଇଁ ଚିକିତ୍ସା ସେବା ପାଇପାରି ନ ଥିଲେ। ପାଟିତୁଣ୍ଡ ବେଳେ କାର୍ଯ୍ୟରତ ଦୁଇ ମହିଳା ଡାକ୍ତରଙ୍କୁ ଦୁର୍ବ୍ୟବହାର କରାଯାଇଥିଲେ ବି ମେଡିକାଲରେ ଥିବା ମ୍ୟାନେଜର କିମ୍ବା ଅନ୍ୟ କୌଣସି ଅଧିକାରୀ ଘଟଣାସ୍ଥଳକୁ ଆସି ନ ଥିବା ଅଭିଯୋଗ ହେଉଛି। ତେବେ ପୋଲିସ ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ସହ ଦୁଇ ଗୁରୁତରଙ୍କୁ ଘରୋଇ ଆମ୍ବୁଲାନ୍ସରେ କଟକ ପଠାଇଥିବା ଜଣାପଡ଼ିଛି। ଅନ୍ୟ ଦୁଇ ଆହତ ମୁଖ୍ୟ ଚିକିତ୍ସାଳୟରେ ଚିକିତ୍ସାଧୀନ ଅଛନ୍ତି। ମେଡିକାଲରେ ଏପରି ଅବ୍ୟବସ୍ଥାକୁ ନେଇ ଭଣ୍ଡୁବରରେ ଚାପା ଉତ୍ତେଜନା ଲାଗି ରହିଥିବାରୁ ସେଠାରେ ପୋଲିସ ମୁତୟନ କରାଯାଇଥିବା ସୂଚନା ମିଳିଛି। ସେହିପରି ଦୁର୍ଘଟଣାକୁ ନେଇ ଅନୁଗୋଳ ଥାନାରେ ଦୁଇଟି ମାମଲା ମଧ୍ୟ ରୁଜୁ କରାଯାଇଛି।
ଘଟଣା ସମ୍ପର୍କରେ ଜିଲା ମୁଖ୍ୟ ଚିକିତ୍ସାଧିକାରୀ ପ୍ରତାପ କୁମାର ବେହେରା କହିଛନ୍ତି, ଲୋକମାନେ ତୁରନ୍ତ ସରକାରୀ ଆମ୍ବୁଲାନ୍ସ ସେବା ଖୋଜୁଥିବାରୁ ତାହା ଯୋଗାଇବା ଅନେକ ସମୟରେ ସମ୍ଭବ ହୋଇପାରୁନି। ଯେତିକି ୧୦୮ ଆମ୍ବୁଲାନ୍ସ ରହିଛି, ସେତିକିରେ ସମସ୍ତ ରୋଗୀଙ୍କୁ ସେବା ଯୋଗାଇ ଦିଆଯାଉଛି। ଦୁଇ ଗୁରୁତରଙ୍କୁ କଟକ ରେଫର ବେଳେ ୧୦୮ ଆମ୍ବୁଲାନ୍ସ ନ ଥିଲା। ରୋଗୀଙ୍କୁ ଆଣିବାକୁ ଗାଡ଼ିଗୁଡ଼ିକ ଅନ୍ୟତ୍ର ଯାଇଥିଲା। ତେବେ ଘରୋଇ ଆମ୍ବୁଲାନ୍ସରେ ଉଭୟଙ୍କୁ କଟକ ପଠା ଯାଇଥିବା ବେହେରା ପ୍ରକାଶ କରିଛନ୍ତି। ଉତ୍ତେଜନା ବେଳେ ମ୍ୟାନେଜର ଲୋକଙ୍କ ନିକଟରେ ପହଞ୍ଚି ନ ଥିବା ଘଟଣାର ଅନୁଧ୍ୟାନ କରାଯିବ। ସେଭଳି କିଛି ହୋଇଥିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମୁଖ୍ୟ ଚିକିତ୍ସା ଅଧିକାରୀ କହିଛନ୍ତି।
