ଜଗତ୍ସିଂହପୁର ଅଫିସ, ୧୭ା୯: ଭାରତ ସରକାର ଡିଜିଟାଲ ପେମେଣ୍ଟ ଉପରେ ଗୁରୁତ୍ୱ ଦେଉଛନ୍ତି। ଏହି ଆଧାରରେ ଦଶହରା ସମୟରେ ଜଗତ୍ସିଂହପୁର ସହରରେ ଥିବା ମଦ ଦୋକାନଗୁଡିକରେ ପଏଣ୍ଟ ଅଫ ସେଲ୍ (ପିଓଏସ୍) ବ୍ୟବସ୍ଥା ହେବ। ଯଦ୍ଦ୍ବାରା ମଦ ବିକ୍ରେତା ଅଜଥା ଲେଜର କାମରୁ ନିସ୍ତାର ପାଇବେ। ମଦ ବିକ୍ରିରେ କେତେ ଟଙ୍କା ଆସିଲା, ଗଲା ଏବଂ କର୍ମଚାରୀଙ୍କୁ କେତେ ଟଙ୍କା ଦରମା ଦିଆଗଲା ସେ ସବୁ କରିବାକୁ ପଡିବ ନାହିଁ। ଯେଉଁମାନେ ମଦ କିଣିବେ ସେମାନଙ୍କ ଯୋଗାଯୋଗ ସଂକ୍ରାନ୍ତୀୟ ତଥ୍ୟ ଓ କିଣା ଦର ସାର୍ବଜନିନ ହୋଇପାରିବ। ଏହାଦ୍ୱାରା ଚୋରି ରୋକାଯିବା ସହ ଟଙ୍କା ପରିଚାଳନାରେ ସହାୟକ ହୋଇପାରିବ। ରାବଣ ପୋଡି ଓ ଭସାଣି ଦିନ ଦେଶୀ ଓ ବିଦେଶୀ ମଦ ଦୋକାନ ବନ୍ଦ ରହିବ। ସୋମବାର ଜିଲାପାଳଙ୍କ କାର୍ଯ୍ୟାଳୟ ପରିସର ସଦ୍ଭାବନା ସଭାଗୃହରେ ଦୁର୍ଗାପୂଜା ପାଳନ ନିମନ୍ତେ ଅନୁଷ୍ଠିତ ପ୍ରସ୍ତୁତି ବୈଠକରେ ପୌରୋହିତ୍ୟ କରି ଜଲାପାଳ ସଂଗ୍ରାମ କେଶରୀ ମହାପାତ୍ର ଏହି ସୂଚନା ଦେଇଛନ୍ତି। ସେ କହିଥିଲେ, ଦଶହରାବେଳେ ସହରରେ ମଦୁଆଙ୍କୁ ଧରିବା ପାଇଁ ଗାଡି ବ୍ୟବସ୍ଥା ହେବ। ଗାଡିରେ ସ୍ବତନ୍ତ୍ର ପୋଲିସ କର୍ମଚାରୀ ନିୟୋଜିତ ହେବେ। ସେମାନେ ପାଟ୍ରୋଲିଂ ସମୟରେ ଯେଉଁଠି ମଦୁଆଙ୍କୁ ଦେଖିବେ ଉଠାଇ ନେବେ। ସହରର ଗୁରୁତ୍ୱପୂର୍ଣ୍ଣ ଟ୍ରାଫିକ ପଏଣ୍ଟରେ ବ୍ଲକର (ଗାଡି ଧୀର ହେବା ଉଦ୍ଦେଶ୍ୟରେ)ରହିବ। ଜଗତ୍ସିଂହପୁରରେ ୨୩ଟି ପୂଜା କମିଟି ମେଢ କରୁଛନ୍ତି। ସେମାନେ ଆଗରୁ ବିଦ୍ୟୁତ୍ ସାର୍ଟିଫିକେଟ୍ ନେଉ ନ ଥିବା ବେଳେ ଚଳିତବର୍ଷ ପ୍ରଥମ ଥର ପାଇଁ ଏହା ପ୍ରଚଳନ ନିଷ୍ପତ୍ତି ହୋଇଛି। ପୂଜା କମିଟି ତରଫରୁ ବିଦ୍ୟୁତ ସଂଯୋଗ ପାଇଁ ଆବେଦନ କରାଯିବ। ସେସୁ ଇନସପେକ୍ଟର ମଣ୍ଡପ ବୁଲି ଅନୁଧ୍ୟାନ କଲାପରେ ସାର୍ଟିଫିକେଟ୍ ଦେବେ। ପୂଜା ମଣ୍ଡପରେ ଅଘଟଣ ହେଲେ ବୀମାଠାରୁ ଆରମ୍ଭ କରି ଆଇନଗତ ସହାୟତା ମିଳିବ। ଜଗତ୍ସିଂହପୁର ବସ୍ ଷ୍ଟପରେ ଅସ୍ଥାୟୀ ପରିଶ୍ରାଗାର କରାଯିବ। ବିଗତ ବର୍ଷଗୁଡିକରେ ମେଳଣ ସମୟରେ ଏକ ନିର୍ଦ୍ଧିଷ୍ଟ କେବୁଲ ସଂସ୍ଥା ଲାଇଭ୍ ଟେଲିକାଷ୍ଟ କରନ୍ତି। ସମ୍ପୃକ୍ତ ସଂସ୍ଥାକୁ ଏ ବାବଦ ଦେୟ ଜଗତ୍ସିଂହପୁର ପୌର ପରିଷଦ ଦେଇଥାଏ। କିନ୍ତୁ ଏହି ସଂସ୍ଥା ବେଆଇନ ଭାବେ ବିଦ୍ୟୁତ ଖୁଣ୍ଟରେ କେବୁଲ ନେଇଥିବାରୁ ମାଗଣାରେ ଲାଇଭ୍ ଟେଲିକାଷ୍ଟ କରିବ। ପରିଷଦ ଏଥିନେଇ ଅର୍ଥ ଦେବ ନାହିଁ। ଗତବର୍ଷ ପରି ଏ ବର୍ଷ ପୂଜା ମଣ୍ଡପଗୁଡିକରେ ଡିଜେ ବାଜିବ ନାହିଁ।
ଅକ୍ଟୋବର ୫ରୁ ୯ ପର୍ଯ୍ୟନ୍ତ ଦୁଗର୍ର୍ାପୂଜା ପାଳନ ହେଉଛି। ବୈଠକ ନିଷ୍ପତ୍ତି ଅନୁଯାୟୀ, ଅକ୍ଟୋବର ୮ରେ ଜିଲାପାଳଙ୍କ କାର୍ଯ୍ୟାଳୟ ପଡିଆରେ ବିନା ଆତସବାଜୀରେ ରାବଣ ପୋଡି ହେବ। ଭସାଣି ଉତ୍ସବ ୯ରେ କରାଯିବ। ମୂର୍ତ୍ତି ବିସର୍ଜନ ନିମନ୍ତେ ୪ଟି ଅସ୍ଥାୟୀ ପୋଖରୀ ଖନନ କରାଯିବ। ଜଳସମ୍ପଦ, ରାସ୍ତା ଓ ଗୃହ, ଗ୍ରାମ୍ୟ ଉନ୍ନୟନ ଓ ଡ୍ରେନେଜ୍ ବିଭାଗ ପୋଖରୀ କାର୍ଯ୍ୟ ସମ୍ପାଦନ କରିବ। ଟାଉନ ହଲଠାରୁ ୧୦ ନମ୍ବର, ପୁରୋହିତପୁର ଛକରୁ ଜିଲାପାଳଙ୍କ କାର୍ଯ୍ୟାଳୟ ଓ ଅତାମଳାରୁ ପୋଷ୍ଟ ଅଫିସ ଛକ ପର୍ଯ୍ୟନ୍ତ ରାସ୍ତା ଉପରେ ପ୍ରତିବନ୍ଧକ ସୃଷ୍ଟି କରୁଥିବା ଗଛର ଡାଳ କଟାଯିବ। ବିରିଡ଼ିଠାରୁ ସର୍କିଟ୍ ହାଉସ ପର୍ଯ୍ୟନ୍ତ, ଆଳିପିଙ୍ଗଳରୁ ପୋଷ୍ଟ ଅଫିସ, ୧୦ ନମ୍ବରରୁ ଚାଟରା ପୋଲ କେନାଲ ବନ୍ଧ, ଜିଲାପାଳଙ୍କ ବାସ ଭବନରୁ ଚର୍ଚ୍ଚିକା ବଜାର ଓ ଓହଳରୁ କୋର୍ଟ ଛକ ପର୍ଯ୍ୟନ୍ତ ରାସ୍ତା ମରାମତି ହେବ। ବୈଠକରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲାପାଳ ସଚିଦାନନ୍ଦ ସାହୁ, ପୂର୍ଣ୍ଣଚନ୍ଦ୍ର ପ୍ରଧାନ, ଉପଖଣ୍ଡ ଆରକ୍ଷୀ ଅଧୀକ୍ଷକ ପ୍ରକାଶ ଚନ୍ଦ୍ର ପାଲ, ଉପଜିଲାପାଳ ମହେନ୍ଦ୍ର ପ୍ରସାଦ ମହାନ୍ତି, ସମସ୍ତ ମେଢର କର୍ମକର୍ତ୍ତା, ଶାନ୍ତି କମିଟି ସଦସ୍ୟ, ବୁଦ୍ଧିଜୀବୀ, ବିଭାଗୀୟ ଅଧିକାରୀ ପ୍ରମୁଖ ଉପସ୍ଥିତ ଥିଲେ। ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ କାମିନୀ ରଞ୍ଜନ ପଟ୍ଟନାୟକ କାର୍ଯ୍ୟସୂଚୀ ପାଠ ଓ ଶେଷରେ ଧନ୍ୟବାଦ ଦେଇଥିଲେ।
